ເມື່ອວັນທີ 20 ມັງກອນທີ່ຜ່ານມາ ສຳນັກຂ່າວຕ່າງປະເທດລາຍງານວ່າ: ເກີດເຫດໄຟໃໝ້ທີ່ຫໍພັກໂຮງຮຽນປະຖົມແຫ່ງໜຶ່ງໃນໝູ່ບ້ານຢານຊ່ານຜູ, ມົນທົນເຫີ່ນານ, ປະເທດຈີນ ໃນຄໍ່າຄືນວັນທີ 19 ມັງກອນທີ່ຜ່ານມາ ເຮັດໃຫ້ມີຜູ້ເສຍຊີວິດ 13 ຄົນ ແລະ ມີຜູ້ໄດ້ຮັບບາດເຈັບຕ້ອງຖືກນຳຕົວສົ່ງໂຮງໝໍໂດຍດ່ວນ.

ຕາມການລາຍງານໄດ້ຮູ້ຕື່ມອີກວ່າ: ໂຮງຮຽນດັ່ງກ່າວເປັນໂຮງຮຽນເອກະຊົນທີ່ຮັບລ້ຽງເດັກ ແລະ ນັກຮຽນຊັ້ນປະຖົມ, ເຊິ່ງຫຼັງຈາກເກີດເຫດຂຶ້ນຜູ້ອຳນວຍການໂຮງຮຽນດັ່ງກ່າວໄດ້ຖືກເຈົ້າໜ້າທີ່ຕຳຫຼວດຄຸມຕົວໄປສືບສວນສອບສວນ. ນອກນີ້, ສຳນັກຂ່າວທາງການຂອງປະເທດຈີນຍັງບໍ່ທັນໄດ້ມີການລາຍງານເຖິງສາເຫດທີ່ເຮັດໃຫ້ເຫດການອັນໜ້າເສົ້າໃຈນີ້ເກີດຂຶ້ນເທື່ອ, ເພາະຍັງຢູ່ໃນຂະບວນການສືບສວນສອບສວນຂອງເຈົ້າໜ້າທີ່ທີ່ກ່ຽວຂ້ອງ.