ພົຈວ ບົວພັນ ຟອງມະນີ, ຫົວໜ້າກອງບັນຊາການປ້ອງກັນຄວາມສະຫງົບນະ ຄອນຫຼວງວຽງຈັນ ໄດ້ລາຍງານໃຫ້ຮູ້ວ່າ :ໃນໄລຍະ 1 ປີຜ່ານມາ, ເຈົ້າໜ້າທີ່ປ້ອງກັນຄວາມສະ ຫງົບ (ປກສ) ນວ ໄດ້ເຮັດວຽກງານສະກັດກັ້ນ ແລະ ແກ້ໄຂບັນຫາຢາເສບຕິດໄດ້ທັງໝົດ 967 ເລື່ອງ, ກັກຜູ້ຖືກຫາໄດ້ຈຳນວນ 1,641 ຄົນ ຍິງ 187 ຄົນ. ໃນນັ້ນ, ຕ່າງປະເທດ 75 ຄົນ ຍິງ 2 ຄົນ, ໃນໂອກາດພິທີຈູດທຳລາຍຢາເສບຕິດ ຈັດຂຶ້ນໃນວັນທີ 26 ຕຸລາ 2024 ນີ້ ທີ່ເດີ່ນດິນເປົ່າວ່າງບ້ານໂນນສະອາດ ເມືອງໄຊທານີ, ນະຄອນຫຼວງວຽງຈັນ.
ພ້ອມນີ້, ໄດ້ຢຶດວັດຖຸເຄື່ອງຂອງກາງຈໍານວນຫຼາຍລາຍການ ເປັນຕົ້ນແມ່ນ: ຢາບ້າ 15,549,234 ເມັດ, ຢາບົດມຸ່ນ 280 ກຣາມ, ຢາບ້າປຽກນໍ້າ (ເປື່ອຍ) 3 ກິໂລ ກັບ 3 ຖົງນ້ອຍ, ຢາໄອສ 546 ກິໂລ 310.52 ກຣາມ 28 ຫໍ່, 170 ຖົງນ້ອຍ, ຢາ ອີ 2,281 ເມັດ, ຢາອີເມັດສີຂຽວ, ສີເຫຼືອງ, ສີບົວ ລວມມີ 284 ເມັດ, ຢາເອັມດີ 9 ກິໂລ ກັບ 500 ກຣາມ, ນໍ້າກະທ້ອມ 366 ລິດ ກັບ 67 ຕຸກ ແລະ ຢາເສບຕິດຊະນິດອື່ນໆ.
ສ່ວນປະເພດພາຫະນະ, ອຸປະກອນ ແລະ ອາວຸດເສິກ: ລົດໃຫຍ່ ຈໍານວນ 93 ຄັນ, ລົດຈັກ 246 ຄັນ, ເຄື່ອງບົດຢາເສບຕິດ 2 ເຄື່ອງ, ເຄື່ອງອົບຢາເສບຕິດ 2 ເຄື່ອງ, ເຄື່ອງລີດຊອງຄໍລາເຈນ 10 ເຄື່ອງ, ເຄື່ອງປັ່ນ 1 ເຄື່ອງ, ປືນສັ້ນ 18 ບອກ ພ້ອມລູກ 166 ລູກ, ປືນລູກຊອງ 1 ບອກ ພ້ອມລູກ 52 ລູກ, ປືນອາກາ 2 ກະບອກ ພ້ອມລູກ 44 ລູກ, ໝາກແຕກ 5 ໜ່ວຍ ແລະ ອື່ນໆ.
ຂ່າວ: ວສລ