ຈາກການແບ່ງປັນເລື່ອງລາວລົງໃນເພຈເຟດບຸກຂອງພະຍາດເລືອດ ມະໂຫສົດ ໄດ້ມີການໂພສກ່ຽວກັບການສຳເລັດການປິ່ນປົວຄົນເຈັບ ມະເຮັງເມັດເລືອດຂາວຊະນິດຮຸນແຮງ ເປັນກໍລະນີທຳອິດ, ເຊິ່ງເນື້ອໃນໂພສໄດ້ລະບຸວ່າ: ” 15/5/24 – 19/6/24 ຂໍບັນທຶກໄວ້ໃນປະຫວັດສາດ ໜ່ວຍງານພະຍາດເລືອດ ພະແນກພາຍໃນ ໂຮງໝໍມະໂຫສົດ ໄດ້ສຳເລັດການປິ່ນປົວຄົນເຈັບ ມະເຮັງເມັດເລືອດຂາວຊະນິດຮຸນແຮງ ຫຼື Acute myeloid leukemia ດ້ວຍການໃຫ້ຢາເຄມີບຳບັດຂະໜາດສູງໄດ້ສຳເລັດເປັນກໍລະນີທຳອິດ (7+3 remission induction chemotherapy)
ພວກເຮົາຂໍສະແດງຄວາມຊື່ນຊົມ ຍົກສູງນ້ຳໃຈສູ້ຊົນ ແລະ ຄວາມກ້າຫານໃນການຕັດສິນໃຈຂອງຄອບຄົວຄົນເຈັບ ແລະ ຕົວຄົນເຈັບເອງ ທີ່ມີຄວາມກ້າຫານໃນການເຂົ້າຮັບການປິ່ນປົວມະເຮັງເມັດເລືອດຂາວ, ໂດຍຮັບຮູ້ສະເໝີວ່າ ການປິ່ນປົວແມ່ນປາສະຈາກຄວາມສ່ຽງບໍ່ໄດ້.
ເມື່ອຄົນເຈັບ ແລະ ຄອບຄົວຕັດສິນໃຈເຂົ້າສູ່ການປິ່ນປົວ ທາງທີມງານພະແນກພາຍໃນ ໂຮງໝໍມະໂຫສົດ ໂດຍການຊີ້ນຳຈາກອົງການຈັດຕັ້ງທຸກຂັ້ນ ກໍໄດ້ອຳນວຍຄວາມສະດວກ ແລະ ພາກັນສຸມທັງແຮງກາຍ ແລະ ແຮງໃຈປິ່ນປົວ ເຊີດຊູຄົນເຈັບຈົນໃນທີ່ສຸດກໍສາມາດພົ້ນຈາກຂັ້ນວິກິດໄດ້, ຖ້າໃຫ້ພ້ອມທຸກຢ່າງ ກໍຄົງຈະຍາກທີ່ຈະເລີ່ມຕົ້ນ ຖ້າບໍ່ຕັດສິນໃຈເລີ່ມຕົ້ນ ກໍຈະບໍ່ມີ 1 ແລະ 2 ຕາມມາ ”.
ຂ່າວ: ພະຍາດເລືອດ ມະໂຫສົດ