ທ່ານ ລິນຄຳ ດວງສະຫວັນ ລັດຖະມົນຕີ ກະຊວງກະສິກໍາ ແລະ ປ່າໄມ້ ຖະແຫຼງຂ່າວໃນວັນທີ 27 ພຶດສະພານີ້ ທີ່ກະຊວງກະສິກຳ ແລະ ປ່າໄມ້, ເນື່ອງໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2024 ວ່າ: ໃນວັນປູກຕົ້ນໄມ້ແຫ່ງຊາດປີນີ້, ທົ່ວປະເທດມີແຜນການຈະຈັດພິທີສ້າງຂະບວນການປູກຕົ້ນໄມ້ ຈໍານວນ 3.500 ເຮັກຕາ ແລະ ກະກຽມເບ້ຍໄມ້ ຈໍານວນ 3.500.000 ກວ່າເບ້ຍ.
ໃນນີ້, ສະເພາະ ກະຊວງກະສິກໍາ ແລະ ປ່າໄມ້ ໄດ້ປະສານສົມທົບກັບພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງ ຈະຮ່ວມກັນຈັດພິທີສ້າງຂະບວນການປູກຕົ້ນໄມ້ເພື່ອສະເຫຼີມສະໜອງ ວັນປູກຕົ້ນແຫ່ງຊາດ 1 ມີຖຸນາ ຢູ່ທີ່ ບ້ານໂພສີ (ກຸ່ມໂພນທອງ) ເມືອງນາຊາຍທອງ, ນະຄອນຫຼວງວຽງຈັນ ໃນເນື້ອທີ່ ປະມານ 5 ເຮັກຕາ.
ລັດຖະມົນຕີ ກະຊວງກະສິກຳ ແລະ ປ່າໄມ້ ກ່າວອີກວ່າ: ເພື່ອເປັນການສ້າງຂະບວນການປູກຈິດສຳນຶກໃຫ້ທົ່ວສັງຄົມໃນການສົ່ງເສີມປູກໄມ້ ແລະ ຟື້ນຟູປ່າ ແບບທໍາມະຊາດ ໃຫ້ກວ້າງຂວາງ ແລະ ບັນລຸຕາມແຜນການທີ່ວາງໄວ້, ກະຊວງກະສິກຳ ແລະ ປ່າໄມ້ ໄດ້ອອກແຈ້ງການ ສະບັບເລກທີ 2523/ກປ, ລົງວັນທີ 8 ພຶດ ສະພາ 2024 ເພື່ອເປັນການສ້າງຂະບວນການປູກຕົ້ນໄມ້ ເນື່ອງໃນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2024. ນອກຈາກນີ້, ກະຊວງກະສິກໍາ ແລະ ປ່າໄມ້ໄດ້ສົມທົບກັບຄະນະພັກ, ຄະນະນຳ ກໍຄືອົງການປົກຄອງທ້ອງຖິ່ນທົ່ວປະເທດ ກະກຽມແຜນການ ແລະ ຂະບວນການປູກໄມ້ຢູ່ທ້ອງຖິ່ນໃຫ້ເປັນຂະບວນຟົດຟື້ນ, ໂດຍມີແຜນການເກັບແກ່ນ 20 ພັນກວ່າກິໂລກຣາມ, ກ້າເບ້ຍໄມ້ 34 ລ້ານກວ່າເບ້ຍ ແລະ ປູກໄມ້ 42.000 ເຮັກຕາ.
ແຫຼ່ງຂ່າວ: lao national radio