ເມື່ອບໍ່ດົນມານີ້, ປກສ ເມືອງທຸລະຄົມ ແຂວງວຽງຈັນ ໄດ້ຈັບຕົວຜູ້ກໍ່ເຫດລັກລົດຈັກປະຊາຊົນ, ຫຼັງຈາກມີພົນລະເມືອງດີໄດ້ແຈ້ງຄວາມຫາເຈົ້າໜ້າທີ່ ແລະ ໃຊ້ເວລາຕິດຕາມຕົວ 2 ວັນ ຈຶ່ງສາມາດຈັບຕົວໄດ້ຄື: ທ້າວ ອານຸສອນ ອາຍຸ 27 ປີ, ອາຊີບກໍາມະກອນ, ຢູ່ບ້ານ ນາລ້ອມ, ເມືອງໄຊທານີ, ນະຄອນຫຼວງວຽງຈັນ ໃນຂໍ້ຫາລັກຊັບພົນລະເມືອງ ມາດຳເນີນການສືບສວນ-ສອບສວນ.
ຜ່ານການສືບສວນ-ສອບສວນ ຂອງເຈົ້າໜ້າທີ່ ຜູ້ກ່ຽວໄດ້ຮັບສາລະພາບວ່າ: ໃນວັນທີ 4 ມີຖຸນາ 2024 ຕົນເອງໄດ້ໄປລັກລົດເວບຮ້ອຍ ສີຂຽວດໍາ ຢູ່ຂອບເຂດ ໜ້າຕະຫຼາດບ້ານເກີນ, ເມືອງທຸລະຄົມ, ແຂວງວຽງຈັນ, ພາຍຫຼັງລັກລົດຈັກໄດ້ແລ້ວກໍ່ເອົາໄປໃຫ້ຜູ້ຮ່ວມຂະບວນການນໍາກັນໄປຂາຍ, ຂາຍໃນລາຄາ 3,000,000 ກີບ , ຫຼັງຈາກຜູ້ຮ່ວມຂະບວນການເອົາລົດຈັກໄປຂາຍແລ້ວ ໄດ້ຊື້ຢາບ້າມາໃຫ້ ຕົນຈໍານວນ 32 ເມັດ, ຕົກມາຮອດວັນທີ 5 ມີຖຸນາ 2024 ຈຶ່ງຖືກເຈົ້າໜ້າທີ່ກັກຕົວ ພ້ອມຂອງກາງລົດຈັກ 1 ຄັນ ແລະ ຢຶດຢາເສບຕິດ ຈໍານວນ 32 ເມັດ ທີ່ຊຸກເຊື່ອງໄວ້ໃນກະເປົາຜູ້ກ່ຽວມາ ທໍາການສຶບສວນ- ສອບສວນຕາມລະບຽບກົດໝາຍ.
ຜູ້ກ່ຽວຍັງໃຫ້ການຕື່ມອີກວ່າ: ໃນປີ 2018 ໄດ້ຖືກເຈົ້າໜ້າທີ່ຕໍາຫຼວດ ປກສ ເມືອງໄຊເສດຖາ ກັກຕົວໃນຂໍກ່າວຫາລັກຊັບພົນລະເມືອງ (ປະເພດລົດຈັກ ຈຳນວນ 4 ຄັນ) ພ້ອມທັງຖືກຕັດອິດສະພາບ 4 ປີ, ຫຼັງຈາກໄດ້ຮັບການປ່ອຍຕົວ, ຜູ້ກ່ຽວບໍ່ເຄັດຫຼາບຍັງເຄື່ອນໄຫວລັກຊັບຂອງພົນລະເມືອງອີກ ແລະ ຄັ້ງນີ້ໄປບໍ່ລອດຈຶ່ງຖືກເຈົ້າໜ້າທີ່ກັກຕົວຜູ້ກ່ຽວມາດຳເນີນຄະດີຕາມລະບຽບກົດໝາຍຂອງບ້ານເມືອງອີກຄັ້ງ.
ຂ່າວ: ຄວາມສະຫງົບ