ທ່ານ ອາລຸນແກ້ວ ກິດຕິຄຸນ ອະດີດລັດຖະມົນຕີປະຈຳສໍານັກງານນາຍົກລັດຖະມົນຕີ ໄດ້ຮັບຫຼຽນກຽດຕິຄຸນ ອາທິດອຸໄທ ດາວຄໍາ ແລະ ດາວເງິນ (ຊັ້ນ 2) ຊຶ່ງຖືເປັນລາງວັນກຽດຕິຍົດສູງສຸດຢ່າງໜຶ່ງຂອງພົນລະເຮືອນຍີ່ປຸ່ນ, ສະຖານທູດຍີ່ປຸ່ນ ປະຈໍາ ລາວ ໄດ້ຈັດພິທີດັ່ງກ່າວຂຶ້ນ ໃນວັນທີ 22 ທັນວາ ທີ່ເຮືອນພັກ ທູດຍີ່ປຸ່ນ ປະຈໍາ ສປປ ລາວ ໂດຍມີ ທ່ານ ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະ ກິລາ, ປະທານ ສະມາຄົມມິດຕະພາບລາວ-ຍີ່ປຸ່ນ, ທ່ານ ໂຄບະຢະຊີ ເຄັນອີຈີ, ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ, ແຂກຖືກເຊີນ ເຂົ້າຮ່ວມ.
ໃນພິທີ, ທ່ານ ໂຄບະຢະຊີ ເຄັນອີຈີ ຕາງໜ້າໃຫ້ລັດຖະບານຍີ່ປຸ່ນມອບຫຼຽນດັ່ງກ່າວ ພ້ອມທັງສະແດງຄວາມຍິນດີກັບ ທ່ານ ອາລຸນແກ້ວ ກິດຕິຄຸນ ແລະ ໄດ້ສະແດງຄວາມຂອບອົກຂອບໃຈຕໍ່ກັບການປະກອບສ່ວນທີ່ພົ້ນເດັ່ນ ໃນການຊຸກຍູ້ເສີມຂະຫຍາຍສາຍພົວພັນສອງຝ່າຍ ແລະ ສົ່ງເສີມມິດຕະພາບລະຫວ່າງຍີ່ປຸ່ນ ແລະ ສປປ ລາວ ຕະຫຼອດມາ.
ຫຼັງຈາກປະຕິບັດໜ້າທີ່ເປັນນັກການທູດປະຈຳສະຫະປະຊາຊາດເປັນເວລາຍາວນານ. ທ່ານ ອາລຸນແກ້ວ ກິດຕິຄຸນ ໄດ້ດໍາລົງຕຳແໜ່ງເປັນຜູ້ຊ່ວຍ ທ່ານ ທອງລຸນ ສີສຸລິດ, ຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດ (ໃນເວລານັ້ນ), ນັບແຕ່ປີ 2007 ເຖິງ 2011. ພາຍໃຕ້ການຊີ້ນໍາຂອງທ່ານ ທອງລຸນ ສີສຸລິດ, ທ່ານ ອາລຸນແກ້ວ ໄດ້ພະຍາຍາມຢ່າງສຸດຄວາມສາມາດ ໃນການຄຸ້ມຄອງການປະສານງານ ລະຫວ່າງກົມກອງທີ່ກ່ຽວຂ້ອງພາຍໃນປະເທດ ເພື່ອໃຫ້ຂອບການຮ່ວມມືຫຼາຍດ້ານ ທີ່ເປັນສັນຍາລັກຂອງສາຍພົວພັນສອງປະເທດ ເຊັ່ນ: ການຍົກເວັ້ນວີຊາສໍາລັບຄົນຍີ່ປຸ່ນ ແລະ ຂໍ້ຕົກລົງວ່າດ້ວຍການລົງທຶນຍີ່ປຸ່ນ-ລາວ ການຈັດຕັ້ງປະຕິບັດເຫຼົ່ານີ້ໄດ້ເກີດດອກອອກຜົນ ເຮັດໃຫ້ການໄປມາ ຫາສູ່ກັນຂອງປະຊາຊົນສອງປະເທດເພີ່ມຂຶ້ນ, ໃນຂະນະທີ່ນັກທ່ອງທ່ຽວຍີ່ປຸ່ນກໍມາທ່ອງທ່ຽວ ລາວຫຼາຍຂຶ້ນ, ສ່ວນບໍລິສັດຂອງຍີ່ປຸ່ນກໍມາລົງທຶນຢູ່ ສປປ ລາວ ເພີ່ມຂຶ້ນ.
ນັບແຕ່ປີ 2011 ເຖິງ 2016, ໃນຖານະຮອງລັດຖະມົນຕີກະຊວງການຕ່າງປະເທດທີ່ຮັບຜິດຊອບການພົວພັນສອງຝ່າຍລາວ-ຍີ່ປຸ່ນ, ທ່ານ ອາລຸນແກ້ວ ກິດຕິຄຸນ ໄດ້ສະໜັບສະໜູນໃຫ້ມີການໄປມາຫາສູ່ຢ່າງຟົດຟື້ນ ລະຫວ່າງການນໍາຂັ້ນສູງຂອງສອງປະເທດ. ນອກຈາກນັ້ນ, ໃນໄລຍະເວລາທີ່ ສປປ ລາວ ເປັນເຈົ້າພາບຈັດກອງປະຊຸມອາຊຽນ ເທື່ອກ່ອນໃນປີ 2016. ໃນຖານະປະທານກອງປະຊຸມເຈົ້າໜ້າທີ່ອາວຸໂສອາຊຽນ (SOM) ຂອງລາວ, ທ່ານໄດ້ສັງລວມຮ່າງຖະແຫຼງການຂອງຜູ້ນໍາທີ່ກ່ຽວຂ້ອງກັບອາຊຽນ ດ້ວຍທັກສະດ້ານການທູດສູງ ແລະ ຄວາມເຂົ້າໃຈຢ່າງເລິກເຊິ່ງ ກ່ຽວກັບຍີ່ປຸ່ນ, ພ້ອມນັ້ນທ່ານຍັງໄດ້ປະກອບສ່ວນເຂົ້າໃນການເສີມຂະຫຍາຍສາຍພົວພັນລະຫວ່າງສອງປະເທດ ແລະ ການຮ່ວມມືລະຫວ່າງຍີ່ປຸ່ນ-ອາຊຽນ. ນອກຈາກນີ້ ຍັງມີຜົນງານອື່ນໆອີກ.
ທີ່ມາ: ປະຊາຊົນ