ພິທີມອບ-ຮັບພາຫະນະຈຳນວນ 79 ຄັນ ຊຶ່ງເປັນການຊ່ວຍເຫຼຶອຈາກລັດຖະບານ ສປ ຈີນ ໃຫ້ກະຊວງປ້ອງກັນປະເທດ ເພື່ອຮັບໃຊ້ເຂົ້າໃນການເປັນປະທານອາຊຽນ 2024, ໂດຍມີສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະ ມົນຕີກະຊວງປ້ອງກັນປະເທດ ແລະ ສະຫາຍ ພັນເອກພິເສດ ຫຼີປີງ ທີ່ປືກສາທູດຝ່າຍປ້ອງກັນຊາດ ສປ ຈີນປະຈຳ ສປປ ລາວ ເຂົ້າຮ່ວມ.
ສຳລັບພາຫະນະທີ່ນຳມາມອບໃນຄັ້ງນີ້ປະກອບມີລົດຕູ້ 25 ບ່ອນນັ່ງ, ລົດຈິບ, ລົດເກງ, ລົດແພດ ແລະ ລົດສະຫຼາມໂດຍການກ່າວມອບຂອງສະຫາຍ ພັນເອກ ພິເສດ ຫຼີປິງ ທີ່ປຶກສາທູດຝ່າຍປ້ອງກັນຊາດ ສປ ຈີນ ປະຈຳ ສປປ ລາວ ແລະ ຕາງໜ້າກ່າວຮັບຂອງ ສະຫາຍ ພົນໂທ ວົງຄຳ ພົມມະກອນ, ຮອງລັດຖະມົນຕີກະຊວງປ້ອງກັນປະເທດ.
ພ້ອມດຽວກັນນີ້, ສະຫາຍຍັງໄດ້ຕາງໜ້າໃຫ້ຄະນະນຳກະຊວງປ້ອງກັນປະເທດກໍຄືນັກຮົບທົ່ວກອງ ທັບປະຊາຊົນລາວກ່າວສະແດງຄວາມຂອບໃຈ ແລະ ຕີລາຄາສູງໄປຍັງລັດຖະບານຈີນທີ່ໃຫ້ການຊ່ວຍເຫຼືອອັນລໍ້າຄ່າ ແລະ ໃຫ້ຄໍາໝັ້ນສັນຍາວ່າ: ຈະນໍາໃຊ້ພາຫະນະດັ່ງກ່າວໃຫ້ເກີດຜົນປະໂຫຍດສູງ ສຸດ ໃນການນຳໃຊ້ເຂົ້າໃນການເປັນປະທານອາຊຽນ ຂອງ ສປປ ລາວ.
ຂ່າວ-ພາບ: ກອງທັບ.