ເມື່ອບໍ່ດົນມານີ້, ທີ່ຫ້ອງການອຸດສະຫະກໍາ ແລະ ການຄ້າ ເມືອງພີນ ແຂວງສະຫວັນນະເຂດ ໄດ້ຈັດພິທີທໍາລາຍສິນຄ້າໝົດອາຍຸ, ໂດຍການເຂົ້າຮ່ວມຂອງ ທ່ານສຸດໃຈ ໄຊຍະວົງ ວ່າການເລຂາພັກເມືອງ ວ່າການເຈົ້າເມືອງ,ທ່ານ ຂັນແກ້ວ ສຸວັນນະລາດ ກໍາມະການພັກເມືອງ ຫົວໜ້າຫ້ອງການອຸດສະຫະກໍາ ແລະ ການຄ້າເມືອງພີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຂັນແກ້ວ ສຸວັນນະລາດ ກໍາມະການພັກເມືອງ ຫົວໜ້າຫ້ອງການອຸດສະຫະກໍາ ແລະ ການຄ້າເມືອງພີນ, ໄດ້ລາຍງານຜົນການເຄື່ອນໄຫວ ການລົງກວດກາສິນຄ້າໝົດອາຍຸ, ສິນຄ້າເສື່ອມຄຸນ-ເສຍຄຸນ ຢູ່ພາຍໃນເມືອງ, ເຊິ່ງໃນໄລຍະ 6 ເດືອນຕົ້ນປີ 2024 ທາງເຈົ້າໜ້າທີ່ໄດ້ພົບ ແລະ ຍຶດສິນຄ້າມາຫຼາຍລາຍການ, ເປົ້າໝາຍກວດກາສິນຄ້າໃນຄັ້ງນີ້ມີ 37 ຫົວໜ່ວຍ. ສາມາດຍຶດສິນຄ້າປະເພດບໍລິໂພກ , ສະບຽງອາຫານໄດ້ທັງໝົດ 102 ລາຍການ, ລວມມູນຄ່າ 21.447.000 ກີບ, ຮູບແບບການທຳລາຍແມ່ນຈະໄດ້ແກະຖົງ ແລະ ຖອກ, ເທລົງໃສ່ຖັງ, ຫຼັງຈາກນັ້ນໃຫ້ຜູ້ບໍລິການຮັກສາຄວາມສະອາດຂອງເມືອງ ນຳໄປທໍາລາຍຖິ້ມຢູ່ສະຖານທີ່ເກັບຂີ້ເຫຍື້ອຂອງເມືອງ.
ຂ່າວ: Media Laos