ກອງບັນຊາການ ປກສ ເມືອງບໍ່ແຕນ ລາຍງານໃຫ້ຮູ້ວ່າ: ເວລາ 19 ໂມງ 40 ນາທີ ຂອງໃນວັນທີ 05 ມັງກອນ 2025 ມີເຫດການຄາດຕະກຳ ເກີດຂື້ນຢູ່ງານແຕ່ງດອງ ບ້ານຕົ້ນຕານ, ເມືອງບໍ່ແຕນ, ແຂວງໄຊຍະບູລີ ໄດ້ມີ ທ້າວ ວິໄລ ຈັນທະວົງ ອາຍຸ 35 ປີ ອາຊີບ ປະຊາຊົນ ບ້ານຕົ້ນຕານ, ເມືອງບໍ່ແຕນ ແຂວງໄຊຍະບູລີ ໃຊ້ປືນ (ດັດແປງມາຈາກປືນລູກອັດຍິງຕາປູ) ຍິງ ທ້າວ ທອງໃໝ່ ໄຊຍະລາດ ອາຍຸ 32 ປີ (ເຈົ້າບ່າວ ) ອາຊີບ ພະນັກງານຄູ (ອາສາສະໝັກ) ບ້ານໂພນໄຊ, ເມືອງບໍ່ແຕນ, ແຂວງໄຊຍະບູລີ ເສຍຊີວິດ ຢູ່ເຮືອນເຈົ້າສາວໃນບ້ານຕົ້ນຕານ, ເຈົ້າໜ້າທີ່ກວດພົບເຫັນຮອບລູກປືນເຂົ້າງ່ອນຂ້າງຫູເບື້ອງຊ້າຍ ຊອດອອກງ່ອນຂ້າງຫູເບື້ອງຂວາ.
ປະຈຸບັນ ທາງເຈົ້າໜ້າທີ່ ໄດ້ກັກຕົວ ທ້າວ ວິໄລ ຈັນທະວົງ ມາດໍາເນີນຄະດີຕາມຂັ້ນຕອນຂອງກົດໝາຍ, ສ່ວນສາເຫດ ແລະ ແຮງຈູງໃຈໃນການກໍ່ເຫດຍັງຢູ່ໃນການສອບສວນຂອງເຈົ້າໜ້າ.
ໂພສຈາກຄົນສະໜິດຂອງເຈົ້າບ່າວ ແລະ ເຈົ້າສາວ ທີ່ໄດ້ໄປຮ່ວມງານແຕ່ງພ້ອມພາບທີ່ຫາກໍຖ່າຍຄູ່ກັບທັງສອງ ໂດຍຂຽນບັນຍາຍວ່າ:
ບໍ່ຄິດບໍ່ຝັນເລີຍ ຂໍສະແດງຄວາມເສຍໃຈນໍາຄອບຄົວທັງສອງຝ່າຍ ແລະເຈົ້າສາວຜູ້ນັບຖືເປັນນ້າ ຖ່າຍຮູບບໍ່ທັນໄດ້ສະແດງຄວາມຍິນດີຊ້ຳ ກັບໄດ້ສະແດງຄວາມເສຍໃຈແທນ ປະມານ18 ໂມງປາຍ ຖ່າຍຮູບນໍາເຈົ້າບ່າວເຈົ້າສາວຢູ່ ແລະ ປະມານ 19:30 ມີຄົນບຸກຍິງເຈົ້າບ່າວເສຍຊີວິດ ວັນທີ 5.1.2025 Rip ຈັບຄົນຮ້າຍໄດ້ແລ້ວ.
ທີມງານລາວໂພສຂໍສະແດງຄວາມເສຍໃຈມາຍັງຄອບຄົວເຈົ້າບ່າວ-ເຈົ້າສາວທີ່ສູນເສຍບຸກຄົນສຳຄັນ ແລະ ຄົນທີ່ຮັກໄປຢ່າງກະທັນຫັນ.