ໜັງສືແຈ້ງການປ່ອຍນ້ຳຜ່ານປະຕູນ້ຳລົ້ນ ເພື່ອບໍລິຫານຈັດ ການນ້ຳໃນອ່າງເກັບນ້ຳເຂື່ອນໄຟຟ້າເຊລະນອງ 1 ທີ່ແຂວງສະຫວັນນະເຂດ ໃນວັນທີ 19 ກັນຍາ 2024.

1) ໂດຍອີງຕາມການຄາດຄະເນ ໃນວັນທີ 19 ກັນຍາ 2024 ຈະມີພາຍຸ, ຄາດວ່າຈະມີປະລິມານນໍ້າໄຫຼເຂົ້າອ່າງ 5,000 ms, ເຊິ່ງຈະເຮັດໃຫ້ນໍ້າເກີນລະດັບນໍ້າເຕັມອ່າງ (ລະດັບນໍ້າເຕັມອ່າງ 215 masl, ລະດັບນໍ້າຕາຍ 206 masl ແລະ ປະຈຸບັນ ນໍ້າໃນອ່າງຢູ່ລະດັບນໍ້າ 204.210 masl). ສະນັ້ນ, ກປພ ເຫັນດີດ້ານຫຼັກການ ໃນການປ່ອຍນ້ໍາຜ່ານປະຕູ ລະບາຍນໍ້າລົ້ນ (Spillway) ເພື່ອບໍລິຫານຈັດການນໍາ, ຄວາມປອດໄພຂອງເຂື່ອນ ແລະ ຮັບປະກັນບໍ່ໃຫ້ມີຜົນກະທົບ ຕໍ່ຊີວິດ, ຊັບສິນ, ໂຄງລ່າງພື້ນຖານ ແລະ ບັນດາຫົວຫນ່ວຍທຸລະກິດລຸ່ມເຂື່ອນ.

2) ກ່ອນທີ່ຈະປ່ອຍນໍ້າ, ໃນເວລາທີ່ປ່ອຍນໍ້າ ແລະ ຫຼັງການປ່ອຍນ້ໍາ ໂຄງການ ຕ້ອງມີແຜນລະອຽດໃນການກະກຽມ ຄວາມພ້ອມ ແລະ ປະຕິດບັດຕາມລະບຽບການ ຂອງກະຊວງພະລັງງານ ແລະ ບໍ່ແຮ່ ໂດຍສະເພາະຄໍາແນະນໍາວ່າດ້ວຍ ຄວາມປອດໄພເຂື່ອນ ຢ່າງເຂັ້ມງວດ ເພື່ອປ້ອງກັນ, ຕອບໂຕ້ເຫດການສຸກເສີນ ແລະ ຫຼີກລ່ຽງບໍ່ໃຫ້ເກີດຜົນກະທົບ ຕໍ່ດ້ານລຸ່ມເຂື່ອນ ໃນໄລຍະທີ່ເປີດປະຕູລະບາຍນໍ້າ.

3) ເພື່ອຮັບປະກັນຄວາມປອດໄພ ປ້ອງກັນຜົນກະທົບຕໍ່ປະຊາຊົນໃນເຂດເບື້ອງເທິງເຂື່ອນ ແລະ ລຸ່ມເຂື່ອນຂອງໂຄງການ ໃຫ້ໂຄງການເອົາໃຈໃສ່ໃນການແຈ້ງເຕືອນ ແລະ ປະສານສົມທົບ ກັບອໍານາດການປົກຄອງທ້ອງຖິ່ນ, ຄະນະຄຸ້ມຄອງ ໄພພິບັດແຕ່ລະຂັ້ນ (ແຂວງ, ເມືອງ ແລະ ບ້ານ) ແລະ ຂະແຫນງການທີ່ກ່ຽວຂ້ອງ ເພື່ອແຈ້ງເຕືອນປະຊາຊົນ, ຫົວຫນ່ວຍ ທຸລະກິດ ແລະ ໂຄງການເບື້ອງລຸ່ມເຂື່ອນ.

4) ຖ້າມີກໍລະນີເກີດເຫດສຸກເສີນ ຜູ້ພັດທະນາເຂື່ອນ ຕ້ອງເປັນເຈົ້າການໃນການຈັດຕັ້ງປະຕິບັດແຜນຮັບມືສຸກເສີນເຢ່າງ ຮີບດ່ວນ ພ້ອມທັງປະສານສົມທົບກັບ ຄະນະຄຸ້ມຄອງໄພພິບັດຕ່າງໆ ແລະ ຂະແຫນງການທີ່ກ່ຽວຂ້ອງ ເພື່ອຫຼຸດຜ່ອນ ຜົນກະທົບທີ່ເກີດຂຶ້ນ ຕາມລໍາດັບຂອງເຫດການສຸກເສີນ ແລະ ລາຍງານການຈັດຕັ້ງປະຕິບັດວຽກງານດັ່ງກ່າວ ໃຫ້ ກປພ ຮັບຊາບ ຢ່າງເປັນປົກກະຕິ. ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຮັບຊາບ ແລະ ຈັດຕັ້ງປະຕິບັດຕາມນີ້ດ້ວຍ.