ໃນວັນທີ 23 ພຶດສະພາ ທີ່ຜ່ານມາ, ທີ່ເມືອງດາກົງ (Đakrông), ແຂວງກວາງຈິ (Quảng Trị), ຫວຽດນາມ, ເຈົ້າໜ້າທີ່ໄດ້ກັກໂຕຄົນລາວ ຈຳນວນ 5 ຄົນ (ຍິງ 3, ຊາຍ 2) ໃນຂໍ້ຫາລັກລອບຂົນສົ່ງເຮໂຣອິນ 100 ແທ່ງ ເຂົ້າຫວຽດນາມ, ເຊິ່ງຜູ້ຕ້ອງສົງໄສ 5 ຄົນດັ່ງກ່າວ ແມ່ນຢູ່ນະຄອນໄກສອນ ພົມວິຫານ ແຂວງສະຫວັນນະເຂດ 1 ຄົນ ແລະ ຢູ່ນະຄອນຫລວງວຽງຈັນ 4 ຄົນ.

ຕາມລາຍລະອຽດການຈັບກຸມ, ວັນທີ 23 ພຶດສະພາ, ເຈົ້າໜ້າທີ່ປະຕິບັດກົດໝາຍໄດ້ຢຸດຕິລົດທີ່ຕ້ອງສົງໄສຕິດປ້າຍທະບຽນລາວ. ໃນຂະນະທີ່ເດີນທາງຢູ່ຕາມທາງຫລວງແຫ່ງຊາດເລກທີ 15 ຂອງບ້ານລາເລ ໃນຊຸມຊົນອ່ານໂງ ເມືອງ ດາຄອນ ແຂວງກວາງຈິ ສສ ຫວຽດນາມ. ຂະນະທີ່ຊອກຄົ້ນລົດຄັນດັ່ງກ່າວ ຕຳຫລວດໄດ້ພົບເຫັນເຮໂຣອິນ 100 ແທ່ງ ແລະ ເຄື່ອງຂອງຈຳນວນໜຶ່ງວາງຢູ່ໃນລົດ.

ຜູ້ຕ້ອງຫາຊາວລາວທັງໝົດຍອມຮັບວ່າ: ໄດ້ຮັບຈ້າງຂົນສົ່ງຢາເສບຕິດ ຈາກລາວ ເຂົ້າມາປະເທດ ໂດຍຜ່ານດ່ານສາກົນລະຫວ່າງປະເທດ ແລະ ໄດ້ຄ່າຈ້າງເປັນເງິນ 6,000 ໂດລາສະຫະລັດ.
ປັດຈຸບັນຄະດີດັ່ງກ່າວເຈົ້າໜ້າທີ່ພວມຢູ່ໃນການສືບສວນ-ສອບສວນ ເພື່ອຂະຫຍາຍຜົນຫາຜູ້ຮ່ວມຂະບວນການຕື່ມອີກ.