ແຂວງອັດຕະປື ຈະຢຸດຕິຂຸດຄົ້ນຄຳຕົກຂ້ອນໃນທົ່ວແຂວງ ພາຍຫຼັງທີ່ໄລຍະຜ່ານມາການຂຸດຄົ້ນຢູ່ຕາມແຄມສາຍນ້ຳເຊກອງ ເຊກະໜານ ແລະ ຕາມສາຍຫ່ວຍຮ່ອງຕ່າງໆ ໃນຜ່ານມາແມ່ນມີຜົນກະທົບທີ່ຕິດພັນກັບການດຳລົງຊີວິດຂອງປະຊາຊົນຢູ່ບາງທ້ອງຖິ່ນ ແລະ ບາງຈຸດບໍ່ຄ່ອຍຮັບປະກັນຄວາມປອດໄພທາງດ້ານສະພາບແວດລ້ອມ ແລະ ບັນຫາອື່ນໆທີ່ອາດຈະເກີດຂຶ້ນ.
ຕາມແຫຼ່ງຂ່າວຈາກນັກຂ່າວແຂວງອັດຕະປື ໃຫ້ຮູ້ວ່າ: ໃນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ແຂວງອັດຕະປື ຊຸດທີ II ທີ່ໄດ້ໄຂຂຶ້ນໃນວັນທີ 16-18 ມັງກອນ 2024 ທ່ານ ພົນໂທ ວັນທອງ ກອງມະນີ ກຳມະການສູນກາງພັກ ເລຂາພັກແຂວງ ເຈົ້າແຂວງ ອັດຕະປື ໄດ້ລາຍງານໃນແຜນພັດທະນາ ເສດຖະກິດ-ສັງຄົມ ຂອງອົງການປົກຄອງແຂວງ ຕໍ່ຜູ້ແທນກອງປະຊຸມໂດຍໃຫ້ຮູ້ວ່າ: “ອີງຕາມການຕົກ ລົງຂອງຄະນະປະຈຳພັກແຂວງ ນັບແຕ່ປີ 2024 ເປັນຕົ້ນໄປ ແມ່ນຈະໄດ້ຢຸດຕິການຂຸດຄົ້ນຄໍາຕົກຂ້ອນໃນທົ່ວແຂວງ ເຊິ່ງລາຍລະອຽດໄດ້ມອບໃຫ້ພະແນກພະລັງ ງານ ແລະ ບໍ່ແຮ່ແຂວງ ຮ່າງຄຳສັ່ງ ຄາດວ່າ ໃນທິດນີ້ ຈະໄດ້ລົງລາຍເຊັນ ແລ້ວເລີ່ມປະຕິ ບັດເລີຍ”.
ຕໍ່ກັບການຕັດສິນໃຈ ແລະ ການຕົກລົງຂອງຄະນະປະຈຳພັກແຂວງໃນຄັ້ງນີ້ ແມ່ນໄດ້ສ້າງຄວາມປະທັບໃຈ ແລະ ໃຫ້ການສະໜັບສະໜູນຈາກບັນດາສະມາຊິກສະພາປະຊາຊົນແຂວງເປັນຈຳນວນຫຼາຍໂດຍຢຶດໝັ້ນກຳນົດເອົາຫຼັກການນຳພາຂອງພັກ ແລະ ລະບຽບກົດໝາຍຂອງລັດເປັນທີ່ຕັ້ງການລົງທຶນຕ້ອງຮັບປະກັນໄດ້ຕໍ່ໜ້າກົດໜາຍ ແລະ ລະບຽບການຂອງລັດວາງອອກຢ່າງເຄັ່ງຄັດ ເພາະ ວ່າ: ການຢຸດຕິການຂຸດຄົ້ນຄຳຕົກຂ້ອນທີ່ຕັ້ງຈຸດຂຸດຄົ້ນຕາມແຄມສາຍນ້ຳເຊກອງ ເຊກະໜານ ແລະ ຕາມສາຍຫ່ວຍຮ່ອງຕ່າງໆ ໃນຜ່ານມາແມ່ນມີຜົນກະທົບທີ່ຕິດພັນກັບການດຳລົງຊີວິດຂອງປະຊາຊົນຢູ່ບາງທ້ອງຖິ່ນ ແລະ ບາງຈຸດບໍ່ຄ່ອຍຮັບປະກັນຄວາມປອດໄພທາງດ້ານສະພາບແວດລ້ອມ ແລະ ບັນຫາອື່ນໆທີ່ອາດຈະເກີດຂຶ້ນ ແລະ ການຢຸດຕິການຂຸດຄົ້ນແນໃສ່ເພື່ອໃຫ້ເຂັ້ມງວດການປະຕິບັດຄໍາສັ່ງ ເລກທີ 16 ຂອງເຈົ້າແຂວງ ລົງວັນທີ 28 ກັນຍາ 2023 ວ່າດ້ວຍການເພີ່ມທະວີ ຄວາມເຂັ້ມງວດໃນການຄຸ້ມຄອງປົກປັກຮັກສາປ່າໄມ້.