ໃນຕອນບ່າຍຂອງວັນທີ 08 ກໍລະກົດ 2024 ທີ່ຜ່ານມາ ທີ່ຫ້ອງປະຊຸມໃຫຍ່ ຊັ້ນ 7 ທະນາຄານແຫ່ງ ສປປ ລາວ (ທຫລ) ໄດ້ຈັດພິທີ ມອບ-ຮັບ ໜ້າທີ່ ຜູ້ວ່າການ ທຫລ ລະຫວ່າງ ທ່ານ ປອ. ບຸນເຫຼືອ ສິນໄຊວໍຣະວົງ ຜູ້ວ່າການ ທຫລ ຜູ້ເກົ່າ ແລະ ທ່ານ ນ. ວັດທະນາ ດາລາລອຍ ຮັກສາການຜູ້ວ່າການ ທຫລ ຜູ້ໃໝ່ ແລະ ປະກາດແຕ່ງຕັ້ງ ທ່ານ ສຸລິວັດ ສຸວັນນະຈູມຄຳ ອາດີດຫົວໜ້າກົມຄຸ້ມຄອງໜີ້ສິນສາທາລະນະ, ກະຊວງ ການເງິນ ເປັນຮອງຜູ້ວ່າການ ທຫລ ຜູ້ໃໝ່. ເຂົ້າຮ່ວມພິທີໂດຍທ່ານ ສະເຫຼີມໄຊ ກົມມະສິດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີແຫ່ງ ສປປ ລາວ. ພ້ອມດ້ວຍຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະພັກ, ຄະນະນຳ ທຫລ ແລະ ແຂກທີ່ຖືກເຊີນ.
ໃນພິທີ ທ່ານ ທອງຈັນ ໂຂງພູມຄຳ, ຮອງຫົວໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານບັນດານິຕິກຳຈຳນວນໜຶ່ງກ່ຽວກັບການ ມອບ-ຮັບໜ້າທີ່ຂອງພະນັກງານການນຳຂັ້ນສູງຢູ່ ທຫລ. ພ້ອມດຽວກັນນີ້ ທ່ານ ປອ. ບຸນເຫຼືອ ສິນໄຊວໍຣະວົງ ໄດ້ຂຶ້ນລາຍງານກ່ຽວກັບການສະຫຼຸບວຽກງານຮອບດ້ານຂອງ ທຫລ ໃນໄລຍະທີ່ທ່ານໄດ້ຮັບໜ້າທີ່ຜູ້ວ່າການ ທຫລ ນັບແຕ່ເດືອນ ມິຖຸນາ 2022 ຈົນເຖິງປັດຈຸບັນ.
ໃນໄລຍະຜ່ານມາ ທ່ານໄດ້ເອົາໃຈໃສ່ຊີ້ນຳ-ນຳພາ ຂະແໜງທະນາຄານ ປະຕິບັດໜ້າທີ່ຂອງຕົນໃນທ່າມກາງສະພາບຄວາມຫຍຸ້ງຍາກທາງດ້ານເສດຖະກິດ, ການເງິນ-ເງິນຕາ ພວມເປັນບັນຫາເຄັ່ງຮ້ອນ ແລະ ມີຄວາມທ້າທາຍສູງ, ໄດ້ລົງເລິກຊີ້ນຳ -ນຳພາປັບປຸງຮອບດ້ານວຽກງານຂອງ ທຫລ ເປັນຕົ້ນ ການປັບປຸງການຈັດຕັ້ງ ແລະ ບຸກຄະລາກອນ, ແບບແຜນວິທີການເຮັດວຽກ, ເຕົ້າໂຮມຄວາມສາມັກຄີພາຍໃນ, ປັບປຸງກົດໝາຍ, ປັບປຸງການດຳເນີນນະໂຍບາຍ ແລະ ເຄື່ອງມືນະໂຍບາຍເງິນຕາ ເພື່ອສຸມໃສ່ແກ້ໄຂບັນຫາເຄັ່ງຮ້ອນທາງດ້ານເສດຖະກິດ ເປັນຕົ້ນ ບັນຫາສະພາບອັດຕາເງິນເຟີ້, ສະພາບອັດຕາແລກປ່ຽນ ໂດຍສັງລວມໄດ້ອັນພົ້ນເດັ່ນ.
ຂ່າວ: ເສດຖະກິດ-ການຄ້າ