ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ພ້ອມດ້ວຍຄະນະເຄື່ອນໄຫວຕິດຕາມສະພາບນໍ້າຖ້ວມຢູ່ເມືອງຊົນນະບູລີ ໃນວັນທີ 25 ກັນຍາ 2024 ໃຫ້ຮູ້ວ່າ: ເມືອງຊົນນະບູລີ ມີ 5 ບ້ານທີ່ໄດ້ຮັບຜົນກະທົບຈາກນໍ້າຖ້ວມເນື້ອທີ່ນາ ມີ ບ້ານໂນນຄູ້ 26,00 ເຮັກຕາ, ບ້ານດອນຍາໂນງ 34,97 ເຮັກຕາ, ບ້ານດົງບູນ 75,50 ເຮັກຕາ, ບ້ານຕຸ່ມແຍ 15,50 ເຮັກຕາ ແລະບ້ານນາໜອງຜໍາ 63,02 ເຮັກຕາ.
ເສັ້ນທາງຖືກຕັດຂາດການສັນຈອນມີ 2 ເສັ້ນຄື: ເສັ້ນທາງແຕ່ບ້ານດົງບູນຫາບ້ານນາໜອງຜໍາ ມີໄລຍະທາງ 2 ກິໂລແມັດ ລະດັບນໍ້າສູງປະມານ 80 ຊັງຕີແມັດ, ເສັ້ນທາງແຕ່ບ້ານທ່າຄໍາເຫຼື້ອມ ຫາບ້ານດອນຍາງໂນງ ມີນໍ້າໄຫຼລັດທາງຈໍານວນ 3 ຈຸດ ມີຄວາມຍາວ 500 ແມັດ.
ທ່ານຍັງໃຫ້ຮູ້ວ່າ: ທາງຄະນະຄຸ້ມຄອງໄພພິບັດຂັ້ນເມືອງ ແມ່ນໄດ້ກະກຽມຄວາມພ້ອມໃນການຮັບມືໄພນໍ້າຖ້ວມ ເປັນໄດ້ກະກຽມເຮືອໃຫຍ່ຂອງເມືອງ ເພື່ອຮັບໃຊ້ຈໍານວນ 5 ລໍາ, ສໍາລັບຂັ້ນບ້ານທີ່ເຄີຍຖືກນໍ້າຖ້ວມແມ່ນໄດ້ກະກຽມເຮືອຈັກຈໍານວນ 245 ລໍາ, ແລະເຮືອພາຍຈໍານວນ 1,003 ລໍາ, ພ້ອມນີ້ຍັງໄດ້ຈັດສັນສະຖານທີ່ພັກພິງສຸກເສີນໄວ້ເມື່ອເກີດນໍ້າຖ້ວມຈໍານວນ 7 ຈຸດ ຄື: ບ້ານໂນນສະຫວ່າງ, ບ້ານດົງຫົງຄໍາ, ບ້ານໜອງຜື, ບ້ານໂພໄຊຄູນ, ບ້ານໂພນຕານ, ບ້ານເມືອງໂຮງ ແລະບ້ານກະທອງເຊ.
ຂ່າວ: ວສລ