ສຳນັກຂ່າວຕ່າງປະເທດລາຍງານໃນວັນທີ 16 ກັນຍາ 2024 ຜ່ານມາ, ເກີດເຫດລະທຶກຂວັນເມື່ອ ໂດໂນ ທຣຳ ອະດີດປະທານາທິບໍດີສະຫະລັດອາເມລິກາ ຖືກລອບຍິງເປັນຄັ້ງທີ 2 ໃນຮອບ 2 ເດືອນ ໂດຍຮອບຫຼ້າສຸດເກີດຂຶ້ນເມື່ອວັນທີ 15 ກັນຍາ 2024 ຜ່ານມາ, ເຊິ່ງທາງເຈົ້າໜ້າທີ່ສາມາດຈັບຕົບບຜູ້ຕ້ອງສົງໃສໄດ້ແລ້ວ ແລະ ຢູ່ໃນຂັ້ນຕອນການສືບສວນ-ສອບສວນ.
ຕາມການລາຍງານໄດ້ລະບຸວ່າ: ເຫດການລັກລອບຍິງອະດີດປະທານາທິບໍດີ ໂດໂນ ທຣຳ ເກີດຂຶ້ນໃກ້ກັບສະໜາມກັອບ Trump International Golf Club ໃນລັດຟໍລິດາ ພ້ອມຢືນຢັນວ່າອະດີດປະທານາທິບໍດີໂດໂດ ທຣຳ ປອດໄພດີ.
ເຈົ້າໜ້າທີ່ສຳນັກງານສອບສວນກາງສະຫະລັດ ຫຼື ເອັບບີໄອ ໄດ້ເຜີຍແຜ່ພາບຖ່າຍຈາກທີ່ເກີດເຫດມີກະເປົ່າເປ້ 2 ໜ່ວຍ ກ້ອງໂກໂປຣ ແລະ ປືນ AK-47 ືິ້ຖືກເຊື່ອງຢູ່ໃນຟຸ່ມໄມ້ໃກ້ກັບສະໜາມກັອບ ເຈົ້າໜ້າທີ່ຖະແຫຼງຕື່ມວ່າ: ໃນຂະນະທີ່ເຈົ້ານ້າທີ່ກວດສອບພຶ້ນທີ່ສະໜາມກັອບໃນຂຸມຕໍ່ໄປຢູ່ນັ້ນ ໄດ້ສັງເກດເຫັນປາກກະບອກປືນຍື່ນອອກມາຢູ່ບໍລິເວນຟຸ່ມໄມ້ ຈຶ່ງທຳການຍິງປືນໃສ່ຈຳນວນ 4 ນັດໃສ່ຜູ້ຕ້ອງສົງໃສ ຈາກນັ້ນຜູ້ຕ້ອງສົງໃສຈຶ່ງຖິ້ມປືນ ແລະ ອຸປະກອນຕ່າງໆໄວ້ກ່ອນຈະຂີ່ລົດຫຼົບໜີໄປ ແຕ່ສຸດທ້າຍເຈົ້າໜ້າທີ່ກໍສາມາດນຳຈັບໄດ້ສຳເລັດ.
ກ່ອນໜ້ານີ້ ອະດີດປະທານາທິບໍດີ ໂດໂນທຣຳ ກໍເຄີຍຖືກລັກລອບສັງຫານມາແລ້ວຄັ້ງໜຶ່ງ ເມື່ອວັນທີ 13 ກໍລະກົດ 2024 ຜ່ານມາ, ໃນຂະນະທີ່ກຳລັງກ່າວປາໄສທີ່ເມືອງ ບັດເລີ ລັດເພນຊິນເວເນຍ ຈົນຮັບບາດເຈັບທີ່ບໍລິເວນຫູເບື້ອງຂວາ ເຮັດໃຫ້ທາງເຈົ້າໜ້າທີ່ຕ້ອງຮີບນຳໂຕລົງຈາກເວທີ ແລະ ນຳສົ່ງໂຮງໝໍທັນທີ.
ແຫຼ່ງຂ່າວ: ໄທພີບີເອັສ