ຈາກການລາຍງານຂອງ ລັດວິສາຫະກິດໄຟຟ້າລາວ ສາຂາແຂວງຫົວພັນ ໃຫ້ຮູ້ວ່າ: ເດືອນກໍລະກົດທີ່ຜ່ານມາ, ໃນຂອບເຂດທົ່ວແຂວງຫົວພັນ ມີຝົນຕົກໜັກຕິດຕໍ່ກັນຫຼາຍວັນ ເຮັດໃຫ້ຫ້ວຍນໍ້າຫຼາຍສາຍ ມີລະດັບນໍ້າເພີ່ມຂຶ້ນຢ່າງໄວວາ, ເກີດມີນໍ້າປ່າໄຫຼຫຼາກເຮັດໃຫ້ມີຜົນກະທົບຕໍ່ເສັ້ນທາງຫຼາຍເສັ້ນ, ດິນຍຸບ, ນໍ້າໄຫຼສຸເຂົ້າເຮືອນຊານ, ໄຮ່ນາຂອງປະຊາຊົນເສຍຫາຍຫຼາຍພໍສົມຄວນ.
ໃນນີ້ເມືອງຊ່ອນ, ເມືອງຮ້ຽມ ແລະ ເມືອງຫົວເມືອງ ກໍ່ເປັນເມືອງ ທີ່ໄດ້ຮັບຜົນກະທົບໜັກພໍສົມຄວນເຮັດໃຫ້ເຮືອນຈັກເຂື່ອນໄຟຟ້ານໍ້າແອດໄດ້ຖືກນໍ້າເຊາະເຈື່ອນເສຍຫາຍ, ມີເສົາໄຟຟ້າຫັກ/ລົ້ມ ເຂດແລວຕາຂ່າຍຈາກ ເມືອງຮ້ຽມ ຫາ ເທດສະບານເມືອງຊ່ອນ ຂໍ້ມູນເບື້ອງຕົ້ນ ເສົາ 12 ແມັດ ຈໍານວນ 42 ຕົ້ນ, ຄອນສາຍ 51 ຄອນ.
ເຂດເມືອງຮ້ຽມ ຈຸດບ້ານນໍ້າປຸ່ງ ຫາ ສາກົກຂໍ້ມູນເບື້ອງຕົ້ນ ເສົາ 12 ແມັດ ຈໍານວນ 19 ຕົ້ນ, ຄອນສາຍ 43 ຄອນ ແລະ ເຂດເມືອງຫົວເມືອງ ຈຸດພູເລົ້າ, ບ້ານຫ້ວຍໃໝ່ ແລະ ບ້ານສົບນາ ຂໍ້ມູນເບື້ອງຕົ້ນ ເສົາ 8 ແມັດ ຈໍານວນ 3 ຕົ້ນ, ເສົາ 12 ແມັດ ຈໍານວນ 1 ຕົ້ນ, ຄອນສາຍ ຈໍານວນ 5 ຄອນ. ເຊິ່ງປັດຈຸບັນນີ້, ເຈົ້າໜ້າທີ່ພ້ອມພາກສ່ວນກ່ຽວຂ້ອງກຳລັງທຳການສ້ອມແປງບັນດາເສົາໄຟຟ້າທີ່ໄດ້ຮັບຄວາມເສຍຫາຍຈາກເຫດການດັ່ງກ່າວ.
