spot_img
Homeຂ່າວພາຍ​ໃນສສກ ອອກແຈ້ງການ ໂຈະການຮຽນຊົ່ວຄາວ ສຳລັບໂຮງຮຽນທີ່ບໍ່ມີແອ-ພັດລົມ ໃນໄລຍະທີ່ມີອາກາດຮ້ອນເຖິງ 40 ອົງສາ

ສສກ ອອກແຈ້ງການ ໂຈະການຮຽນຊົ່ວຄາວ ສຳລັບໂຮງຮຽນທີ່ບໍ່ມີແອ-ພັດລົມ ໃນໄລຍະທີ່ມີອາກາດຮ້ອນເຖິງ 40 ອົງສາ

Published on

ຫ້ອງການກະຊວງສຶກສາທິການ ແລະ ກິລາ ຂໍຖືເປັນກຽດແຈ້ງການມາຍັງບັນດາທ່ານ ເພື່ອເພີ່ມທະວີເຝົ້າ ລະວັງສະພາບອາກາດຮ້ອນອົບເອົ້າ, ລົມພາຍຸ ແລະ ມົນລະພິດທາງອາກາດໃນບາງເຂດ ທີ່ຈະສົ່ງຜົນກະທົບຕໍ່ ສຸຂະພາບ ຂອງພະນັກງານ, ຄູ-ອາຈານ ແລະ ນັກຮຽນນັກສຶກສາ ລວມທັງຊັບສິນ, ອຸປະກອນການຮຽນການສອນ ແລະ ພື້ນຖານ ໂຄງລ່າງສະຖານການສຶກສາ, ວິທະຍາສາດ ແລະ ກິລາ. ສະນັ້ນ, ເພື່ອເປັນການກຽມຄວາມພ້ອມໃນການຮັບມືກັບໄພ ອັນຕະລາຍຕ່າງໆທີ່ອາດເກີດຂຶ້ນ ແລະ ມີມາດຕະການທີ່ເໝາະສົມກັບແຕ່ລະເຫດການ; ຈຶ່ງຂໍແຈ້ງມາຍັງທຸກພາກສ່ວນໃຫ້ເອົາໃຈໃສ່ ດັ່ງນີ້:

1. ເອົາໃຈໃສ່ຕິດຕາມສະພາບອາກາດລາຍວັນ ຖ້າເຫັນວ່າມີອາກາດຮ້ອນອົບເອົ້າ ແລະ ມີອຸນຫະພູມ 40 ອົງສາເຊ ຂຶ້ນໄປ ຊຶ່ງອາດຈະກໍ່ໃຫ້ເກີດຜົນກະທົບຕໍ່ສຸຂະພາບຂອງນ້ອງນັກຮຽນ ໂດຍສະເພາະແມ່ນ ໃນຂັ້ນລ້ຽງເດັກ- ອະນຸບານ, ໂຮງຮຽນປະຖົມ, ມັດທະຍົມສຶກສາຕອນຕົ້ນ-ຕອນປາຍ ບ່ອນທີ່ບໍ່ມີເຄື່ອງລະບາຍອາກາດ-ບໍ່ມີພັດລົມ ໃຫ້ຜູ້ບໍລິຫານການສຶກສາ ແລະ ກິລາ ຂັ້ນແຂວງ/ນະຄອນຫຼວງ, ເມືອງ/ນະຄອນ ຫຼື ຂັ້ນໂຮງຮຽນ ພິຈາລະນາໂຈະບາງຕອນ ຫຼື ບາງໄລຍະຕາມຄວາມເໝາະສົມ ແຕ່ໃຫ້ມີການສອນທົດແທນຄືນຕາມຮູບການຕ່າງໆທີ່ເໝາະສົມ; ນອກຈາກນີ້, ຖ້າເຫັນວ່າອາກາດຮ້ອນຫຼາຍ ກໍໃຫ້ຫຼີກລ່ຽງການຈັດກິດຈະກຳກາງແຈ້ງເປັນເວລາດົນນານ ແລະ ໃຫ້ປັບເວລາການຈັດກິດຈະກຳຕາມຄວາມເໝາະສົມ;

2. ສືບຕໍ່ເຝົ້າລະວັງຕໍ່ສະພາບຝົນຕົກຟ້າຮ້ອງຟ້າເຫຼື້ອມ, ຟ້າຜ່າ ແລະ ລົມພັດແຮງຢູ່ບາງທ້ອງຖິ່ນ ທີ່ຈະເຮັດໃຫ້ ຕົ້ນໄມ້ໃຫຍ່ຫັກລົ້ມ, ຫຼັງຄາອາຄານຮຽນເປ່ເພ ດ້ວຍການເກັບມ້ຽນສິ່ງຂອງສໍາຄັນ, ອຸປະກອນການຮຽນ, ປື້ມແບບຮຽນໄວ້ໃນບ່ອນທີ່ປອດໄພ; ຖ້າມີກໍລະນີຝົນຕົກ, ຟ້າເຫຼື້ອມ ແລະ ມີນໍ້າປ່າໄຫລຊຸ ຊຶ່ງຈະກະທົບ ແລະ ມີຄວາມອັນຕະລາຍຕໍ່ການເດີນທາງຂອງນັກຮຽນ, ມີຜົນກະທົບຕໍ່ທຸກຄົນໃນໄລຍະຮຽນ ແລະ ຖ້າມີ ເຫດການດັ່ງກ່າວແມ່ນຫ້າມດໍາເນີນກິດຈະກຳກາງແຈ້ງ; ຕໍ່ເຫດການໄພທຳມະຊາດນີ້, ໃຫ້ຜູ້ບໍລິຫານການສຶກສາ, ວິທະຍາສາດ ແລະ ກິລາ ພິຈາລະນາໂຈະການຮຽນຊົ່ວຄາວ ໂດຍພິຈາລະນາເປັນແຕ່ກໍລະນີ, ຄໍານຶງເຖິງຄວາມປອດໄພຂອງນັກຮຽນ ແລະ ບຸກຄະລາກອນເປັນຫຼັກ;

3. ໃຫ້ຕິດຕາມສະພາບມົນລະພິດທາງອາກາດ ແລະ ສະພາບຝຸ່ນລະອອງ PM 2.5 ທີ່ສົ່ງຜົນກະທົບຕໍ່ສຸຂະພາບ ແຕ່ລະເຂດເປັນລາຍວັນ ຖ້າຫາກການຈັດລະດັບ AQI ເຫັນວ່າ ເລີ່ມມີຜົນກະທົບຕໍ່ສຸຂະພາບ ຂຶ້ນໄປໃຫ້ແນະ
ນໍານັກຮຽນ, ຄູອາຈານ ແລະ ພະນັກງານ ໃສ່ໜ້າກາກອະນາໄມ, ແຕ່ຖ້າການຈັດລະດັບ AQI ເຫັນວ່າ ມີຜົນ ກະທົບສູງຕໍ່ສຸຂະພາບ ໃຫ້ພິຈາລະນາດໍາເນີນການແກ້ໄຂຕາມຄວາມເໝາະສົມ;

4. ເພື່ອເປັນການຫຼຸດຜ່ອນມົນລະພິດທາງອາກາດ ແລະ ຮັກສາສິ່ງແວດລ້ອມ, ໃຫ້ສະຖານການສຶກສາແຕ່ລະແຫ່ງ ປູກຈິດສໍານຶກຮັກສາສິ່ງແວດລ້ອມ, ຮູ້ຜົນຮ້າຍຂອງການປ່ຽນແປງດິນຟ້າອາກາດ ແລະ ສ້າງສະຖານການສຶກ ສາ ໃຫ້ເປັນພື້ນທີ່ສີຂຽວ ດ້ວຍການປະຕິບັດມາດຕະການ ເຊັ່ນ: ການແຍກຂີ້ເຫຍື້ອ, ປ່ຽນການທໍາລາຍ ຂີ້ເຫຍື້ອດ້ວຍການຈຸດເຜົາມາເປັນການເຮັດຝຸ່ນບົ່ມ, ເພີ່ມການປູກຕົ້ນໄມ້ໃນສະຖານການສຶກສາ ໃນຄອບຄົວ ໃນທີ່ສາທາລະນະ ແລະ ສ້າງທັດສະນີຍະພາບໃນໂຮງຮຽນໃຫ້ສວຍງາມ;

5. ເພື່ອຮັບປະກັນຂໍ້ມູນຂ່າວສານທີ່ເຊື່ອຖືໄດ້ ແລະ ທັນເວລາ ໃຫ້ຕິດຕາມຂ່າວສານຕ່າງຈາກແຫຼ່ງຂໍ້ມູນ ທີ່ເຊື່ອຖືໄດ້ ດັ່ງນີ້:
ການພະຍາກອນອາກາດ ແລະ ແຈ້ງການຕ່າງໆຈາກ ເຟດບຸກ: ກົມອຸຕຸນິຍົມ ແລະ ອຸທົກກະສາດ. ແຈ້ງລະດັບມົນລະພິດທາງອາກາດ PM.2.5 ແລະ ດັດຊະນີຄຸນນະພາບອາກາດ (AQI) ປະຈໍາວັນ ທີ່ ເຟດບຸກ (1) MONRE ກສຊ ແລະ ເຟດບຸກ: (2) ສູນຂ່າວສານການແພດສຸຂະສຶກສາ;

ດັ່ງນັ້ນ, ຈຶ່ງໄດ້ແຈ້ງການມາຍັງທ່ານ ເພື່ອພ້ອມກັນຈັດຕັ້ງປະຕິບັດໃຫ້ມີປະສິດທິພາບ ແລະ ໄດ້ຮັບຜົນດີ, ພາຍຫຼັງການຈັດຕັ້ງປະຕິບັດ ໃຫ້ລາຍງານມາຍັງຫ້ອງການກະຊວງສຶກສາທິການ ແລະ ກິລາ ຊາບໃນເວລາອັນຄວນ.

ບົດຄວາມຫຼ້າສຸດ

ຍ້ອນຫຼັບໃນ! ກະບະລີໂວ້ຕຳລົດສອງແຖວ ບາດເຈັບ 18 ຄົນ ໃນນັ້ນ 3 ຄົນສາຫັດ

ກະບະລີໂວ້ຫຼັບໃນຕຳລົດສອງແຖວ ບາດເຈັບ 18 ຄົນ ໃນນັ້ນ 3 ຄົນສາຫັດ ຢູ່ບ້ານດ້ານຊ້າງ ເມືອງໄຊທານີ ນະຄອນຫຼວງວຽງຈັນ ເຈົ້າໜ້າທີ່ ປກສ ເມືອງໄຊທານີ ນະຄອນຫຼວງວຽງຈັນ ໃຫ້ຮູ້ວ່າ:...

ທັງໜ້າຕາດີ ທັງຈິດໃຈດີ Felix Stray kids ໃນ 2 ປີທີ່ (2024-2025) Felix ໄດ້ບໍລິຈາກໃຫ້ປະເທດລາວ ລວມມູນຄ່າທັງໝົດປະມານ 3 ຕື້ກີບ

ທັງໜ້າຕາດີ ທັງຈິດໃຈດີ Felix Stray kids ຂອບໃຈທີ່ໃຫ້ການສະໜັບສະໜູນມາຕະຫຼອດ 2 ປີ (2024-2025) ທີ່ໄດ້ເຂົ້າມາຊ່ວຍເຫຼືອເດັກນ້ອຍໃນປະເທດລາວໃຫ້ມີຊີວິດການເປັນຢູ່ ແລະ ສະພາບເວດລ້ອມທີ່ດີຂຶ້ນ, ໃນ 2...

ຕ້ອງກະກຽມຂໍ້ມູນຫຍັງແນ່ ເພື່ອຂຽນປະກອບເອກະສານເຮັດບັດປະຈໍາຕົວດິຈິຕອນ ກຽມພ້ອມໄວ້ ເພື່ອຄວາມສະດວກ ແລະ ວ່ອງໄວ

ໃນປັດຈຸບັນໃນນະຄອນຫຼວງວຽງຈັນສາມາດເຮັດບັດປະຈໍາຕົວໄດ້ແລ້ວ ຢູ່ທີ່ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ບ້ານແສງສະຫວ່າງ ເມືອງໄຊເສດຖາ ນະຄອນຫຼວງວຽງຈັນ ເຊິ່ງກ່ອນທີ່ຈະເຮັດບັດປະຈຳຕົວດິຈິຕອນແມ່ນ ຕ້ອງໄດ້ຊື້ແບບຟອມປະກອບຂໍ້ມູນ ລາຄາ 30,000 ກີບ ແລະ ຈະເປີດບໍລິການເຮັດບັດປະຈຳຕົວໃນທົ່ວປະເທດໃນຕົ້ນເດືອນຕຸລາ...

ອົບພະຍົບຫຼາຍກວ່າ 1,000 ຄົນ ເຫດໄຟໄໝ້ເຂດຊຸມຊົນແອອັດ ໃນນະຄອນຫຼວງມະນິລາ ປະເທດຟິລິປິນ

ເກີດເຫດໄຟໄໝ້ຮຸນແຮງຢູ່ເຂດຊຸມຊົນແອອັດ ໃນເມືອງຫຼວງຂອງຟິລິບປິນ ປະຊາຊົນຫຼາຍກວ່າ 500 ຄອບຄົວບໍ່ມີທີ່ຢູ່ອາໄສ. ສຳນັກຂ່າວຕ່າງປະເທດລາຍງານວ່າ: ໃນວັນທີ 15 ກັນຍາ 2025 ຜ່ານມາ, ເກີດເຫດໄຟໄໝ້ຮຸນແຮງໃນຊ່ວງກາງຄືນໃນດເຂດຊຸມຊົນ ແຮບປີ້ແລນ ເຮັດໃຫ້ອາຄານບ້ານເຮຶືອນໄດ້ຮັບຄວາມເສຍຫາຍຫຼາຍຮ້ອຍຫຼັງ ເຮັດໃຫ້ປະຊາຊົນກວ່າ...