ທ່ານ ສີວິໄລ ແສງຈະເລີນ ຮອງເຈົ້າແຂວງຊຽງຂວາງ ພ້ອມດ້ວຍຄະນະກຳມະການຄຸ້ມຄອງໄພພິບັດຂັ້ນແຂວງ ແລະ ເມືອງ ໄດ້ລົງກວດກາ ຜົນກະທົບຈາກໄພພິບັດ ຢູ່ບ້ານພຽງມອນ ເມືອງໜອງແຮດ ໃນວັນທີ 30 ສິງຫາຜ່ານມາ.
ທ່ານ ນາງ ດວງສີ ວື່ ຮອງເຈົ້າເມືອງໜອງແຮດ ແລະ ຄະນະບ້ານພຽງມອນ ໄດ້ລາຍງານຜົນກະທົບຈາກໄພພິບັດຢູ່ເມືອງເມືອງໜອງແຮດວ່າ: ເນື່ອງຈາກມີຝົນຕົກໜັກໃນຄັ້ງວັນທີ 27 ສິງຫາທີ່ຜ່ານມາ ຕິດຕໍ່ກັນຫຼາຍຊົ່ວໂມງ ເຮັດໃຫ້ຫຼາຍພື້ນທີ່ຂອງເມືອງໜອງແຮດ ໄດ້ຮັບຜົນກະທົບຈາກນ້ຳຖ້ວມ ເສັ້ນທາງເລກ 3977 ແຕ່ບ້ານພະແຄະ ຫາ ບ້ານພຽງໂພ ຊາຍແດນເມືອງກວນ (ແຂວງຫົວພັນ), ເສັ້ນທາງ 4283 ແຕ່ບ້ານດິນດຳ ຫາ ບ້ານພຽງຫົ່ງ ເສັ້ນທາງແມ່ນຖືກຕັດຂາດ ລົດໃຫຍ່ບໍ່ສາມາດສັນຈອນໄດ້, ດິນເຈື່ອນຖົມທາງ, ນ້ຳເຊາະໜ້າທາງເປັນຮ່ອງເລິກ, ໜ້າທາງຂາດ, 4 ບ້ານໄດ້ຮັບຜົນກະທົບຄື: ບ້ານກໍດູ່, ບ້ານພຽງຫົ່ງ, ບ້ານສົບແຕນ ແລະ ບ້ານພຽງມອນ.
ໃນນີ້ ບ້ານກໍດູ່ ເຮືອນເປ່ເພ 5 ຫຼັງ (4 ຫຼັງແມ່ນເປ່ເພ100%), ເນື້ອທີ່ທຳການຜະລິດ 93 ເຮັກຕາ, ຈັກສິດຢາ 5 ເຄື່ອງ ແລະ ສັດລ້ຽງຈໍານວນໜຶ່ງ, ບ້ານພຽງຫົ່ງ ນ້ຳໄຫຼສຸດິນເຂົ້າເຮືອນເສຍຫາຍ 1 ຫຼັງ, ຫໍພັກຂອງທະຫານຊາຍແດນກອງຮ້ອຍ 223, ບ້ານສົບແຕນ ເນື່ອທີ່ທຳການຜະລິດ 74 ເຮັກຕາ, ງົວ 5 ໂຕ, ເຮືອຈັກ 1 ລຳ, ສວນຫຍ້າ 5 ເຮັກຕາ ແລະ ສັດປີກຈຳນວນໜຶ່ງ, ບ້ານພຽງມອນ ເນື້ອທີ່ທຳການຜະລິດ 180,1 ເຮັກຕາ, ໜອງປາ 15 ໜອງ, ແບ້, ໝູ, ສວນຫຍ້າ ແລະ ເປັດ-ໄກ, ລວມມູນຄ່າຄວາມເສຍຫາຍ 5 ຕື້ກວ່າກີບ.
ຄະນະກຳມະການຄຸ້ມຄອງໄພພິບັດແຂວງ-ເມືອງ ໄດ້ລົງແກ້ໄຂສຸກເສີນ ໂດຍສົມທົບກັບບໍລິສັດກໍ່ສ້າງເຂື່ອນໄຟຟ້ານໍ້າເນີນ 1 ແລະ ບໍລິສັດລາວສຳພັນ ພັດທະນາຈຳກັດຜູ້ດຽວ ປະຈຳຢູ່ຈຸດເສຍຫາຍ ໄດ້ລົງແກ້ໄຂສຸກເສີນກ່ອນ.ໂອກາດນີ້ທ່ານ ຮອງເຈົ້າແຂວງຊຽງຂວາງ ໄດ້ເນັ້ນໜັກໃຫ້ພາກສ່ວນທີ່ກ່ຽວຂ້ອງ ລົງເກັບກຳຂໍ້ມູນຜົນເສຍຫາຍແກ້ໄຂສຸກເສີນ ແລະ ຟື້ນຟູໃຫ້ເຂົ້າສູ່ປົກກະຕິໂດຍໄວ.
ໂອກາດນີ້, ການນຳຂອງແຂວງ ໄດ້ມອບເຄື່ອງອຸປະໂພກ ບໍລິໂພກ, ແນວພັນພືດ ໃຫ້ປະຊາຊົນບ້ານພຽງມອນ ລວມມູນຄ່າ 32,091,000 ກີບ, ມອບເງິນສົດ 40,000,000 ກີບໃຫ້ເມືອງ ເພື່ອໝູນໃຊ້ເຂົ້າໃນວຽກງານແກ້ໄຂໄພພິບັດ.
ຂ່າວ: ບຸນມີ ແສງທຸມມີ, ປະຊາຊົນ