ຫຼໍ່ ແລະ ໃຈບຸນທີ່ສຸດ, ເຟລິກ Straykids ໄດ້ບໍລິຈາກເງິນຊ່ວຍເຫຼືອເດັກໃນລາວ ຈຳນວນ 100 ລ້ານວອນ ຫຼື ປະມານ 1,568,487,300 ກີບ.

ອີງຕາມ ເວັບໄຊ້ຕ່າງປະເທດ ໄດ້ລາຍງານໃຫ້ຮູ້ວ່າ: ເມື່ອວັນທີ 4 ມັງກອນທີ່ຜ່ານມາ, ເຟລິກ ນັກຮ້ອງສະມາຊິກວົງບອຍແບຣນ Straykids ໄດ້ທຳການບໍລິຈາກເງິນຈຳນວນ 100 ລ້ານວອນ ຫຼື ປະມານ 1,568,487,300 ກີບ ໃຫ້ກັບອົງກອນຢູນິເຊັບ ຖືວ່າເປັນສະມາຊິກ ຄົນທຳອິດໃນປີ 2024 ນີ້ທີ່ເຂົ້າຮ່ວມໂຄງການບໍລິຈາກເພື່ອຊ່ວຍເຫຼືອເດັກນ້ອຍໃນ ສປປ ລາວ ທີ່ປະສົບກັບບັນຫາດ້ານສຸຂະພາບອັນ ເນື່ອງມາຈາກຂໍ້ຈຳກັດໃນການເຂົ້າເຖິງນໍ້າສະອາດ ແລະ ໄດ້ຮັບໂພຊະນາການອາຫານທີ່ບໍ່ພຽງພໍ.

ສຳລັບການບໍລິຈາກໃນຄັ້ງນີ້, ເຟລິກ ໄດ້ກ່າວວ່າ: ”ຕົນເອງເຂົ້າຮ່ວມໂຄງການບໍລິຈາກນີ້ກໍເພາະຕ້ອງການແບ່ງປັນຄວາມຮັກທີ່ໄດ້ຮັບ ຈາກແຟນໆ, ຕົນຫວັງວ່າເດັກນ້ອຍຫຼາຍຄົນໃນ ສປປ ລາວທີ່ປະເຊີນກັບຄວາມທຸກຍາກລຳບາກ ທາງໃນການເຂົ້າເຖິງນໍ້າດື່ມທີ່ ສະອາດ ແລະ ບໍ່ໄດ້ຮັບໂພຊະນາການອາຫານຢ່າງພຽງພໍຕາມຄວາມຕ້ອງການ, ຫວັງວ່າເດັກນ້ອຍທຸກຄົນຈະເຕີບໃຫຍ່ຂຶ້ນມາຢ່າງມີສຸຂະພາບແຂງແຮງພ້ອມກັບສະພາບແວດລ້ອມທີ່ເອື້ອອຳນວຍຍິ່ງຂຶ້ນໃນອະນາຄົດ”.

ກ່ອນໜ້ານີ້, ໃນເດືອນມີນາ 2023, ເຟລິກໄດ້ຮັບການແຕ່ງຕັ້ງໃຫ້ເປັນສະມາຊິກຂອງອົງກອນ Save the Children ເພາະເປັນບຸກຄົນໜຶ່ງທີ່ທຳການບໍລິຈາກເງິນເພື່ອຊ່ວຍເຫຼືອອົງກອນເປັນປະຈຳ, ເຊິ່ງລາວໄດ້ເລີ່ມທຳການບໍລິຈາກເງິນໃຫ້ກັບ ອົງກອນ Save the Children ຕັ້ງແຕ່ປີ 2020 ເປັນຕົ້ນມາ.