ເທດສະການດອກງິ້ວບານ ຄັ້ງທີ XXI ປີ 2024 ຈັດຂຶ້ນຢ່າງເປັນທາງການໃນວັນທີ 26 ມັງກອນ 2024 ທີ່ເຂດເສດຖະກິດພິເສດສາມຫຼ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ, ເປັນກຽດເຂົ້າຮ່ວມຂອງທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ, ທ່ານ ຈ້າວເຫວີຍ ປະທານສະພາບໍລິຫານ ເຂດເສດຖະກິດພິເສດສາມຫຼ່ຽມ, ພ້ອມດ້ວຍບັນດາທ່ານການນໍາພັກ-ລັດຈາກສູນກາງ ທ້ອງຖິ່ນ ອະດີດການນໍາ ແຂກຖືກເຊີນຈາກ ສປ ຈີນ, ຫວຽດນາມ, ໄທ, ມຽນມາ ນັກທຸລະກິດ ແລະ ມວນຊົນເຂົ້າຮ່ວມຢ່າງຫຼວງຫຼາຍ.
ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ ກ່າວວ່າ: ເທສະການດອກງິ້ວບານ ເປັນເຫດການທີ່ມີຄວາມໝາຍສໍາຄັນ ເປັນປາງບຸນໃຫຍ່ທີ່ຊາວແຂວງບໍ່ແກ້ວ ຈັດຕັ້ງປະຕິບັດແຕ່ປີ 2000 ເປັນຕົ້ນມາ ເຊິ່ງປີ 2024 ເປັນຄັ້ງທີ XXI ທັງເປັນປະເພນີທີ່ເປັນເອກະລັກຂອງຊາວແຂວງບໍ່ແກ້ວ ໃນລະດູບານໃໝ່ຂອງທຸກປີຄືງານເທສະ ການດອກງິ້ວບານ ທີ່ປະຊາຊົນບັນດາເຜົ່າຊາວເມືອງຕົ້ນເຜິ້ງ ທີ່ໄດ້ອະນຸຮັກ ປົກປັກຮັກສາຈົນເຖິງປັດຈຸບັນ ແລະ ການປະກອບສ່ວນອັນໃຫຍ່ຫຼວງຂອງເຂດເສດຖະກິດພິເສດສາມຫຼ່ຽມຄໍາ ທີ່ໄດ້ເສີມສ້າງ ແລະ ພັດທະນາຫຼາຍກິດຈະກໍາທີ່ສວຍສົດງົດງາມຢູ່ສະຖານທີ່ດັ່ງກ່າວ.
ທ່ານໄດ້ກ່າວຕື່ມອີກວ່າ: ການຈັດເທສະການດອກງິ້ວບານມີຈຸດປະສົງເພື່ອສົ່ງເສີມ ແລະ ປົກປັກຮັກສາຄວາມເປັນເອກະລັກ ແລະ ຮີດຄອງປະເພນີອັນດີງາມຂອງທ້ອງຖິ່ນ ຂອງຊາດ ເປັນການເປີດກິດຈະກໍາການທ່ອງທ່ຽວລະດັບຊາດ ຕາມທີ່ລັດຖະບານໄດ້ກໍານົດເອົາເທສະການບຸນດອກງິ້ວບານ ເປັນກິດຈະກໍາການທ່ອງທ່ຽວລະດັບຊາດຢູ່ແຂວງບໍ່ແກ້ວ ແນໃສ່ສົ່ງເສີມການທ່ອງ ທ່ຽວທໍາມະຊາດຂອງດອນຊາວ ຕິດພັນກັບການບໍລິການ ແລະ ການທ່ອງທ່ຽວຄົບວົງຈອນຢູ່ເຂດເສດຖະ ກິດພິເສດສາມຫຼ່ຽມຄໍາ ເພື່ອເຊີນຊວນມວນຊົນທຸກແຫ່ງຫົນເຂົ້າມາທ່ຽວຊົມ ເປັນການຊຸກຍູ້-ສົ່ງເສີມການລົງທຶນ ການສົ່ງເສີມງານຕະຫຼາດນັດ ການແລກປ່ຽນສິນຄ້າ ການເສີມຂະຫຍາຍຄວາມສາມັກຄີຮັກແພງຂອງປະຊາຊົນບັນດາເຜົ່າ ເທສະການຄັ້ງນີ້ປະກອບມີກິດຈະກໍາສໍາຄັນຕ່າງໆ ເປັນຕົ້ນການຄັດເລືອກນາງສາວດອກງິ້ວບານ ປະຈໍາປີ 2024 ການຄັດເລືອກນາງສາວທ່ອງທ່ຽວລາວ ປະຈໍາປີ 2024 ການສະ ແດງສິລະປະ-ວັນນະຄະດີຈາກລາວ ສປ ຈີນ ໄທ ແລະ ມຽນມາ ການແຂ່ງຂັນກີລາກ໊ອຟ ຊີງຖ້ວຍລາງ ວັນດອກງິ້ວຄໍາ ຄັ້ງທີ 1 ການວາງສະແດງ ແລະ ຈໍາໜ່າຍສິນຄ້າ ການແຂ່ງກີລາຕີມວຍ ລວມທັງຮີດ ຄອງປະເພນີ ວິຖີການດໍາລົງຊີວິດ 13 ເຜົ່າ ໃນແຂວງບໍ່ແກ້ວ ການສະແດງບິນໂດຣນ ຈູດບັ້ງໄຟດອກ ປ່ອຍໂຄມໄຟ ແລະ ອື່ນໆ ເຊິ່ງເປີດໃຫ້ມວນຊົນພາຍໃນ ແລະ ຕ່າງປະເທດ ເຂົ້າທ່ຽວຊົມເຖິງວັນທີ 28 ມັງກອນ 2024.