ພັອ ວົງຄໍາ ອິນທະບານ ຮອງຫົວໜ້າກອງບັນຊາການ ປກສ ແຂວງ ສະຫວັນນະເຂດ, ຜູ້ຊີ້ນໍາວຽກງານຫ້ອງຕຳຫຼວດ ໄດ້ໃຫ້ຮູ້ວ່າ:
ໃນເດືອນເມສາທີ່ຜ່ານມາ, ທາງເຈົ້າໜ້າທີ່ ປກສ ແຂວງ ສະຫວັນນະເຂດ ໄດ້ຮັບການລາຍງານຈາກເຈົ້າໜ້າທີ່ກອງບັນຊາການ ປກສ ນະຄອນໄກສອນພົມວິຫານວ່າ: ໄດ້ມີກຸ່ມຄົນບໍ່ດີຈໍານວນໜຶ່ງໄດ້ມີການເຄື່ອນໄຫວລັກຊັບ ປະເພດ(ນໍ້າມັນ) ຢູ່ຕາມບັນດາປໍ້ານໍ້າມັນຕ່າງໆ, ພາຍຫຼັງໄດ້ຮັບການລາຍງານແລ້ວ ເຈົ້າໜ້າທີ່ ໄດ້ລົງເກັບກໍາຂໍ້ມູນ, ກວດກາກ້ອງວົງຈອນປິດ ແລະ ຕິດຕາມເປົ້າໝາຍ.
ຜ່ານການຕິດຕາມຂອງເຈົ້າໜ້າທີ່ ມາໄລຍະໜຶ່ງ ຈຶ່ງສາມາດກັກຕົວເປົ້າໝາຍຜູ້ລົງມືກໍ່ເຫດໄດ້ ຄື: ທ້າວ ແກ້ວ, ອາຍຸ 38 ປີ, ອາຊີບກໍາມະກອນ, ຢູ່ບ້ານ ສອນມີໄຊ, ເມືອງ ເຊໂປນ, ແຂວງ ສະຫວັນນະເຂດ ມາສືບສວນ-ສອບສວນຫາຜູ້ຮ່ວມຂະບວນການ. ຜ່ານການສືບສວນ-ສອບສວນ ຜູ້ກ່ຽວໄດ້ຮັບສາລະພາບວ່າ: ຕົນເອງໄດ້ມີເຄື່ອນໄຫວຫາລັກ ນໍ້າມັນແທ້, ໂດຍແມ່ນຮ່ວມກັບໝູ່ອີກ ຈໍານວນ 3 ຄົນໄດ້ເຄື່ອນໄຫວອອກຫາ ລັກນໍ້າມັນຢູ່ຕາມບັນດາປໍ້ານໍ້າມັນຕ່າງໆທີ່ບໍ່ມີຄົນຢູ່ປະຈໍາ ເຊິ່ງໃຊ້ໄດດູດນໍ້າມັນຂະໜາດນ້ອຍຕໍ່ໃສ່ໝໍ້ໄຟລົດ, ຫຼັງຈາກນັ້ນກໍ່ດູດເອົານໍ້າມັນຈາກສະແຕັກໄປໃສ່ກະຕຸກທີ່ກະກຽມມາ.
ພາຍຫຼັງລັກໄດ້ແລ້ວ ກໍ່ໄດ້ເອົາໄປຂາຍຕໍ່ໃຫ້ພໍ່ຄ້າຊາວຫວຽດນາມ, ເມື່ອໄດ້ຮູ້ຄືແນວນັ້ນທາງເຈົ້າໜ້າທີ່ໄດ້ເລັ່ງລົງຕິດຕາມຫາຜູ້ຮ່ວມຂະບວນການ ແລະ ສາມາດກັກຕົວໄດ້ຕື່ມອີກ 1 ຄົນ, ຊື່ ທ້າວ ອິນທະຫວາ ອາຍຸ 40 ປີ, ອາຊີບ ກໍາມະກອນ, ບ້ານ ນາເຕີ້, ເມືອງ ວິລະບູລີ, ແຂວງ ສະຫວັນນະເຂດ, ມາສືບສວນ- ສອບສວນ ດໍາເນີນຄະດີຕາມຂັ້ນຕອນກົດໝາຍ.
ຂ່າວ: ປກສ ສະຫວັນນະເຂດ