ອີງຕາມສຳນັກຂ່າວ ເອເອັບພີ ລາຍງານເຫດການລະທຶກທາງການບິນໃນປະເທດ ອິນໂດເນເຊຍ ໃນວັນທີ 15 ພຶດສະພາ 2024 ຜ່ານມາ, ຫຼັງຈາກຈາກເຮືອບິນໂບອິ້ງ 747-400 ຖ້ຽວບິນ 1105 ຂອງສາຍການບິນກາຣູດາ ອິນໂດເນເຊຍ ສາຍການບິນປະຈຳຊາດ ເຊິ່ງຢູ່ໃນລະຫວ່າງການຂົນສົ່ງຜູ້ໂດຍສານພ້ອມນັກບິນລວມ 468 ຄົນເດີນທາງຈາກສະໜາມບິນສາກົນ ສຸນລະຕານ ຣາຊານຸດດິນໃນ ເມືອງມາກັສຊາ ໄປຫາ ເມືອງດີນາ ປະເທດຊາອຸດີອາຣັບບີ.
ແຕ່ເຫດການທີ່ບໍ່ຄາດຄິດກໍເກີດຂຶ້ນເມື່ອເຄື່ອງຈັກຂອງເຮືອບິນເກີດໄຟໄໝ້ ສົ່ງຜົນໃຫ້ນັກບິນຕ້ອງບິນກັບມາລົງຈອດສຸກເສີນທີ່ສະໜາມບິນຕົ້ນທາງ ແລະ ໂຊກດີທີ່ບໍ່ມີໃຜໄດ້ຮັບບາດເຈັບຈາກເຫດການໃນຄັ້ງນີ້.
ທາງດ້ານປະທານ ແລະ ຜູ້ອຳນວຍການສາຍການບິນກາຣູດາ ອິນໂດເນເຊຍ ລະບຸໃນຖະແຫຼງການວ່າ: ນັກບິນຕັດສິນໃຈທັນທີຫຼັງຈາກເຄື່ອງບິນໆຂຶ້ນ ໂດຍໄດ້ຄຳນຶງເຖິງບັນຫາເຄື່ອງຈັກທີ່ຕ້ອງໄດ້ຮັບການກວດສອບເພີ່ມເຕີມພາຍຫຼັງສັງເກດເຫັນປະກາຍໄຟທີ່ເຄື່ອງຈັກຢູ່ບໍລິເວນດ້ານຂວາຂອງເຮືອບິນ.
ສາຍການບິນພາຜູ້ໂດຍສານທັງໝົດລົງຈາກເຮືອບິນທີ່ມີບັນຫາໄດ້ຢ່າງປອດໄພກ່ອນຈະຂຶ້ນຖ້ຽວບິນທົດແທນທີ່ຈັດໃຫ້ເພື່ອເດີນທາງໄປປະເທດຊາອຸດີອາຣັບບີ ໃນມື້ດຽວກັນ ສ່ວນເຮືອບິນລຳດັ່ງກ່າວຖືກລະງັບການໃຊ້ງານເພື່ອດຳເນີນການກວດສອບດ້ານຄວາມປອດໄພ.