ເປີດຂະບວນການຈົດທະບຽນການເກີດຜ່ານລະບົບຄຸ້ມຄອງຂໍ້ມູນພົນລະເມືອງ ເອເລັກໂຕຣນິກ eCRVS ຂຶ້ນຢ່າງເປັນທາງການໃນວັນທີ 7 ກຸມພາທີ່ຜ່ານມາ, ທີ່ເມືອງຈໍາປາສັກ, ແຂວງຈໍາປາສັກ, ໂດຍການເປັນປະທານຂອງ ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ມີ ທ່ານ ຮອງລັດຖະມົນຕີກະຊວງພາຍໃນ, ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງຈໍາປາສັກພ້ອມຄະນະຮັບຜິດຊອບຂັ້ນສູນກາງ, ຂັ້ນແຂວງ, ຂັ້ນນະຄອນ, ຂັ້ນເມືອງ, ການຈັດຕັ້ງບ້ານເປົ້າໝາຍ 30 ບ້ານຂອງເມືອງຈໍາປາສັກ ເຂົ້າຮ່ວມ.
ທ່ານ ສາຍທອງ ໄຊຍະວົງ ໄດ້ກ່າວວ່າ: ມີຄວາມພາກພູມໃຈເປັນຢ່າງຍິ່ງທີ່ທາງກະຊວງພາຍໃນໄດ້ເລືອກເອົາແຂວງຈຳປາສັກ,ໂດຍສະເພາະແມ່ນເມືອງຈຳປາສັກ, ເພື່ອເປີດຂະບວນການຈົດທະບຽນການເກີດຜ່ານລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກ eCRVS ໃນຄັ້ງນີ້, ໃນໄລຍະຜ່ານມາການຄຸ້ມຄອງພົນລະເມືອງແມ່ນມີຄວາມຫຍຸ້ງຍາກສັບສົນ, ການເກັບກໍາສະຖິຕິການເໜັງຕີງຂອງພົນລະເມືອງບໍ່ມີຄວາມຊັດເຈນ, ເຮັດໃຫ້ສັງຄົມບໍ່ມີຄວາມສະຫງົບ ແລະ ເປັນລະບຽບຮຽບຮ້ອຍ ເປັນຕົ້ນ: ການຍົກຍ້າຍທີ່ຢູ່ອາໄສຈາກທ້ອງຖິ່ນນີ້ໄປຢູ່ທ້ອງຖິ່ນອື່ນບໍ່ເປັນປົກກະຕິ, ແຕ່ຈໍານວນໜຶ່ງກໍ່ມີເງື່ອນໄຂ ແລະ ດໍາເນີນຕາມຂັ້ນຕອນ, ຖືກຕ້ອງຕາມລະບຽບກົດໝາຍ, ຈໍານວນໜຶ່ງກໍໄປໂດຍບໍ່ຖືກຕ້ອງ ແລະ ສ້າງຄວາມບໍ່ສະຫງົບ ຫຼື ປະກົດການຫຍໍ້ທໍ້ເກີດຂຶ້ນຢູ່ທ້ອງຖິ່ນອື່ນ. ການຈົດທະບຽນຄອບຄົວຕ່າງໆແມ່ນຍັງໃຊ້ລະບົບເຈ້ຍສໍຢູ່ ເຮັດໃຫ້ມີຄວາມຫຍຸ້ງຍາກໃນການບໍລິການຮັບໃຊ້ປະຊາຊົນ ແລະ ການຄຸ້ມຄອງ, ຕິດຕາມກວດກາ.
ການເປີດຂະບວນການຈົດທະບຽນການເກີດຜ່ານລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກ eCRVS ໃນຄັ້ງນີ້ມີຄວາມສໍາຄັນ ແລະ ຈໍາເປັນຫຼາຍທີ່ສຸດສໍາລັບແຂວງຈຳປາສັກເພື່ອຈະຫັນວຽກງານຄຸ້ມຄອງພົນລະເມືອງໄປສູ່ລະບົບທີ່ທັນສະໄໝ ຫຼື ວ່າຍຸກ 4.0; ຜ່ານມາຄະນະພັກ, ອົງການປົກຄອງແຂວງໄດ້ໃຫ້ຄວາມສໍາຄັນຫຼາຍຕໍ່ກັບວຽກງານດັ່ງກ່າວ, ໂດຍໄດ້ກໍານົດເຂົ້າເປັນວຽກງານໜຶ່ງໃນແຜນພັດທະນາເສດຖະກິດ-ສັງຄົມຂອງແຂວງ, ໂດຍສະເພາະແມ່ນວຽກງານຈົດທະບຽນ ແລະ ສະຖິຕິພົນລະເມືອງ ເຊິ່ງໄດ້ກໍານົດຄາດໝາຍສູ້ຊົນຮອດປີ 2025 ຈະສູ້ຊົນໃຫ້ພົນລະເມືອງ ແລະ ເດັກເກີດໃໝ່ໃຫ້ໄດ້ຮັບການຈົດທະບຽນ ແລະ ມີໃບຢັ້ງຢືນການເກີດເປັນທາງການຢ່າງໜ້ອຍໃຫ້ໄດ້ 80% ຂຶ້ນໄປ.
ໃນໂອກາດນີ້, ທ່ານລັດຖະມົນຕີກະຊວງພາຍໃນ ຍັງເຊີນຊວນ ແລະ ຮຽກຮ້ອງມາຍັງພົນລະເມືອງໃນຂອບເຂດທົ່ວປະເທດ, ໂດຍສະເພາະ ປະຊາຊົນຊາວເມືອງຈໍາປາສັກຈົ່ງພ້ອມກັນເຂົ້າຮ່ວມຂະບວນການຈົດທະບຽນການເກີດຜ່ານລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກໃນຄັ້ງນີ້, ເພື່ອມີໃບຢັ້ງຢືນການເກີດທີ່ຈະເປັນເອກະສານຫຼັກຖານສຳຄັນທາງດ້ານກົດໝາຍເພື່ອພິສູດຊື່, ອາຍຸ, ສາຍພົວພັນຄອບຄົວ, ສັນຊາດຂອງພົນລະເມືອງ ແລະ ເປັນຂໍ້ມູນສໍາຄັນເຂົ້າເຖິງການບໍລິການພື້ນຖານຂອງລັດເຊັ່ນ: ການປິ່ນປົວສຸຂະພາບ, ການສຶກສາ, ການປົກປ້ອງທາງສັງຄົມ, ການຄົ້ນຫາຂໍ້ມູນໃນກໍລະນີພັດພາກ, ກຳມະສິດຊັບສິນ, ການສືບທອດມູນມໍຣະດົກ ແລະ ອື່ນໆ.
ຂ່າວ-ພາບ: ກະຊວງພາຍໃນ