ເນື່ອງໃນໂອກາດວັນແຫ່ງຊາດຕ້ານຢາເສບຕິດ ຄົບຮອບ 23 ປີ ( 12 ຕຸລາ 2001 – 12 ຕຸລາ 2024 ) ນີ້, ແຂວງບໍລິຄຳໄຊ ໄດ້ຈັດພິທີຈູດທໍາລາຍຢາເສບຕິດ ໃນວັນທີ 15 ຕຸລາ 2024 ຢູ່ທີ່ສູນບໍາບັດ ແລະ ຟຶ້ນຟູຜູ້ຕິດຢາເສບຕິດໜອງດົງ ເມືອງປາກກະດິງ ແຂວງ ບໍລິຄໍາໄຊ.ໂດຍການເປັນປະທານຂອງ ປອ ສອນທະນູ ທໍາມະວົງ ກໍາມະການສູນກາງພັກ ເລຂາພັກແຂວງ-ເຈົ້າແຂວງບໍລິຄໍາໄຊ ປະທານປ້ອງກັນຊາດ-ປ້ອງກັນຄວາມສະຫງົບແຂວງ, ມີທ່ານ ຄຳແຫວນ ປັນຍານຸວົງ ຮອງເຈົ້າແຂວງ ປະທານຄະນະກຳມະການຄວບຄຸມ ແລະ ຕ້ານຢາເສບຕິດຂັ້ນແຂວງ, ທ່ານ ພົຈວ ກົງຈັນ ໄຊປັນຍາ ກໍາມະການພັກແຂວງ, ເລຂາຄະນະພັກ ຫົວໜ້າກອງບັນຊາການ ປກສ ແຂວງ, ມີສະພາປະຊາຊົນແຂວງ, ສານປະຊາຊົນແຂວງ, ອົງການໄອຍະການປະຊາຊົນແຂວງ, ມີຄະນະກໍາມະການຄວບຄຸມ ແລະ ຕ້ານຢາເສບຕິດແຂວງ, ພະແນການອ້ອມຂ້າງແຂວງ, ອໍານາດການປົກຄອງບ້ານ ແລະ ພະນັກງານ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ທ່ານພົຈວ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງ ໄດ້ລາຍງານ ຜົນການເຄື່ອນໄຫວວຽກງານ ຄວບຄຸມ, ສະກັດກັ້ນ ແລະ ຕ້ານຢາເສບຕິດ ໃນໄລຍະ 01 ປີຜ່ານມາ ຜ່ານເຄື່ອນໄຫວວຽກງານຕ້ານ, ສະກັດກັ້ນ ແລະ ແກ້ໄຂບັນຫາຢາເສບຕິດ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ,ມີຄະດີຢາເສບຕິດເກີດຂື້ນທັງໝົດ ມີ 329 ເລື່ອງ, ຜູ້ຖືກຫາ 472 ຄົນ, ຍິງ 51 ຄົນ, ຄົນຕ່າງປະເທດ 13 ຄົນ. ຍຶດຂອງກາຢາບ້າ 72.287 ເມັດ, ຢາອີ 61 ກິໂລກຼາມ, ຢາໄອສ 1.589 ກິໂລກຼາມ, ເຮໂລອິນ 45,5 ກິໂລກຼາມ, ຢາເຄ 6,3 ກິໂລກຼາມ, ຄັນຊາແຫ້ງ 3.865 ກິໂລກຼາມ, ຄໍລະເຈນປະສົມສານເສບຕິດ 36 ຊ່ອງ,ໃບກະທ່ອມ 37 ກິໂລກຼາມ, ນ້ຳກະທ່ອມ 60 ຕຸກ, ຢາສູບໄຟຟ້າ 231 ອັນ, ຢຶດປືນແກັບ, ປືນປະດິດ, ປືນສັ້ນ ທັງໝົດ 53 ກະບອກ, ລູກກປືນ 09 ລູກ, ລົດໃຫ່ຍ 20 ຄັນ, ລົດຈັກ 20 ຄັນ.
ສໍາລັບຢາເສບຕິດ ທີ່ນໍາມາຈູດທໍາລາຍຖີ້ມໃນຄັ້ງນີ້ ມີຢາບ້າ ຈໍານວນວ 7.468.982 ເມັດ ນ້ຳໜັກ 731 ກິໂລກຼາມ, ຢາໄອສ 135 ກິໂລກຼາມ, ເຮໂລອິນ 35,5 ກິໂລກຼາມ, ຄັນຊາແຫ້ງ 3.683 ກິໂລກຼາມ, ຄໍລະເຈນ 157 ຊ່ອງ, ຢາສູບໄຟຟ້າ 686 ອັນ ແລະ ຢາອີ 191 ເມັດ ລວມນ້ຳໜັກທັງໝົດ 4.584,5 ກິໂລກຼາມ, ເຊິ່ງເປັນຂອງກາງຄະດີທີ່ຜ່ານການສືບສວນ-ສອບສວນ, ດຳເນີນຄະດີ ແລະ ຜ່ານການຕັດສີນຢ່າງຖືກຕ້ອງຕາມລະບຽບກົດໝາຍເປັນທີ່ຮຽບຮ້ອຍ ແລ້ວຈື່ງນຳມາຈູດເພື່ອທຳລາຍຖີ້ມ.
ຂ່າວ: ໜັງສືພິມບໍລິຄຳໄຊ