ຈັບໂຈນໄດ້ແລ້ວ 1 ຄົນ ທີ່ກໍ່ເຫດປຸ້ນເອົາລົດຈັກ ແລະ ໃຊ້ມີດປາດໃສ່ຄໍເຈົ້າຂອງລົດ ຢູ່ແຄມຂອງ ນະຄອນປາກເຊ

0
1322

ຈາກເຫດການລະທຶກຂວັນ 2 ໂຈນເພດຊາຍ ກໍ່ເຫດປຸ້ນເອົາລົດຈັກປະຊາຊົນ ໃນຕອນແລງວັນທີ 11 ພຶດສະພາ 2024 ຜ່ານມາ, ຢູ່ເສັ້ນທາງແຄມຂອງ ນະຄອນປາກເຊ ແຂວງຈຳປາສັກ ຕາມການລາຍງານຜູ້ເຫັນເຫດການໄດ້ເລົ່າວ່າ: ໂຈນໄດ້ໃຊ້ມີດຈີ້ໃສ່ຄໍເຈົ້າລົດຈັກ ແຕ່ເຈົ້າຂອງລົດບໍ່ຍອມຈຶ່ງຕໍ່ສູ້ກັນ ເຮັດໃຫ້ມີດຂອງໂຈນທີ່ຖືຢູ່ໃນມືໄດ້ປາດຄໍເຈົ້າຂອງລົດ ແລ້ວໂຈນກໍເອົາລົດຈັກຂອງຜູ້ບາດເຈັບໜີໄປ.

ທາງດ້ານພີ່ນ້ອງຜູ້ເສຍຫາຍໄດ້ແຈ້ງໃນວັນທີ 12 ພຶດສະພາໂດຍລະບຸວ່າ: ປັດຈຸບັນທາງດ້ານຜູ້ເສຍຫາຍປອດໄພແລ້ວ ໂດຍໄດ້ຫຍິບ 17 ເຂັມ ຈາກການຖືກມີດຄົນຮ້າຍປາດໃສ່ຄໍ ແລະ ກຳລັງຮັບການປິ່ນປົວຢູ່ໂຮງໝໍ, ຫຼ້າສຸດໃນວັນທີ 15 ພຶດສະພາ 2024 ນີ້ທາງດ້ານເຈົ້າໜ້າທີ່ສາມາດຈັບໂຕ 1 ໃນ 2 ຜູ້ກໍ່ເຫດປຸ້ນລົດຈັກໃນຄັ້ງນີ້ໄດ້ແລ້ວ.