ອີງຕາມການລາຍງານຂອງຫ້ອງການໂຍທາທິການ ແລະ ຂົນສົ່ງເມືອງໄຊ ແຂວງອຸດົມໄຊ ເບື້ອງຕົ້ນໃຫ້ຮູ້ວ່າ: ເນື່ອງຈາກຝົນຕົກຕໍ່ເນື່ອງເປັນເວລາຫຼາຍວັນ ຢູ່ເຂດເມືອງໄຊ, ເຮັດໃຫ້ເສັ້ນທາງຫຼາຍຈຸດ ຫຼາຍບ້ານ ມີດິນເຈື່ອນຖົມເສັ້ນທາງ, ຂົວຂາດ, ນ້ຳຖ້ວມ ແລະ ທາງມື່ນ ເຊິ່ງເຮັດໃຫ້ບາງເສັ້ນທາງ ບໍ່ສາມາດສັນຈອນໄປ-ມາໄດ້, ບາງເສັ້ນທາງໄປ-ມາໄດ້ແຕ່ຂ້ອນຂ້າງຍາກລຳບາກ ແລະ ມີຄວາມສ່ຽງຫຼາຍ.
ໃນນີ້, ປະກອບມີ: ເສັ້ນທາງແຕ່ບ້ານລາງ ຫາ ບ້ານໃຫຍ່ນ້ຳແຫ່ງມີ 6 ຈຸດ ລົດສາມາດທຽວໄດ້, ເສັ້ນທາງ 3 ແຍກບ້ານ ມົກຄະ ຫາບ້ານນ້ຳບໍຕາໄກ່ 3 ຈຸດ ບໍ່ສາມາດທຽວໄດ້, ເສັ້ນທາງບ້ານຫ້ວຍຊາງ ຫາບ້ານປຸງຫຽງ ສົ້ນຂົວຂາດ 1 ຈຸດ, ລົດໃຫຍ່ບໍ່ສາມາດທຽວໄດ້ ສ່ວນລົດຈັກແມ່ນທຽວໄດ້, ເສັ້ນທາງ ກໍນ້ອຍ-ນ້ຳແລງ ສົ້ນຂົວຂາດ 1 ຈຸດ ລົດບໍ່ສາມາດທຽວໄດ້.
ເສັ້ນທາງບ້ານບໍ່-ບ້ານຫ້ວຍຊາງ ດິນເຈື່ອນ ແລະ ຈຸດຫ້ວຍຊາງ-ຫົວນ້ຳບາກ ສົ້ນຂົວຂາດ 1 ຈຸດ ແກ້ໄຂແລ້ວສາມາດທ່ຽວໄດ້. ສ່ວນເສັ້ນທາງ 2E ກິໂລແມັດ 18 -ບ້ານລ້ອງຍາ-ນ້ຳກັດ ນ້ຳໄດ້ເຊາະໜ້າທາງ 3 ຈຸດ ລົດສາມາດທ່ຽວໄດ້ປົກກະຕິ.
ຂ່າວ: ວສລ