ໃນເວລາ 18:00 ນາທີ, ຂອງວັນທີ 8 ສິງຫາທີ່ຜ່ານມາ, ເຈົ້າໜ້າທີ່ຕຳຫຼວດໄດ້ຮັບແຈ້ງເຫດວ່າ: ພົບສົບຍິງສາວ ຢູ່ໃນຫ້ອງນໍ້າຄອນໂດແຫ່ງໜຶ່ງ ທີ່ເມືອງບາງລະມຸງ, ແຂວງຊົນບູລີ.
ເຈົ້າໜ້າທີ່ໄດ້ໃຫ້ຮູ້ວ່າ: ຜູ້ເສຍຊີວິດຊື່ວ່າ ນາງສາວ ໄພ ມະນີ ຫຼື ຊື່ໄທແມ່ນ ນໍ້າຝົນ, ອາຍຸ 28 ປີ, ຊາວລາວ, ສະພາບສົບນອນຫງາຍຈົມກອງເລືອດ ຢູ່ພາຍໃນຫ້ອງນໍ້າ, ບໍລິເວນລໍາຄໍມີບາດແຜຂະໜາດໃຫຍ່ ຄ້າຍກັບຖືກຂອງມີຄົມປາດ ຈົນຫຼອດລົມຂາດ, ຄາດວ່າເສຍຊີວິດມາແລ້ວປະມານ 12 ຊົ່ວໂມງ, ມືດ້ານຂວາຂອງຜູ້ເສຍຊີວິດພົບມີດຂະໜາດໃຫຍ່ 1 ເຫຼັ້ມ ແລະ ພົບມີດປອກໝາກໄມ້ປາຍແຫຼມ ຍາວປະມານ 15 ເຊັນ ວາງໃນອ່າງລ້າງມື, ບໍລິເວນໜ້າຫ້ອງນໍ້າ ພົບຮອຍຕີນຂະໜາດໃຫຍ່ທີ່ເປື້ອນເລືອດ.
ໝູ່ຂອງຜູ້ເສຍຊີວິດໄດ້ໃຫ້ການກັບເຈົ້າໜ້າທີ່ວ່າ: ເວລາປະມານ 14:00 ນາທີຂອງວັນທີ 8 ສິງຫາທີ່ຜ່ານມາ, ເອື້ອຍຂອງຜູ້ເສຍຊີວິດໄດ້ໂທມາຫາຕົນ ໃຫ້ຊ່ວຍມາເບິ່ງນ້ອງສາວໃຫ້ແນ່, ຫຼັງຕິດຕໍ່ບໍ່ໄດ້, ແຕ່ເມື່ອລາວມາຫາຢູ່ຫ້ອງ ກໍພົບວ່າປະຕູລັອກຈາກດ້ານໃນ, ແຟນຊາວຈີນຂອງຜູ້ເສຍຊີວິດ ຊື່ ສາງ ຈື, ອາຍຸ 42 ປີ ກໍເຂົ້າຫ້ອງບໍ່ໄດ້ເຊັ່ນກັນ, ໂດຍອ້າງວ່າ: ຖືກແຟນໄລ່ອອກຈາກຫ້ອງ.
ເມື່ອເຫັນທ່າບໍ່ດີ, ຈຶ່ງໄດ້ແຈ້ງໃຫ້ຊ່າງມາເປີດປະຕູຫ້ອງ, ເມື່ອເປີດປະຕູໄດ້ ແຟນຂອງຜູ້ເສຍຊີວິດກໍຍ່າງເຂົ້າໄປໃນຫ້ອງ ພ້ອມແລ່ນອອກມາດ້ວຍສີໜ້າແຕກຕື່ນວ່າ: ”ລາວຕາຍແລ້ວ” , ຈາກນັ້ນຈຶ່ງໂທແຈ້ງເຈົ້າໜ້າທີ່ຕຳຫຼວດ, ຫຼັງຈາກນັ້ນ ແຟນໜຸ່ມຊາວຈີນກໍຫາຍຕົວໄປ ໂດຍໃຊ້ເຫດຜົນວ່າ ບໍ່ກ້າຢູ່ຈຸດເກີດເຫດ ເພາະຕົນບໍ່ໄດ້ຕໍ່ວີຊ່າໃນການພັກເຊົາຢູ່ປະເທດໄທດົນເຖິງ 4 ປີ.
ໃນເວລາຕໍ່ມາເຈົ້າໜ້າທີ່ ສາມາດຕິດຕາມຕົວ ແຟນຊາວຈີນຄົນດັ່ງກ່າວມາໄດ້, ເຊິ່ງລາວໄດ້ໃຫ້ການວ່າ: ໃນວັນທີ 5 ສິຫງາທີ່ຜ່ານມາ, ເວລາປະມານ 19:00 ນາທີ, ແຟນສາວໄດ້ກັບເຂົ້າມາໃນຫ້ອງ ແລະ ມີອາການຄ້າຍຄົນເມົາ, ພ້ອມໂວຍວາຍວ່າ ມີຜີຕາມມາຂ້າ ແລະ ໄລ່ຕົນອອກຈາກຫ້ອງ ພ້ອມປິດປະຕູລັອກ, ບໍ່ຍອມເປີດປະຕູໃຫ້ ຫຼັງຈາກນັ້ນຕົນກໍອອກໄປນອນກັບໝູ່, ຈົນຮອດຕອນທີ່ໝູ່ຂອງຜູ້ເສຍຊີວິດໂທມາ ໃຫ້ມາເປີດປະຕູຫ້ອງນຳກັນ ແລະ ກໍພົບວ່າແຟນໄດ້ເສຍຊີວິດແລ້ວ.
ພັນຕຳຫຼວດເອກ ທະວີ ກຸດຖະແຫຼງ ເຈົ້າໜ້າທີ່ຕຳຫຼວດເຂດດັ່ງກ່າວໄດ້ເປີດເຜີຍວ່າ: ໃນເບື້ອງຕົ້ນໄດ້ສັ່ງການໃຫ້ກອງພິສູດຫຼັກຖານ ເກັບຫຼັກຖານຈຸດເກີດເຫດຢ່າງລະອຽດ, ໂດຍຍັງບໍ່ໄດ້ມີການສະຫຼຸບວ່າ: ຜູ້ຕາຍເສຍຊີວິດຍ້ອນຖືກຄາດຕະກຳ ຫຼື ທຳຮ້າຍຕົວເອງຈົນເສຍຊີວິດ. ເຊິ່ງຕຳຫຼວດຈະທຳການເຫັບຫຼັກຖານ ແລະ ກວດສອບກ້ອງົວງຈອນປິດ ແລະ ສອບສວນແຟນໜຸ່ມຊາວຈີນຢ່າງລະອຽດ, ແຕ່ເບື້ອງຕົ້ນພົບວ່າ: ແຟນໜຸ່ມຄົນດັ່ງກ່າວລັກອລອບຢູ່ໄທເກີນກຳນົດມາ 4 ປີແລ້ວ.
ຂ່າວ: thairath