ອີງຕາມການລາຍງານຈາກ ຫົວໜ້າພະແນກສາທາລະນະສຸກແຂວງ ໄດ້ລາຍງານກ່ຽວກັບການຈັດສັນໂຄຕາລັດຖະກອນ ໃນປະຈຸບັນ ທົ່ວແຂວງມີຈໍານວນແພດ-ໝໍທັງໝົດ 514 ຄົນ, ເພື່ອໃຫ້ພຽງພໍ ແລະ ຮອງຮັບການບໍລິການໃຫ້ມີຄຸນນະພາບຕ້ອງບັນຈຸຕື່ມອີກຈໍານວນ 339 ຄົນ.
ເຊິ່ງຄວາມຕ້ອງການບັນຈຸໃຫ້ພຽງພໍຕາມຕໍ່າແໜ່ງງານໃນແຕ່ລະຂັ້ນຄື: ພະແນກສາທາລະນະສຸກແຂວງ ມີ 63 ຄົນ, ຕ້ອງການບັນຈຸເພີ່ມ 21 ຄົນ, ໂຮງໝໍແຂວງ ມີ 119 ຄົນ, ຕ້ອງການບັນຈຸເພີ່ມ 171 ຄົນ, ໂຮງຮຽນແພດ ມີ 19 ຄົນ, ຕ້ອງການບັນຈຸເພີ່ມ 8 ຄົນ, ສາທາເມືອງສາມັກຄີໄຊ ມີ 21 ຄົນ, ຕ້ອງການບັນຈຸເພີ່ມ 29 ຄົນ, ສາທາເມືອງສະໜາມໄຊ ມີ 53 ຄົນ, ຕ້ອງການບັນຈຸເພີ່ມ 37 ຄົນ, ສາທາເມືອງຊານໄຊ ມີ 47 ຄົນ, ຕ້ອງການບັນຈຸເພີ່ມ 3 ຄົນ, ສາທາເມືອງພູວົງ ມີ 44 ຄົນ, ຕ້ອງການບັນຈຸເພີ່ມ 6 ຄົນ, ສາທາເມືອງໄຊເສດຖາ ມີ 54 ຄົນ, ພຽງພໍກັບຄວາມຕ້ອງການ ແລະ ສຸກສາລາທົ່ວແຂວງ 33 ແຫ່ງ ມີ 94 ຄົນ, ຕ້ອງການບັນຈຸເພີ່ມ 64 ຄົນ.
ທ່ານ ອິນປັນ ອິນທິລາດ ຫົວໜ້າພະແນກສາທາລະນະສຸກ ແຂວງອັດຕະປື ລາຍງານໃຫ້ຮູ້ອີກວ່າ: ເນື່ອງຈາກແຜນຄວາມຕ້ອງການເພື່ອໃຫ້ພຽງພໍຕໍ່ການຮັບໃຊ້ບໍລິການປະຊາຊົນຫຼາຍ ແຕ່ການສະໜອງມີຈຳກັດໃນແຕ່ລະປີ ທາງກະຊວງສາທາລະນະສຸກ ຮ່ວມກັບ ພະແນກສາທາແຂວງ ໄດ້ຈັດສັນໂຄຕາໃຫ້ສຸກສາລາ ຢູ່ເຂດຫ່າງໄກສອກຫຼີກໃຫ້ພຽງພໍ, ບົນພື້ນຖານຢ່າງໜ້ອຍ 3 ຄົນ. ເຊິ່ງປະຈຸບັນສຸກສາລາ ຈໍານວນ 33 ແຫ່ງ ແມ່ນມີແພດຄົບ 3 ຄົນ, ແຕ່ແຫ່ງທີ່ຍັງບໍ່ຄົບຕາມມາດຕະຖານວິຊາການ ຄື: ສຸກສາລາແຫ່ງໜຶ່ງຕ້ອງ ມີ 1 ແພດທົ່ວໄປ 2 ພະຍາບານ ແລະ 3 ຜະດຸງຄັນ ແຕ່ໃນຕົວຈິງບາງແຫ່ງ ມີແພດປິ່ນປົວ 2 ຄົນ, ພະຍາບານ 1 ຫຼື 2 ຄົນ, ຜະດຸງຄັນ 1 ຄົນ ບາງແຫ່ງກໍ່ບໍ່ມີຜະດຸງຄັນ.
ເຊິ່ງກຳລັງຈັດສັນ ຫຼື ສັບປ່ຽນພະນັກງານອາສາສະໝັກ, ພະນັກງານຢູ່ຂັ້ນເມືອງ ລົງໄປຊ່ວຍເປັນໄລຍະ, ສ່ວນການຈັດສັນໂຄຕາລັດຖະກອນ ແຕ່ປີ 2021-2024 ແມ່ນກະຊວງສາທາລະນະສຸກ ເປັນຜູ້ຈັດສັນໃຫ້ ໂດຍອີງຕາມວິຊາສະເພາະທີ່ຍັງຂາດ ແລະ ຈໍານວນທີ່ຍັງບໍ່ພໍຕາມມາດຕະຖານ ຕາມການເກັບກຳຂໍ້ມູນ ແລະ ຖານຂໍ້ມູນຕົວຈິງ ທີ່ມີລະບົບຕິດຕາມທາງອອນລາຍ ແລະ ທາງພະແນກສາທາລະນະສຸກແຂວງ ເປັນຜູ້ຈັດການສອບເສັງຄັດເລືອກເອົາບຸກຄະລາກອນເຂົ້າໃສ່ຕາມວິຊາສະເພາະ, ສ່ວນສະຖານທີ່ບັນຈຸ ແມ່ນກະຊວງສາທາລະນະສຸກ ເປັນຜູ້ລະບຸມາເທົ່ານັ້ນ ບໍ່ສາມາດປ່ຽນແປງໄດ້.
ຂ່າວ: ຂ່າວສານອອນລາຍອັດຕະປື