ຂ່າວ ປກສ ແຂວງບໍ່ແກ້ວ ລາຍງານວ່າ: ວັນທີ 21 ມິຖຸນາທີ່ຜ່ານມາ, ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວ ໄດ້ສະກັດເປົ້າໝາຍລັກລອບຄ້າຂາຍຢາເສບຕິດ ໂດຍການໃຊ້ເສັ້ນທາງບົກແຕ່ເມືອງເມິງ ຫາ ເມືອງຫ້ວຍຊາຍ, ພໍມາຮອດເຂດບ້ານໂພນໄພ ເມືອງຫ້ວຍຊາຍ ເຈົ້າໜ້າທີ່ສະແດງຕົວໃຫ້ສັນຍານຢຸດຈອດເພື່ອກວດຄົ້ນລົດລົດເປົ້າໝາຍ 2 ຄັນ ບໍ່ຕິດປ້າຍທະບຽນ, ຂະນະດຽວກັນເຈົ້າຂອງລົດ ໄດ້ໃຊ້ອາວຸດປືນ ຍິງຕໍ່ສູ້ກັບເຈົ້າໜ້າທີ່ເພື່ອເປີດທາງເອົາຕົວຫຼົບໜີເຂົ້າປ່າ.
ຈາກນັ້ນ, ເຈົ້າໜ້າທີ່ໄດ້ກວດຄົ້ນລົດ 2 ຄັນ ພົບເຫັນຢາບ້າ 2,900 ມັດ ເທົ່າກັບ 5,800,000 ເມັດ, ມີນໍ້າໜັກເກືອບ 700 ກິໂລກຣາມ ແລະ ຢາເຮໂຣອິນ 600 ແທ່ງ ເທົ່າກັບ 300 ຄູ່, ມີນໍ້າໜັກ 225 ກິໂລກຣາມ ພ້ອມຢຶດລົດປຣາໂດ້ 1 ຄັນ ແລະ ລົດກະບະຣີໂວ 1 ຄັນ, ສ່ວນຜູ້ຂັບຂີ່ໄດ້ເອົາຕົວຫຼົບໜີໄປ. ປັດຈຸບັນເຈົ້າໜ້າທີ່ພວມດຳເນີນການສືບຄົ້ນຫາພວກກ່ຽວມາດຳເນີນຄະດີຕາມລະບຽບກົດໝາຍ.
ຂ່າວ: ຂ່າວ ປກສ ແຂວງບໍ່ແກ້ວ