ໃນວັນທີ 15 ພຶດສະພາທີ່ຜ່ານມາ, ໄດ້ມີການພົບສຽນພຣະພຸດທະຮູບຢູ່ ຢູ່ໃນເຂດສິມເກົ່າ ແຄມນໍ້າຂອງ ໂຄງການສ້າງກັນຕາລິ່ງເຈື່ອນ ບ້ານຫາຍໂສກ , ເມືອງສີສັດຕະນາກ, ນະຄອນຫຼວງວຽງຈັນ, ຫຼັງຈາກທີ່ພົບເຫັນ ແລະ ມີປະຊາຊົນຮູ້ຂ່າວຕ່າງກໍຫຼັ່ງໄຫຼກັນໄປເບິ່ງ ແລະ ສັກກະລະບູຊາ, ເຊິ່ງຫຼາຍໆຄົນອາດຈະຢາກຮູ້ປະຫວັດຂອງສຽນພຣະດັ່ງກ່າວວ່າມີຄວາມເປັນມາແນວໃດ, ມື້ນີ້ລາວໂພສໄດ້ນຳເອົາມາໃຫ້ທຸກຄົນໄດ້ອ່ານໄປນຳກັນ.
ພຣະພຸດທະຮູບອົງນີ້ ສ້າງຂື້ນ ໃນສັດຕະວັດ 15-16 ສິລະປະ ລ້ານຊ້າງຍຸກຕົ້ນຫາກາງ ປາງຊະນະມານ ສ້າງດ້ວຍພຣະທາຍເພັດ ລົງລັກ ພອກຄຳ ໜ້າຕັກປະມານ 3 ແມັດ, ປະດິດສະຖານຢູ່ທີ່ພັດທະສີມາ ວັດສວນມອນ, ສະໄໝເສິກຫໍ້ເຂົ້າມາຮຸກຮານ ໄດ້ຖືກທຳລາຍເພື່ອຄົ້ນເອົາວັດຖຸມີຄ່າຈຶ່ງເອີ້ນວ່າ: ພຣະເຈົ້າຄໍກຸດ, ປະມານປີ ຄສ.1965 ພຣະເຈົ້າຄໍກຸດ ໄດ້ເຈື່ອນພັງລົງນໍ້າຂອງ…ສ່ວນສຽນຫຼືຫົວ ບໍ່ມີໃຜພົບເຫັນອີກເລີຍ, ມາໃນວັນ 15 ພຶດສະພາ 2024 ໄດ້ພົບເຫັນ ຢູ່ໃນເຂດສິມເກົ່າ ແຄມນໍ້າຂອງ ໂດຍໂຄງການສ້າງກັນຕາລິ່ງເຈື່ອນ, ຖືວ່າ ເປັນມໍລະດົກທາງດ້ານ ວັດທະນະທຳ ແລະ ຈິດວິນຍານ ທີ່ບັນພະບຸລຸດສັນສ້າງໄວ້ໃຫ້ລູກຫຼານ ສວນມອນ ແລະ ຊາດລາວ ເພື່ອຮັກສາເສີມສ້າງ ແລະ ສືບທອດຕໍ່ໄປ… (ວັດສວນມອນຮ້າງເພາະພັງລົງນໍ້າຂອງຈຶ່ງມາສ້າງວັດຈອມທອງຂື້ນແທນ)