ອົງການອະນາໄມໂລກອອກປະກາດເຕືອນໄພ, ຫຼັງພົບຢາໂອເຊມປິກ(ຢາຫຼຸດນໍ້າໜັກ)ປອມລະບາດໃນຫຼາຍພື້ນທີ່ທົ່ວໂລກ, ເຊິ່ງເຈົ້າໜ້າທີ່ໄດ້ມີການສືບສວນສອບສວນມາຕັ້ງແຕ່ປີ 2022 ໂດຍໄດ້ມີການຈັບກຸມຢາປອມຊະນິດດັ່ງກ່າວ ໃນປະເທດອັງກິດ, ສະຫະລັດອາເມລິກາ ແລະ ເບຊິນ.
ຢາດັ່ງກ່າວເປັນຢາທີ່ມີລັກສະນະເປັນເຂັມສີດເຂົ້າສູ່ບໍລິເວນທ້ອງ, ໃຊ້ງານເພື່ອຫຼຸດລະດັບນໍ້າຕານໃນເລືອດແກ່ຜູ້ເປັນພະຍາດເບົາຫວານ, ແຕ່ປັດຈຸບັນ ມີກຸ່ມຄົນທີ່ຢາກຫຼຸດນໍ້າໜັກທາງລັດ ນໍາມາໃຊ້ ເນື່ອງຈາກຕົວຢານີ້ຈະຊ່ວຍສ້າງຮໍໂມນກະຕຸ້ນສະໝອງ ເຮັດໃຫ້ຮ່າງກາຍຮູ້ສຶກອິ່ມ, ບໍ່ຢາກອາຫານ, ກິນໜ້ອຍລົງ, ສົ່ງຜົນໃຫ້ມີປະສິດທິພາບໃນການຫຼຸດນໍ້າໜັກ.
ດັ່ງນັ້ນ, ຈຶ່ງເປັນທີ່ນິຍົມໃນກຸ່ມຄົນທີ່ຕ້ອງການຫຼຸດນໍ້າໜັກ.ເຊິ່ງຫາກໃຜທີ່ນໍາໃຊ້ຕົວຢາດັ່ງກ່າວໃຫ້ສັງເກດ ແລະ ລະມັດລະວັງເພາະອາດຖືກຢາປອມ, ອາດຈະສ້າງອັນຕະລາຍແກ່ຮ່າງກາຍ ແລະ ຊີວິດໄດ້.
ຂ່າວ: BBC