ແຫລ່ງຂ່າວຈາກ ແຂວງໄຊສົມບູນ ໃຫ້ຮູ້ວ່າ: ທ່ານ ສຸກສະຫວາດ ວົງພູມເຫລັກ ຮອງເຈົ້າແຂວງໄຊສົມບູນ ໄດ້ລາຍງານໃນກອງປະຊຸມ ສ່ອງແສງລັດຖະບານ ປະຈຳເດືອນ ພະຈິກ 2023 ທີ່ໄດ້ຈັດຂຶ້ນໃນວັນທີ 15 ພະຈິກ 2023ຜ່ານມານີ້ ໂດຍຜ່ານວິດີໂອທາງໄກວ່າ: ໃນໄລຍະໜຶ່ງເດືອນຜ່ານມາ ການຈັດເກັບລາຍຮັບເຂົ້າງົບປະມານ ຂອງແຂວງໄຊສົມບູນ ສາມາດປະຕິບັດໄດ້ 15,8 ຕື້ກີບ, ການຄຸ້ມຄອງລາຍຈ່າຍງົບປະມານ ປະຕິບັດໄດ້ 74,32 ຕື້ກີບ ໃນນີ້ສາມາດດຶງດູດນັກທ່ອງທ່ຽວ ເຂົ້າມາທ່ຽວຊົມ ແຂວງໄຊສົມບູນ ໄດ້ທັງໝົດ 2.325 ເທື່ອຄົນ, ຍິງ 570 ເທື່ອຄົນ, ພາຍໃນ 1.375 ເທື່ອຄົນ, ຍິງ 225 ເທື່ອຄົນ, ຕ່າງປະເທດ 950 ເທື່ອຄົນ, ຍິງ 125 ເທື່ອຄົນ.
ໂອກາດດຽວກັນນີ້, ທ່ານ ຮອງເຈົ້າແຂວງໄຊສົມບູນ ຍັງໄດ້ສະເໜີຂໍການພິຈາລະນາ ໃຫ້ລັດຖະບານຊ່ວຍແກ້ໄຂບາງບັນຫາ ໂດຍສະເພາະ ເລື່ອງການສະໜອງທຶນ 50 ຕື້ ໃຫ້ກອງທຶນພັດທະນາ ແຂວງໄຊສົມບູນ, ພ້ອມທັງເລື່ອງທຶນກະຕຸ້ນເສດຖະກິດ ຕາມແຈ້ງການຂອງນາຍົກ ເລກທີ 93/ນຍ, ສະເໜີໃຫ້ທະນາຄານກາງແກ້ໄຂທຶນກະຕຸ້ນເສດຖະກິດ ໃຫ້ກອງທຶນພັດທະນາ ແຂວງໄຊສົມບູນ ແລະ ບັນຫາອື່ນໆ ຕື່ມອີກ.
ທີ່ມາ: ປະເທດລາວ, ຂໍຂອບໃຈຮູບພາບ: ກິນເກັງ-kingeng