ວັນທີ 28 ສິງຫາ 2024 ຜ່ານນີ້ເຈົ້າໜ້າທີຕຳຫຼວດ ປກສ ກຸ່ມບ້ານເມືອງອໍ້ ໄດ້ຮັບແຫຼ່ງຂ່າວຈາກພົນລະເມືອງດີວ່າ: ຈະມີກຸ່ມຄົນບໍ່ດີເຄື່ອນໄຫວຊື້ – ຂາຍຢາເສບຕິດຢູ່ຂອບເຂດຂອງກຸ່ມບ້ານເມືອງອໍ້ ຈາກນັ້ນ ເຈົ້າໜ້າທີ ປກສ ກຸ່ມບ້ານເມືອງອໍ້ ຈຶ່ງໄດ້ເຄື່ອນໄຫວຕິດຕາມເປົ້າໝາຍດັ່ງກ່າວ.
ຕົກມາຮອດເວລາປະມານ 14 ໂມງ, ຈິ່ງພົບເຫັນເປົ້າໝາຍ 2 ຄົນ, ຊື່ ທ້າວ ເພັດ, ອາຍຸ 28 ປີ ແລະ ທ້າວ ໄຟ, ອາຍຸ 20ປີ , ທັງສອງເປັນປະຊາຊົນ ຢູ່ບ້ານກໍ່ຮິ້ງ, ເມືອງຫົວເມືອງ ໄດ້ຂັບຂີ່ລົດຈັກ ຍີ່ຫໍ້ ຮອນດາຫວຽດ ສີຟ້າຊ້ອນກັນມາແຕ່ບ້ານພຽງໄຊ, ພໍມາຮອດຕໍ່ໜ້າຫ້ອງການ ປກສ ກຸ່ມບ້ານ ເມືອງອໍ້ ເຈົ້າໜ້າທີ່ໄດ້ຂໍກວດກາ-ກວດຄົ້ນ ພົບເຫັນຢາເສບຕິດປະເພດຢາບ້າຈຳນວນ 91 ເມັດ, ຊຸກເຊື່ອງໄວ້ຢູ່ກະເປົາເງິນຂອງ ພວກຜູ້ກ່ຽວ.
ສະນັ້ນ, ທາງເຈົ້າໜ້າທີ່ ປກສ ກຸ່ມ ຈຶ່ງໄດ້ກັກຕົວພວກຜູ້ກ່ຽວທັງສອງມາສືບສວນ ພວກຜູ້ກ່ຽວໄດ້ຮັບສາລະພາບວ່າ: ຢາເສບຕິດປະເພດຢາບ້າຈຳນວນດັ່ງກ່າວ ແມ່ນຂອງຜູ້ກ່ຽວທັງ 2 ຄົນແທ້, ຊື້ນຳທ້າວ ປໍລີ, ອາຍຸ 55 ປີ, ປະຊາຊົນບ້ານ ຫຼັກ 12, ເມືອງຊຳເໜືອ ມາພັກຢູ່ເຮືອນ ທ້າວ ຢ່າງວາງ ເປັນພີ່ນ້ອງຂອງຜູ້ກ່ຽວ ຢູ່ບ້ານຫ້ວຍຫູ້.
ຈາກນັ້ນ, ເຈົ້າໜ້າທີ່ ປກສ ກຸ່ມບ້ານເມືອງອໍ້ ຈຶ່ງໄດ້ປະສານສົບທົບກັບເຈົ້າໜ້າທີ ພະແນກຕຳຫຼວດ ປກສ ເມືອງ ແລະ ພາກສ່ວນທີ່ກ່ຽວຂ້ອງ ລົງກວດຄົ້ນເຄຫາສະຖານຂອງທ້າວຢ່າງວາງ ໄດ້ພົບເຫັນ ທ້າວ ປໍລີ ພ້ອມດ້ວຍຂອງກາງຢາເສບຕິດປະເພດຢາບ້າຈຳນວນ 654 ເມັດ ຝັງດິນຢູ່ກ້ອງຕຽງນອນ. ສະນັ້ນ ທາງເຈົ້າໜ້າ ພະແນກຕຳຫຼວດ ປກສ ເມືອງຫົວເມືອງ ຈຶ່ງໄດ້ນຳຕົວພວກຜູ້ກ່ຽວທັງ 3 ຄົນມາສືບສວນ – ສອບສວນ ດຳເນີນຄະດີຕາມຂັ້ນຕອນລະບຽບກົດໝາຍ.
ຂ່າວ: ປກສ ແຂວງຫົວພັນ