ພະແນກຖະແຫລ່ງຂ່າວ, ວັດ ທະນະທຳ ແລະ ທ່ອງທ່ຽວ ແຂວງຈຳປາສັກ (ຖວທ) ໄດ້ອອກແຈ້ງການ ໃຫ້ເຂັ້ມງວດໃນການ ຄຸ້ມຄອງການເຄື່ອນໄຫວ ຂອງຫົວໜ່ວຍທຸລະກິດຮ້ານອາຫານ ຂອງບຸກຄົນ,ນິຕິບຸກຄົນ ທັງພາຍໃນ ແລະ ຕ່າງປະເທດ ພາຍໃນແຂວງຈຳປາສັກ ທີ່ຂໍໃບອະນຸຍາດເຄື່ອນໄຫວດຳເນີນທຸລະກິດເປັນຮ້ານອາຫານ ແຕ່ລະເມີດ ເປີດເປັນຮ້ານກິນດື່ມບັນເທີງ ພ້ອມທັງບໍລິການກາຍໂມງເວລາທີ່ທາງການກຳນົດ ແລະ ສົ່ງສຽງເນືອງນັນເກີນລະບຽບການກຳນົດໄວ້ ຊຶ່ງເປັນປະກົດການຫຍໍ້ທໍ້ເກີດຂຶ້ນໃນສັງຄົມ.
ສຳລັບເນື້ອໃນແຈ້ງການ ໄດ້ເນັ້ນໜັກ ແລະ ລະບຸຊັດເຈນວ່າ: ມອບໃຫ້ຫົວໜ້າຫ້ອງການ ຖວທ 1 ນະຄອນ ແລະ 9 ຕົວເມືອງ ສົມທົບການຂະແໜງການທີ່ກ່ຽວຂ້ອງ ລົງສ້າງບົດບັນທຶກຮ່ວມກັບເຈົ້າຂອງທຸລະກິດຮ້ານອາຫານທີ່ຕົນອອກໃບອະນຸຍາດເຄື່ອນໄຫວເຮັດບໍລິການຮ້ານອາຫານ-ເຄື່ອງດຶ່ມ ແລະ ເພີ່ມການບໍລິການ ໃຫ້ແຂກຮ້ອງເພງ-ລຳ (ຄາຣາໂອເກະ) ແລະ ບໍລິການຮ້ອງເພງ-ລຳ ແກ່ແຂກ (ໂຟກຊອງ) ເພື່ອໃຫ້ຢຸດເຊົາການບໍລິການໃນຮູບແບບດັ່ງກ່າວ.
ແຕ່ຖ້າເຈົ້າຂອງທຸລະກິດຢາກສືບຕໍ່ດຳເນີນທຸລະກິດເພີ່ມ ໃນຮູບແບບບັນເທີງ ໃຫ້ແນະນຳເຈົ້າຂອງທຸລະກິດ ເຂົ້າມາຍື່ນຄຳຮ້ອງຂໍອະນຸຍາດການດຳເນີນທຸລະກິດບັນເທີງດ້ວຍຕົນເອງ ຢູ່ຫ້ອງການບໍລິ ການລົງທຶນປະຕູດຽວຂັ້ນແຂວງ ໂດຍກຳນົດສົ່ງບົດລາຍ ແລະ ບົດບັນທຶກຮ່ວມກັບເຈົ້າຂອງທຸລະກິດ ແກ່ພະແນກ ຖວທ ແຂວງໂດຍໄວ ໂດຍສະເພາະ ນະຄອນປາກເຊ, ຊຶ່ງເປັນນະຄອນທ່ອງທ່ຽວ ບໍ່ໃຫ້ເກີນວັນທີ 23 ສິງຫາ 2024.
ໂອກາດດຽວກັນ, ຄະນະດັ່ງກ່າວ ຍັງໄດ້ລົງກວດກາການເຄື່ອນ ໄຫວດຳເນີນທຸລະກິດ 2 ຮ້ານຄື: ຮ້ານ ເຢດ 99 ບາ ແລະ ຮ້ານ ໂຊບາ, ຊຶ່ງໃບທະບຽນອະນຸຍາດ ແມ່ນເປີດເປັນຮ້ານອາຫານ, ແຕ່ຕົວຈິງແມ່ນເປັນຮ້ານບັນເທີງ ຊຶ່ງຜິດກັບການອະນຸຍາດ ແລະ ໄດ້ເຮັດບົດບັນທຶກ ໃຫ້ເຈົ້າຂອງກິດຈະການ ໄປປະກອບເອກະສານອະນຸຍາດ ໃຫ້ຖືກຕ້ອງ.
ຂ່າວ: ໜັງສືພິມຈຳປາໃໝ່