ເມື່ອບໍ່ດົນມານີ້, ທີ່ຫ້ອງການໂຄງການເກັບກູ້ລະເບີດປະຈໍາແຂວງຫຼວງພະບາງ ໄດ້ຈັດພິທີເປີດສູນຢ້ຽມຢາມ ໂຄງການເກັບກູ້ລະເບີດແຫ່ງຊາດໃຫ້ເປັນໜຶ່ງໃນສະຖານທີ່ທ່ອງທ່ຽວ-ສຶກສາຂໍ້ມູນຢູ່ແຂວງຫຼວງພະບາງ, ມີທ່ານ ອານຸສັກ ພົງສາ ຜູ້ອຳນວຍການໂຄງການເກັບກູ້ລະເບີດແຫ່ງຊາດ ພ້ອມດ້ວຍຜູ້ຕາງໜ້າຈາກກະຊວງກ່ຽວຂ້ອງ ແລະ ພະ ນັກງານອົງການເກັບກູ້ລະເບີດເຂົ້າຮ່ວມ.
ທ່ານ ອານຸສັກ ພົງສາ ກ່າວວ່າ: ສູນຢ້ຽມຢາມໂຄງການເກັບກູ້ລະເບີດປະຈຳແຂວງຫຼວງພະບາງ ໄດ້ຮັບການສ້າງຂຶ້ນແຕ່ປີ 2009 ນັບແຕ່ມື້ສ້າງຕັ້ງມາຮອດປັດຈຸບັນໄດ້ຕ້ອນຮັບຄະນະຜູ້ແທນລວມທັງນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຢ້ຽມຊົມທັງໝົດ 117.764 ຄົນ ສ່ວນໃຫຍ່ແມ່ນນັກທ່ອງທ່ຽວທີ່ມາຈາກບັນດາປະເທດເອີຣົບ.
ພາຍໃນສູນໄດ້ວາງສະແດງຮ່າງລະເບີດລູກຫວ່ານ, ຮູບພາບ ແລະ ແຜ່ນແພທີ່ບອກເລົ່າເລື່ອງລາວຂອງຜູ້ທີ່ຖືກເຄາະຮ້າຍຈາກລະເບີດບໍ່ທັນແຕກທີ່ຕົກຄ້າງ ໂດຍຜ່ານການແກະສະລັກ ແລະ ການຕໍ່າແຜ່ນແພດ້ວຍຄວາມປານີດສະ ທ້ອນໃຫ້ເຫັນເຖິງຄວາມໂຫດຮ້າຍຂອງສົງຄາມ ແລະ ໄພຂົ່ມຂູ່ຈາກລະເບີດບໍ່ທັນແຕກທີ່ຕົກຄ້າງທີ່ປະຊາຊົນລາວບັນດາເຜົ່າຕ້ອງປະເຊີນເຖິງແມ່ນວ່າສົງຄາມຈະສິ້ນສຸດລົງ 50 ກວ່າປີແລ້ວກໍຕາມ, ການແກະສະຫຼັກ ແລະ ການຕ່ຳແຜ່ນໄດ້ສະແດງໃຫ້ເຫັນສະພາບການດຳລົງຊີວິດຂອງປະຊາຊົນລາວໃນເຂດທີ່ມີລະເບີດບໍ່ທັນແຕກຕົກຄ້າງ ທີ່ຕົກຢູ່ໃນສະພາບຄວາມຫຍຸ້ງຍາກຢ້ານກົວ ແລະ ໃນບາງກໍລະນີໄດ້ພົບກັບການສູນເສຍຈາກການເກີດອຸບັດເຫດ ຍ້ອນລະ ເບີດບໍ່ທັນແຕກທີ່ຕົກຄ້າງ.
ພ້ອມນັ້ນໄດ້ມີການວາງສະແດງບັນດາລູກລະເບີດເປົ່າ ທີ່ສາມາດທ້ອນໂຮມໄວ້ໄດ້ຈຳນວນໜຶ່ງ ຊຶ່ງເປັນລະເບີດທີ່ປອດໄພແລ້ວ ເພື່ອໃຫ້ຜູ້ເຂົ້າທ່ຽວຊົມໄດ້ເຫັນລະເບີດແຕ່ລະຊະນິດ ແລະ ສຳພະວຸດຕ່າງໆທີ່ຕົກຄ້າງຢູ່ສປປ ລາວ ທັງມີການປັບປຸງຫ້ອງສາຍວີດີໂອ ຊຶ່ງຈະເປັນວີດີໂອທີ່ບອກເລົ່າເລື່ອງລາວກ່ຽວກັບປະຫວັດຂອງສົງຄາມອິນດູຈີນຄັ້ງທີ 2 ແລະ ມີວີດີໂອກ່ຽວກັບການເຄື່ອນໄຫວວຽກງານຂອງໂຄງການເກັບກູ້ລະເບີດແຫ່ງຊາດອີກຈຳນວນໜຶ່ງ.
ຂ່າວ: ປະຊາຊົນ