ລັດຖະບານ ໄດ້ກູ້ຢືມທຶນ 15 ລ້ານໂດລາ ຈາກທະນາຄານພັດທະນາອາຊີ (ADB), OPEC Fund, EIB, EU-AIF ແລະ GEF ເພື່ອກໍ່ສ້າງເສັ້ນທາງລົດເມ ແລະ ສະຖານີ BRT ຢູ່ນະຄອນຫຼວງວຽງຈັນ (ນວ) ຄາດວ່າຈະໃຫ້ສໍາເລັດພາຍໃນຕົ້ນປີ 2024 ຊຶ່ງເສັ້ນທາງດັ່ງກ່າວ ເລີ່ມແຕ່ສວນເຈົ້າຟ້າງຸ່ມ ຫາ ປະຕູໄຊ ຫາ ມະຫາວິທະຍາໄລແຫ່ງຊາດ.
ທ່ານ ຄຳພັນ ວັນທະນາ ຫົວໜ້າໂຄງການຂົນສົ່ງຍືນຍົງຕົວເມືອງ ນວ ໄດ້ລາຍງານຫຍໍ້ກ່ຽວກັບໂຄງການ ວ່າ: ໜ້າວຽກຕົ້ນຕໍໃນສັນຍາມີຄື ກໍ່ສ້າງຊ່ອງຈະລາຈອນລົດເມ BRT ດ້ວຍອາສຟານຄອນກຣີດປະສົມສີ, ກໍ່ສ້າງຊ່ອງຈະລາຈອນສຳລັບການສັນຈອນທົ່ວໄປ ແລະ ທາງຍ່າງທັງສອງເບື້ອງ ລວມໄລຍະທາງປະມານ 13 ກິໂລແມັດ, ໜ້າທາງມີຄວາມກວ້າງ ລະຫວ່າງ 12 ແມັດ ຫາ 25 ແມັດ ຕິດຕັ້ງໂຄງສ້າງເຫຼັກສະຖານີ BRT ທັງໝົດ 27 ຈຸດ; ໃນນີ້, ຕິດຕັ້ງຢູ່ແຄມທາງ 5 ຈຸດ ແລະ ກາງທາງອີກ 22 ຈຸດ.
ນອກນັ້ນ, ກໍ່ສ້າງຈຸດຈອດລົດເມ ຢູ່ນອກເຂດສະເພາະ BRT 46 ຈຸດ, ສ້າງສະຖານີໃຫຍ່ ຢູ່ຖະໜົນເສດຖາທິຣາດ ໄລຍະ 600 ແມັດ (ແຍກວັດອິນແປງ ຫາ ຮ້ານອາຫານຂອບໃຈເດີ). ເຊິ່ງໄລຍະນີ້, ຈະວາງສາຍໄຟຟ້າ, ສາຍສື່ສານລົງພື້ນດິນ ພ້ອມລະບົບລະບາຍນໍ້າ, ສາຍໃຍແກ້ວ, ຕິດຕັ້ງປ້າຍ ແລະ ເຄື່ອງໝາຍຈະລາຈອນ, ເຊິ່ງການກໍ່ສ້າງຈະໃຊ້ເວລາທັງໝົດ 12 ເດືອນ.
ໂຄງການ ຈະພະຍາຍາມເຮັດວຽກໃຫ້ສໍາເລັດໃນເດືອນກໍລະກົດ 2024. ປັດຈຸບັນ, ກົມຂົນສົ່ງ ຍັງພວມປະມູນອີກ 1 ສັນຍາ ຄື: ກໍ່ສ້າງ ແລະ ຕິດຕັ້ງໄຟສັນຍາຈະລາຈອນ ເຊິ່ງມີຄວາມຄືບໜ້າ ຄາດວ່າຈະໄດ້ເຊັນສັນຍາໃນເດືອນທັນວາ 2023.
ແຫຼ່ງຂ່າວ: ຄວາມສະຫງົບ
ພາບ: ລົດເມນະຄອນຫຼວງວຽງຈັນ