ຄະນະຮັບຜິດຊອບລົງກວດກາ ແລະ ລົບລ້າງກຸ່ມແກ້ງສໍ້ໂກງທາງໂທລະຄົມ (ແກ້ງຄໍເຊັນເຕີ) ຂ້າມຊາດ ຢູ່ພາຍໃນເຂດເສດຖະກິດພິເສດສາມຫຼ່ຽມຄໍາ ແຂວງບໍ່ແກ້ວ ໄດ້ຈັດກອງປະຊຸມສະຫຼຸບຜົນການລົງກວດກາ ແລະ ລົບລ້າງກຸ່ມແກ້ງສໍ້ໂກງທາງໂທລະຄົມຂ້າມຊາດ ພາຍໃນເຂດເສດຖະກິດພິເສດສາມຫຼ່ຽມຄໍາ ໃນອາທິດຜ່ານມາ, ໂດຍການເຂົ້າຮ່ວມຂອງ ພົຕ ສາຍໃຈ ກົມມະສິດ ຮອງເຈົ້າແຂວງບໍ່ແກ້ວ ຜູ້ຊີ້ນໍາວຽກງານປ້ອງກັນຊາດ-ປ້ອງກັນຄວາມສະຫງົບ, ມີສະພາບໍລິຫານເສດຖະ ກິດພິເສດສາມຫຼ່ຽມຄໍາ, ຂະແໜງການທີ່ກ່ຽວຂ້ອງ, ກໍາລັງປ້ອງກັນຊາດ-ປ້ອງກັນຄວາມສະຫງົບ ເຂົ້າຮ່ວມ.
ທ່ານ ບຸນທອງ ແສງສີກອງ ຫົວໜ້າຄະນະຄຸ້ມຄອງເຂດເສດຖະກິດພິເສດ ແຂວງບໍ່ແກ້ວ ໄດ້ລາຍງານຜົນການລົງກວດກາ ແລະ ລົບລ້າງກຸ່ມແກ້ງສໍ້ໂກງທາງໂທລະຄົມຂ້າມຊາດ ຢູ່ພາຍໃນເຂດເສດຖະກິດພິເສດສາມຫຼ່ຽມຄໍາວ່າ: ການລົງກວດກາ ແລະ ລົບລ້າງກຸ່ມແກ້ງສໍ້ໂກງທາງໂທລະຄົມ ຂ້າມຊາດ ຢູ່ເຂດເສດຖະກິດພິເສດສາມຫຼ່ຽມຄໍາ ຄັ້ງນີ້ ເປັນຄັ້ງທີ 11.
ເຊິ່ງໄດ້ເລີ່ມປະຕິບັດການແຕ່ວັນທີ 26-29 ສິງຫາ 2024, ມີຈໍານວນບຸກຄະລາກອນຮ່ວມປະຕິບັດການຄັ້ງນີ້ 240 ຄົນ, ໂດຍໄດ້ແບ່ງອອກເປັນ 4 ຈຸ ຄື: ຈຸຊີ້ນໍາລວມ, ຄະນະຮັບຜິດຊອບພາກສະໝາມ, ຄະນະອະນຸກໍາມະການກອງເລຂາ, ຄະນະລົງຈັດຕັ້ງປະຕິບັດຕົວຈິງຢູ່ພາກສະໝາມ, ໃນນີ້ ໄດ້ລົງກວດກາຢຸ່ 46 ຫົວໜ່ວຍ.
ຜ່ານການລົງກວດກາ ສ່ວນຫຼາຍແມ່ນບໍ່ພົບເຈົ້າຂອງຫົວໜ່ວຍທຸລະກິດ, ສ່ວນອຸປະກອນທີ່ນຳໃຊ້ເຂົ້າໃນການເຄື່ອນໄຫວການສໍ້ໂກງທາງໂທລະຄົມ ຄະນະຮັບຜິດຊອບໄດ້ກວດພົບເຫັນ ແລະ ໄດ້ເຮັດບົດບັນທຶກ ແລະ ອາຍັດ ໂດຍຮູບການໃຊ້ກະແຈລ໋ອກປະຕູເຂົ້າ-ອອກບໍລິເວນສະຖານທີ່ມີ: ຄອມພິວເຕີຕັ້ງໂຕະ 10,288 ເຄື່ອງ, ໂນດບຸກ 189 ເຄື່ອງ, ໂທລະສັບມືຖື 11,063 ເຄື່ອງ, ອຸປະກອນຮັບ-ສົ່ງສັນຍານ 2,702 ຊຸດ, ເຄື່ອງພິມ(ປິນເຕີ) 17 ເຄື່ອງ, ເງິນສົດ 710 ຢວນ, ຕູ້ເຊບ 189 ໜ່ວຍ, ໂຕະ 3,040 ໜ່ວຍ, ຕັ້ງອີ້ 16,934 ໜ່ວຍ, ຕູ້ເຢັນ 20 ໜ່ວຍ, ຕູ້ນໍ້າຮ້ອນ-ເຢັນ 17 ໜ່ວຍ, ແອເຢັນ 14 ໜ່ວຍ, ພັດລົມ 9 ໜ່ວຍ, ໂຊຟາ 7 ໜ່ວຍ, ລໍາໂພງ 5 ໜ່ວຍ, ລົດເກັງ 1 ຄັນ.
ສຳລັບ ບໍລິສັດບໍລິຫານຈັດການໄຊເບີລາວ ຈໍາກັດ ຫຼື LCM ແມ່ນແນະນໍາໃຫ້ປະກອບເອກະສານ ແລະ ເປັນຕົວແທນປະສານງານການຄຸ້ມຄອງບໍລິຫານບັນດາບໍລິສັດ ທີ່ໄດ້ຂຶ້ນທະບຽນກິດຈະການເກມອອນລາຍ ຫຼື ການພະນັນອອນລາຍ ແມ່ນໃຫ້ກໍານົດສະຖານທີ່ ແລະ ເວລາ, ໃຫ້ມາແຈ້ງບັນຊີ, ຂໍ້ມູນລະອຽດຂອງບັນດາບໍລິສັດ ທີ່ຂຶ້ນກັບ 16 ບໍລິສັດແມ່ ແລະ 75 ສາຂາຍ່ອຍທີ່ຂຶ້ນກັບ 9 ບໍລິສັດແມ່ ເປັນຕົ້ນແມ່ນ ຊື່ຕຶກ, ຊັ້ນ, ເບີຫ້ອງ, ຈໍານວນຫ້ອງ, ເຄື່ອງອຸປະກອນເຮັດວຽກ, ຄອມພິວເຕີ, ໂນດບຸກ, ມືຖື, ໂຕະ, ຕັ່ງ, ເຄື່ອງຮັບສັນຍານເນັດ, ເບີໂທ, ຊິມໂທຕ່າງໆ ແລະ ຈໍານວນແຮງງານແຕ່ລະສັນຊາດຢ່າງລະອຽດ.
ຂ່າວ: ຄວາມສະຫງົບ, ຮູບ: ພູເງິນ