ໃນວັນທີ 12 ສິງຫາ 2024 – ຄັ້ງທຳອິດ, ນັກສຶກສາລາວທີ່ມີຄວາມຮູ້ຄວາມສາມາດທັງ 3 ຄົນ ໄດ້ຮັບລາງວັນ ທຶນການສຶກສາ ການາດາ – ອາຊຽນ ຊີດ ແລະ ທຶນແລກປ່ຽນການສຶກສາເພື່ອການພັດທະນາ (SEED) ຫຼື Canada-ASEAN Scholarships and Educational Exchanges for Development (SEED) scholarships. ເປັນໂຄງການທຶນການສຶກສາຈາກປະເທດການາດາ ທີ່ມີເປົ້າໝາຍເພື່ອເສີມຂະຫຍາຍສາຍພົວພັນລະຫວ່າງ ປະເທດການາດາ ແລະ ບັນດາປະເທດໃນອາຊຽນ ໂດຍການສະໜັບສະໜູນຜ່ານການດຳເນີນການຕາມວາລະການພັດທະນາທີ່ຢືນຍົງ ປີ 2030, ເພື່ອຫຼຸດຜ່ອນຊ່ອງວ່າງການພັດທະນາ ແລະ ຫຼຸດຜ່ອນຄວາມທຸກຍາກໃນອາຊີຕາເວັນອອກສ່ຽງໃຕ້. ການສຶກສາລວມມີຫົວຂໍ້ຕ່າງໆເຊັ່ນ: ກະເສດອັດສະລິຍະ, ພະລັງງານທົດແທນ,​ ການຄຸມຄອງການເງິນສາທາລະນະ, ຄວາມບໍ່ສະເໝີພາບທາງເພດ, ສຸຂະພາບ, ສິດທິຂອງແມ່ຍິງ ແລະ ເດັກຍິງ.

ຜູ້ໄດ້ຮັບທຶນທຳອິດນີ້ ໄດ້ແກ່ ນາງ ປະກາຍຄຳ ນິຕິບັນດິດ ແລະ ນາງ ສິລິວັນ ລືຊາ ທັງສອງເປັນນັກສຶກສາຈາກຄະນະເສດຖະເສດ ແລະ ບໍລິຫານທຸລະກິດ, ມະຫາວິທະຍາໄລແຫ່ງຊາດ ເຊິ່ງທັງສອງຈະເຂົ້າສຶກສາຕໍ່ທີ່ຄະນະບໍລິຫານທຸລະກິດຂອງມະຫາວິທະຍາໄລໃນ British Columbia, ປະເທດການາດາ. ສຳລັບ ນາງ ອາມອນລັດ ສົມອຸໄລ ນັກສຶກສາລາວ ຈາກມະຫາວິທະຍາໄລສຸຂະພາບ ຈະສຶກສາຕໍ່ທີ່ ມະຫາວິທະຍາໄລ Calgary ຢູ່ Alberta, ປະເທດການາດາ ໃນທ້າຍປີນີ້. ນາງ ປະກາຍຄຳ ກ່າວວ່າ: “ທຶນການສຶກສາຄັ້ງນີ້, ຖືເປັນໂອກາດອັນຍິ່ງໃຫຍ່ສຳລັບນ້ອງ ໃນການຂະຫຍາຍຄວາມຮູ້ ແລະ ມີສ່ວນຮ່ວມໃນການສະໜັບສະໜູນການພັດທະນາແບບຢືນຍົງໃນລາວ”.

ທ່ານ Bob Paquin ອຸປະທູດ ການາດາ ປະຈຳ ສປປ ລາວ ໄດ້ກ່າວວ່າ: ການສຶກສາໃນລະດັບນານາຊາດ ຈະຊ່ວຍສົ່ງເສີມ ຄວາມສຳພັນລະຫວ່າງປະຊາຊົນ ເຊິ່ງມີຄວາມສຳຄັນຕໍ່ຄວາມສຳເລັດໃນໄລຍະຍາວໃນເສດຖະກິດໂລກທີ່ເຊື່ອມໂຍງກັນຫຼາຍຂຶ້ນ. ນອກຈານນີ້, ຍັງເປັນໂອກາດແກ່ປະຊາຊົນການາດານຳອີກ ເພາະຂ້າພະເຈົ້າເຫັນວ່າ ນັກສຶກສາອາຊຽນກໍແມ່ນທູດຂອງອາຊຽນ. ພ້ອມດຽວກັນນັ້ນ, ທ່ານ Bob Paquin ຍັງຫວັງວ່າ SEED ຈະຊ່ວຍສົ່ງເສີມໃຫ້ປະຊາຊົນລາວມາສຶກສາຕໍ່ທີ່ການາດາຫຼາຍຂຶ້ນ ເພາະຄວາມບໍ່ລຶ້ງເຄີຍ ແລະ ໄລຍະທາງຍັງເປັນອຸປະສັກ. ດັ່ງນັ້ນ, ທຶນການສຶກສາ SEED ແມ່ນໄດ້ຮັບຄວາມອຳນວຍສະດວກຈາກການຮ່ວມມືຂອງສະຖາບັນ ແລະ ຂໍ້ຕົກລົງການແລກປ່ຽນນັກສຶກສາລະຫວ່າງປະເທດການາດາ ແລະ ບັນດາປະເທດອາຊຽນ. ສຳລັບຜູ້ທີ່ມີຄວາມສົນໃຈແມ່ນສາມາດສອບຖາມສະຖາບັນຂອງຕົນວ່າມີການຮ່ວມມືກັບສະຖາບັນການາດາ ຫຼື ບໍ່.