ແຫລ່ງຂ່າວຈາກ ແຂວງສາລະວັນ ໃຫ້ຮູ້ວ່າ: ແຂວງສາລະວັນ ໃນນາມເຈົ້າພາບຈັດມະຫາກໍາກິລານັກຮຽນມັດທະຍົມ ທົ່ວປະເທດ ຄັ້ງທີ VII, ຊຶ່ງຈະຈັດຂຶ້ນໃນລະຫວ່າງວັນທີ 13-22 ທັນວາ 2024 ທີ່ຈະມາເຖິງນີ້ ໂດຍໄດ້ຕັ້ງເປົ້າເປັນເຈົ້າຂອງຫລຽນລາງວັນ ໃຫ້ໄດ້ 50 ຫລຽນ ໃນ 12 ປະເພດກິລາ ໃນນີ້, ຫລຽນຄຳ ໃຫ້ໄດ້ 15 ຫລຽນ, 20 ຫລຽນເງິນ ແລະ 15 ຫລຽນທອງແດງ.
ທ່ານ ສຸນີ ນາມມະບົວລີ ວ່າການຫົວໜ້າພະແນກສຶກສາທິການ ແລະ ກິລາແຂວງສາລະວັນ ກ່າວວ່າ: ແຂວງສາລະວັນ ໄດ້ກະກຽມຄວາມພ້ອມຮອບດ້ານ ໃນການເປັນເຈົ້າພາບຈັດມະຫາກໍາກິລານັກຮຽນມັດທະຍົມ ທົ່ວປະເທດ ຄັ້ງທີ VII ໂດຍສະເພາະ ກະກຽມດ້ານທັບນັກກິລາ ທີ່ຈະເຂົ້າຮ່ວມການແຂ່ງຂັນ 12 ປະເພດກິລາ (ຊາຍ-ຍິງ) ຈຳນວນ 250 ກວ່ານ້ອງ, ຍິງ 100 ກວ່ານ້ອງ. ປັດຈຸບັນ ສາມາດຄັດເລືອກນັກກິລາ ແລະ ນັກກິລາໄດ້ເຂົ້ານອນສູນ ເພື່ອຝຶກຊ້ອມແລ້ວ 7 ປະເພດຄື: ບານເຕະ, ມວຍ, ບານສົ່ງ, ກະຕໍ້, ປິ່ງປ່ອງ, ດອກປີກໄກ່ ແລະ ເປຕັງ ທັງເປັນການກະກຽມເຂົ້າຮ່ວມການແຂ່ງຂັນຢ່າງເຕັມກໍາລັງ ແລະ ມີການຕິດຕາມການຝຶກຊ້ອມ ໃນແຕ່ລະສະໜາມ.
ສຳລັບທັບນັກກິລາແຂວງສາລະວັນ ທີ່ໄດ້ເຂົ້າຮ່ວມແຂ່ງຂັນໃນມະຫາກໍາກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VI ທີ່ແຂວງບໍລິຄໍາໄຊ ໃນປີ 2017 ສາມາດຍາດໄດ້ 5 ຫລຽນ ໃນນີ້, ຫລຽນຄຳ 1 ຫລຽນ, ຫລຽນເງິນ 1 ຫລຽນ ແລະ ຫລຽນທອງ 3 ຫລຽນ.
ແຫຼ່ງຂ່າວ: ປະເທດລາວ