ອີງຕາມການລາຍງານຂອງທ່ານ ໂພແກ້ວ ພິລາພັນເດຊ ຮອງປະທານສະຫະພັນ ຢີມນາສຕິກລີລາແຫ່ງຊາດລາວ ໃຫ້ຮູ້ວ່າ: ແພຣວາ ມີຊາໂຕະ ພິລາພັນເດຊ ນັກກິລາຢີມນາສຕິກລີລາ ທີມຊາດລາວ ຈະອອກເດີນທາງເຂົ້າຮ່ວມການແຂ່ງຂັນກິລາໂອແລມປິກ ປາຣີ 2024 ໃນວັນທີ 1 ສິງຫາ 2024 ນີ້. ທ່ານຍັງໃຫ້ຮູ້ຕື່ມອີກວ່າ: ໃນໄລຍະຜ່ານມາ, ແພຣວາ ໄດ້ຝຶກຊ້ອມເກັບຕົວ ກຽມຄວາມພ້ອມ ຢູ່ທີ່ປະເທດອາເຊີໄບຈານ, ໂດຍການສະໜັບສະໜູນຈາກສະຫະພັນ ຢີມນາສຕິກ ອາເຊີໄບຈານ ເປັນໄລຍະເວລາ 1 ເດືອນເຕັມ.
ເຊິ່ງແພຣວາ ກໍໄດ້ໃຫ້ສຳພາດວ່າ: ”ຕອນນີ້ນ້ອງພ້ອມແລ້ວ ທີ່ຈະລົງສະໜາມແຂ່ງຂັນ, ຫຼັງຈາກໄດ້ຝຶກຊ້ອມຢູ່ທີ່ອາເຊີໄບຈານ, ເຊິ່ງມີນັກກິລາທີ່ເຂົ້າຮ່ວມໂອແລມປິກ ໄປຊ້ອມຢູ່ທີ່ນັ້ນຫຼາຍຄົນ, ສ່ວນອາການບາດເຈັບຂອງນ້ອງແມ່ນດີຂຶ້ນຫຼາຍ ແລະ ຊ້ອມໄດ້ຄ່ອງຕົວຫຼາຍຂຶ້ນ, ຄິດວ່າຮອດມື້ແຂ່ງຂັນຕົວຈິງ ທຸກຢ່າງຈະຜ່ານໄປໄດ້ດ້ວຍດີ ຈະເຮັດໃຫ້ເຕັມທີ່ , ຂໍຝາກເຖິງພໍ່ແມ່ປະຊາຊົນຊາວລາວທຸກໆທ່ານ ເປັນກຳລັງຊ່ວຍເຊຍ, ສົ່ງກຳລັງໃຈໃຫ້ນັກກິລາລາວ ທັງ 4 ຄົນພວກເຮົາດ້ວຍ”
ສຳລັບ, ໂປຣແກຣມລົງແຂ່ງຂັນກິລາຢີມນາສະຕິກລີລາ ຂອງ ແພຣວາ ມີຊາໂຕະ ພິລາພັນເດຊ ຈະມີຂຶ້ນໃນວັນທີ 8-9 ສິງຫາ 2024, ສະເພາະຮອບຄັດເລືອກ ຈະແຂ່ງຂັນໃນວັນທີ 8 ສິງຫາ 2024 ເລີ່ມແຂ່ງຂັນເວລາ 10:00 ໂມງ ເປັນຕົ້ນໄປ ຫຼື ເວລາ 15:00 ໂມງຕາມເວລາທ້ອງຖິ່ນຂອງປະເທດລາວ. ສ່ວນຮອບຊີງຊະນະເລີດ ຈະຈັດຂຶ້ນໃນວັນທີ 9 ສິງຫາ 2024 ເລີ່ມແຂ່ງຂັນ ເວລາ 14:30 ໂມງ ຫຼື ປະມານ 19:30 ໂມງ ຕາມເວລາທ້ອງຖິ່ນ ຂອງປະເທດລາວ.