ໂຄງການກໍ່ສ້າງສະໜາມບິນໜອງຄ້າງ ເມືອງຊຳເໜືອ ແຂວງຫົວພັນ ທີ່ມີມູນຄ່າການກໍ່ສ້າງທັງໝົດເກືອບ 6 ຮ້ອຍ
ຕື້ກີບ ພາຍຫຼັງລົງມືກໍ່ສ້າງມາແຕ່ເດືອນຕຸລາ 2013 ຮອດຂະນະນີ້ມີຄວາມຄືບໜ້າ 16% ຄາດຈະໃຫ້ສຳເລັດທ້າຍປີໜ້າ.
ໃນລະຫວ່າງວັນທີ 6-7 ທັນວາ 2014 ຜ່ານມານີ້ທ່ານ ທອງສິງ ທຳມະວົງ ນາຍົກລັດຖະມົນຕີໄດ້ເຄື່ອນໄຫວຢ້ຽມຢາມ
ແລະ ເຮັດວຽກຢູ່ແຂວງຫົວພັນຢ່າງເປັນທາງການ ໂອກາດນີ້ທ່ານໄດ້ລົງກວດກາຄວາມຄືບໜ້າຂອງໂຄງການກໍ່ສ້າງ
ສະໜາມບິນໜອງຄ້າງ ເມືອງຊຳເໜືອ ໂດຍທ່ານ ວັນເພັງ ຈັນທະພອນ ຮອງຫົວໜ້າກົມການບິນພົນລະເຮືອນໃນ
ນາມເຈົ້າຂອງໂຄງການ ທັງຕາງໜ້າໃຫ້ບໍລິສັດຜູ້ຮັບເໝົາກໍ່ສ້າງ ໄດ້ລາຍງານສະພາບໂດຍຫຍໍ້ ການກໍ່ສ້າງໃຫ້ທ່ານ
ນາຍົກໄດ້ຮັບຊາບວ່າ: ໂຄງການໄດ້ເລີ່ມລົງມືກໍ່ສ້າງມາແຕ່ເດືອນຕຸລາ 2013 ໂດຍແມ່ນບໍລິສັດຫຸ້ນສ່ວນຮວາງແອັງ
ຢາລາຍເປັນຜູ້ຮັບເໝົາກໍ່ສ້າງ ໃນມູນຄ່າ 74.006.320 ໂດລາສະຫະລັດ ຫຼື ປະມານ 592,05 ຕື້ກວ່າກີບ.
ໃນນີ້ ຈະໄດ້ກໍ່ສ້າງສະໜາມບິນ (ທາງແລ່ນຂອງຍົນ) ຍາວ 2,5 ພັນແມັດ, ກວ້າງ 36 ແມັດ, ກໍ່ສ້າງເຮືອນບໍລິການ 1
ຫຼັງເປັນອາຄານ 2 ຊັ້ນ, ສ້າງເຮືອນລົດ 2 ຫຼັງ, ຫໍຄອຍ 1 ຫຼັງ, ທາງຊອຍ, ບ່ອນຈອດລົດ ແລະ ກິດຈະກຳຍ່ອຍອື່ນໆອີກ
ຈຳນວນໜຶ່ງ, ມາຮອດປະຈຸບັນກໍ່ສ້າງສຳເລັດແລ້ວ 16% ຂອງໜ້າວຽກທັງໝົດເມື່ອທຽບໃສ່ແຜນການທີ່ວາງໄວ້
ຮອດເດືອນພະຈິກ ປີ 2014 ໃຫ້ປະຕິບັດໄດ້ 33% ແຕ່ພາກປະຕິບັດຕົວຈິງແມ່ນຊ້າກວ່າແຜນການ 17% ແລະ ຄາດ
ວ່າໃນເດືອນຕຸລາ 2015 ຈະໃຫ້ສຳເລັດ.
ໂດຍທີ່ຕັ້ງໂຄງການ ແມ່ນຢູ່ຫ່າງຈາກເທສະບານແຂວງປະມານ 32 ກິໂລແມັດ ຊຶ່ງມີເນື້ອທີ່ທັງໝົດ 165 ເຮັກຕາ ທີ່
ກໍ່ສ້າງຕາມມາດຕະຖານສາກົນ ICAO ລະຫັດສະໜາມບິນ 3C ຖ້າຫາກສຳເລັດຈະສາມາດຮອງຮັບເຮືອບິນຂະໜາດ
70-100 ບ່ອນນັ່ງເປັນຕົ້ນ ແມ່ນ ATR 72, Fokker 70 ຫຼື ທຽບເທົ່າ.
ແນວໃດກໍດີ ແຫຼ່ງຂ່າວແຈ້ງອີກວ່າ: ການມາຢ້ຽມຢາມ ແລະ ເຮັດວຽກຂອງທ່ານນາຍົກລັດຖະມົນຕີ ພ້ອມດ້ວຍຄະ
ນະ ແລະ ຜູ້ແທນຂັ້ນສູງແຂວງຫົວພັນ ຍັງໄດ້ເດີນທາງລົງກວດກາບັນດາໂຄງການພັດທະນາບາງໂຄງການຢູ່ ເມືອງ
ວຽງໄຊຄື: ໂຄງການກໍ່ສ້າງປ້ຳນ້ຳມັນບ້ານນາແທ່ນ, ຫໍພິພິທະພັນປະຫວັດສາດ, ໂຮງຮຽນພາສາຫວຽດນາມ ແລະ
ໂຄງການກໍ່ສ້າງຖ້ຳຜາແດງ, ໂອກາດດຽວກັນນີ້ທ່ານຍັງໄດ້ເຂົ້າຮ່ວມວາງພວງມາລາຢູ່ອານຸສອນສະຖານປະທານ ໄກ
ສອນ ພົມວິຫານ ຕື່ມອີກ ແລະ ໄດ້ເດີນທາງກັບໃນຕອນແລງວັນດຽວກັນ.
ແຫລ່ງຂ່າວ: ເສດຖະກິດ – ສັງຄົມ