ອີງຕາມສຳນັກຂ່າວຕ່າງປະເທດລາຍງານ ເຫດການເກີດແຜ່ນດິນໄຫວຂະໜາດ 7.6 ແມັກນິຈູດ ຢູ່ແຂວງອິຊິຄາວະ ປະເທດຍີ່ປຸ່ນໃນຊ່ວງບ່າຍວັນທີ 1 ມັງກອນ 2024 ທີ່ຜ່ານມາ, ເຮັດໃຫ້ຄວາມເສຍຫາຍຂະຫຍາຍເປັນວົງກວ້າງບ້ານເຮືອນຫຼາຍກວ່າ 30,000 ຫຼັງເສຍຫາຍ ແລະ ມີຜ้ູເສຍຊີວິດທັງໝົດ 13 ຄົນ.

ຈາກເຫດການດັ່ງກ່າວທາງການຍີ່ປຸ່ນໄດ້ປະກາດເຕືອນໄພ ສຶນາມິ ລະດັບສີເຫຼືອງໃນຫຼາຍແຂວງໄດ້ແກ່: ອິຊິກາວະ, ໂທຍາມະ, ນີງາຕະ, ຍາມາງາຕະ, ຟຸກຸອິ, ກຽວໂຕ, ຣຽວໂງະ, ທາຕະໂທຣິ, ຊິມາເນະ, ອາກິຕະ, ອາໂອໂມຣິ ແລະ ຣອກໄກໂດ.

ຫຼ້າສຸດ ສະຖານເອກອັກຄະລັດຖະທູດ ທີ່ກຸງໂຕກຽວ ປະເທດຍີ່ປຸ່ນໄດ້ແຈ້ງວ່າເມື່ອເວລາ 10:01 ນາທີ ຂອງວັນທີ 2 ມັງກອນ 2024 ຕາມເວລາຍີ່ປຸ່ນເຊິ່ງໄວກວ່າເວລາທີ່ລາວ 2 ຊົ່ວໂມງ ທາງກົມອຸຕຸນິຍົມວິທະຍາຍີ່ປຸ່ນໄດ້ຍົກເລີກປະກາດການເຝົ້າລະວັງການເກີດຄື້ນສຶນາມິໃນທຸກພື້ນທີ່ແລ້ວ.

ຢາງໃດກໍຕາມອາດມີການປ່ຽນແປງຂອງລະດັບນ້ຳທະເລຢ່າງຕໍເນື່ອງ ທາງການຍີ່ປຸ່ນຈຶງປະກາດເຕືອນໃຫ້ຊາວປະມົງໃຫ້ລະມັດລະວັງໃນການອອກເຮືອ, ລວມທັງໃນອາທິດນີ້ໂດຍສະເພາະ 2-3 ມື້ຂ້າງໜ້າ ກົມອຸຕຸນິຍົມວິທະຍາປະເທດຍີ່ປຸ່ນໃຫ້ເຜົ້າລະວັງເຫດແຜ່ນດິນໄຫວທີ່ຍັງຈະຕາມມາເປັນໄລຍະ (aftershocks)