ຈາກກໍລະນີ ທີ່ສື່ສັງຄົມອອນລາຍໃຫ້ຄວາມສົນໃຈຢ່າງຫຼວງຫຼາຍກ່ຽວກັບ ບັນຫາມີປາຕາຍຈໍານວນຫລາຍຢູ່ເຂດບ້ານກໍຝຸງ ເມືອງກວັນ ແຂວງຫົວພັນ ເຮັດໃຫ້ຜູ້ຄົນຕາງສະແດງຄວາມຄິດເຫັນ ແລະ ຕັ້ງຄຳຖາມເຖິງສາເຫດຂອງປາທີ່ຕາຍ.
ຕໍ່ບັນຫາດັ່ງກ່າວ, ທ່ານ ພອນສິນ ພົມປານດາ ຮອງຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງຫົວພັນ ໄດ້ຊີ້ແຈງຜ່ານລາຍການຮອບບ້ານຜ່ານເມືອງ ຂອງສະຖານີວິທະຍຸກະຈາຍສຽງແຫ່ງຊາດລາວ ໃນວັນທີ 1 ເມສາ 2024 ນີ້ວ່າ: ຂ່າວດັ່ງກ່າວມີມູນຄວາມຈິງແທ້ ເນື່ອງຈາກໃນວັນທີ 30 ມີນາຜ່ານມາ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ໄດ້ສົ່ງວິຊາການທີ່ກ່ຽວຂ້ອງໄປເຄື່ອນໄຫວກວດກາຕົວຈິງເຫັນວ່າ ເຫດການປາຕາຍ ແມ່ນເກີດຂຶ້ນແຕ່ວັນທີ 29 ມີນາ ຢູ່ສາຍນໍ້າເຢື້ອງ ກວມເອົາ 4 ບ້ານ ຄື: ບ້ານກໍຝຸງ, ສັນຄູນ, ທ່າຄວາຍ ແລະ ບ້ານບວກ. ແຕ່ປັດຈຸບັນ, ຍັງບໍ່ທັນຮູ້ກ່ຽວກັບສາເຫດທີ່ເຮັດໃຫ້ປາຕາຍເທື່ອ ເນື່ອງຈາກວິຊາການທີ່ໄປກວດກາຕົວຈິງບໍ່ທັນມີເຄື່ອງມືວັດແທກຄຸນນະພາບຂອງນໍ້າ, ແຕ່ໃນຂອບເຂດທີ່ໃກ້ຄຽງ ແມ່ນເຄີຍມີການສໍາຫລວດແຮ່ເຫລັກມາແຕ່ດົນແລ້ວ ແຕ່ຍັງບໍ່ທັນໄດ້ມີການເຄື່ອນໄຫວຂຸດຄົ້ນຫຍັງເທື່ອ.
ທ່ານ ພອນສິນ ພົມປານດາ ຍັງໃຫ້ຮູ້ຕື່ມວ່າ: ໃນຕອນບ່າຍວັນທີ 1 ເມສານີ້, ທີມງານທີ່ກ່ຽວ ຂ້ອງຂອງແຂວງ ໄດ້ນໍາເອົາເຄື່ອງໄປກວດຄຸນນະພາບຂອງນໍ້າ ຄາດວ່າຈະຮູ້ຜົນລະອຽດໃນໄວໆນີ້, ປັດຈຸບັນ ຫ້ອງການຊັບພະຍາກອນທໍາມະຊາດ ແລະ ສິ່ງແວດ ລ້ອມເມືອງກວັນ ໄດ້ແຈ້ງໄປຫາປະຊາຊົນໃນຂອບເຂດທີ່ມີປາຕາຍ ຫ້າມເອົາປາທີ່ຕາຍໄປບໍລິໂພກ, ລວມເຖິງຫ້າມນໍາໃຊ້ນໍ້າຢູ່ເຂດດັ່ງກ່າວໃນໄລຍະນີ້ ເພື່ອຮັບປະກັນຄວາມປອດໄພ ຈົນກວ່າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ຈະຮູ້ລະອຽດກ່ຽວກັບສາເຫດຂອງປາຕາຍທີ່ເກີດຂຶ້ນຢູ່ 4 ບ້ານຂອງເມືອງກວັນ ໃນຄັ້ງນີ້.
ແຫຼ່ງຂ່າວ: ຂປລ