spot_img
Homeຂ່າວພາຍ​ໃນສສຊ ສະເໜີໃຫ້ປັບປຸງກົງຈັກການຈັດຕັ້ງຂອງຂະແໜງຈັດຕັ້ງປະຕິບັດຄໍາຕັດສິນຂອງສານ

ສສຊ ສະເໜີໃຫ້ປັບປຸງກົງຈັກການຈັດຕັ້ງຂອງຂະແໜງຈັດຕັ້ງປະຕິບັດຄໍາຕັດສິນຂອງສານ

Published on

ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ໄດ້ຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດ (ສສຊ) ກ່ຽວກັບວຽກງານການປະຕິບັດຄໍາຕັດສິນຂອງສານ ໃນກອງປະຊຸມສະໄໝສາມັນ ເທື່ອທີ 6 ສະພາແຫ່ງຊາດ ຊຸດທີ IX ໃນວັນທີ 9 ພະຈິກ ນີ້ ພາຍໃຕ້ການເປັນປະທານຂອງ ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ.

ທ່ານ ໄພວີ ສີບົວລິພາ ໄດ້ຊີ້ແຈງ ຕາມທີ່ຄະນະເລຂາທິການສະພາແຫ່ງຊາດໄດ້ແຈ້ງ ສັງລວມແລ້ວປະກອບມີ 2 ບັນຫາ ຄື:

1. ການປັບປຸງກົງຈັກການຈັດຕັ້ງ ຂອງຂະແໜງຈັດຕັ້ງປະຕິບັດຄໍາຕັດສິນຂອງສານ ຕາມກົດໝາຍວ່າດ້ວຍການປະຕິບັດຄໍາຕັດສິນຂອງສານ ສະບັບປັບປຸງປີ 2021 ໄດ້ຈັດຕັ້ງປະຕິບັດມີຜົນສໍາເລັດ ມີຂໍ້ສະດວກ, ຂໍ້ຫຍຸ້ງຍາກ ຄືແນວໃດ ແລະ ຈະມີທິດທາງປັບປຸງ ແກ້ໄຂຄືແນວໃດ.

  1. ປັດຈຸບັນມີຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດຍັງບໍ່ທັນໄດ້ຮັບການຈັດຕັ້ງປະຕິບັດສໍາເລັດກວມເຖິງ 50.000 ກວ່າເລື່ອງ ຕໍ່ບັນຫາດັ່ງກ່າວ ກະຊວງຍຸຕິທຳ ໃນຖານະເປັນອົງການຄຸ້ມຄອງການຈັດຕັ້ງປະຕິບັດຄໍາຕັດສິນຂອງສານ ຈະມີມາດຕະການ ແລະ ວິທີການແກ້ໄຂແນວໃດ.

ທ່ານລັດຖະມົນຕີ ໄດ້ຊີ້ແຈງວ່າ: ກ່ຽວກັບການປັບປຸງກົງຈັກການຈັດຕັ້ງພາຍຫຼັງທີ່ກົດໝາຍວ່າດ້ວຍການປະຕິບັດຄໍາຕັດສິນຂອງສານ (ສະບັບປັບປຸງ) ໄດ້ຖືກຮັບຮອງ ແລະ ປະກາດໃຊ້ຢ່າງເປັນທາງການແລ້ວກະຊວງຍຸຕິທໍາໄດ້ປັບປຸງກົງຈັກການຈັດຕັ້ງຂອງອົງການປະຕິບັດຄໍາຕັດສິນຂອງສານ, ໄດ້ປະສານສົມທົບກັບກະຊວງພາຍໃນ, ກະຊວງການເງິນ, ອົງການປົກຄອງທ້ອງຖິ່ນ, ພະແນກຍຸຕິທໍາແຂວງ, ນະຄອນຫຼວງ, ຫ້ອງການຍຸຕິທໍາເມືອງ, ນະຄອນ ປຶກສາຫາລື, ເກັບກຳຂໍ້ມູນ ເປັນຕົ້ນບຸກຄະລາກອນ, ພື້ນຖານໂຄງລ່າງ ແລະ ອື່ນໆ; ກະຊວງຍຸຕິທໍາ ສ້າງຕັ້ງອົງການປະຕິບັດຄໍາຕັດສິນຂອງສານ 5 ກອງ 11 ຫ້ອງ ປະຈຳຢູ່ 5  ແຂວງ  ແລະ ເມືອງ ຄື:ຢູ່ນະຄອນຫຼວງວຽງຈັນ ມີ 1 ກອງ, 2 ຫ້ອງ, ແຂວງຫຼວງພະບາງ ມີ 1 ກອງ, 2 ຫ້ອງ, ແຂວງວຽງຈັນ ມີ 1 ກອງ, 2 ຫ້ອງ, ແຂວງສະຫວັນນະເຂດ ມີ 1 ກອງ, 3 ຫ້ອງ ແລະ ແຂວງຈໍາປາສັກ ມີ 1 ກອງ, 2 ຫ້ອງ.

ເພື່ອຍົກສູງຄຸນນະພາບຂອງພະນັກງານປະຕິບັດຄຳຕັດສິນຂອງສານ ກະຊວງຍຸຕິທຳ ມີວິທີການ ແລະ ມາດຕະການ ດັ່ງນີ້: ເອົາໃຈໃສ່ກໍ່ສ້າງພະນັກງານປະຕິບັດຄໍາຕັດສິນຂອງສານທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ. ສ້າງພະນັກງານປະຕິບັດຄໍາຕັດສິນ ໃຫ້ເປັນມືອາຊີບ, ບໍລິການສັງຄົມດ້ວຍຄວາມວ່ອງໄວ, ໂປ່ງໃສ, ຖືກຕ້ອງ ແລະ ຍຸຕິທຳ. ຍົກສູງຄວາມຮັບຮູ້ ແລະ ເຂົ້າໃຈ ຂອງພະນັກງານປະຕິບັດຄໍາຕັດສິນ ຕໍ່ກັບແບບແຜນວິທີເຮັດວຽກ ຕາມພາລະບົດບາດໃໝ່ ແລະ ກົດໝາຍ ສະບັບປັບປຸງ, ສ້າງຕຳລາ ແລະ ດຳເນີນການຝຶກອົບຮົມວຽກງານປະຕິບັດຄໍາຕັດສິນຂອງສານໃຫ້ສອດຄ່ອງຕາມກົດໝາຍສະບັບປັບປຸງ, ເພີ່ມທະວີການຕິດຕາມ, ກວດກາ ແລະ ຊຸກຍູ້ການປະຕິບັດໜ້າທີ່ຂອງພະນັກງານປະຕິບັດຄໍາຕັດສິນຂອງສານ, ເດັດຂາດແກ້ໄຂພະນັກງານຜູ້ທີ່ຂາດຈັນຍາບັນ, ຈັນຍາທຳ, ຂາດຄວາມສາມາດໃນໜ້າທີ່ວຽກງານ, ສ້າງ ແລະ ຕອບສະໜອງ ເງື່ອນໄຂອຳນວຍຄວາມສະດວກໃຫ້ແກ່ການເຄື່ອນໄຫວວຽກງານປະຕິບັດຄໍາຕັດສິນຂອງສານ ມາດຕະການ ແລະ ວິທີການແກ້ໄຂ ຄຳຕັດສິນ ເພື່ອຮັບປະກັນໃຫ້ຄໍາຕັດສິນ ແລະ ຄຳພິພາກສາຂອງສານ ທີ່ໃຊ້ໄດ້ຢ່າງເດັດຂາດຊຶ່ງບໍ່ໄດ້ຮ້ອງຂໍຄວາມເປັນທຳ ຫຼື ຂໍຮື້ຟື້ນຄືນໃໝ່ ໄດ້ຮັບການຈັດຕັ້ງປະຕິບັດສຳເລັດຕາມກົດໝາຍ ກະຊວງຍຸຕິທຳ ມີວິທີການ ແລະ ມາດຕະການດັ່ງນີ້: ປະເມີນການປະຕິບັດຄຳແນະນຳຂອງລັດຖະມົນຕີ ສະບັບເລກທີ 204/ກຍ, ລົງວັນທີ 2 ກຸມພາ 2023 ກ່ຽວກັບການຈັດຕັ້ງປະຕິບັດມະຕິຂອງກອງປະຊຸມສະພາແຫ່ງຊາດ ສະບັບເລກທີ 080/ສພຊ, ລົງວັນທີ 17 ພະຈິກ 2017.

ປະເມີນຄືນການຈັດຕັ້ງປະຕິບັດຄໍາແນະນໍາ 5 ສະບັບ ກ່ຽວກັບການປະຕິບັດຄໍາຕັດສິນຂອງສານຂອງກະຊວງຍຸຕິທໍາ, ຊີ້ນໍາອົງການປະຕິບັດຄໍາຕັດສິນຈັດຕັ້ງປະຕິບັດບັນດານິຕິກຳ ແລະ ກົດໝາຍສະບັບປັບປຸງຢ່າງເຂັ້ມງວດ, ກວດກາສຳນວນຄໍາຕັດສິນແຕ່ລະຄະດີທີ່ຢູ່ໃນຄວາມຮັບຜິດ ຊອບຂອງພະນັກງານແຕ່ລະຄົນ ເພື່ອຊອກຮູ້ສາເຫດ ແລະ ຊີ້ນຳໃຫ້ນໍາອອກມາຈັດຕັ້ງປະຕິບັດໃຫ້ສໍາເລັດ, ກົມ, ກອງ, ຫ້ອງ, ຂະແໜງ ແລະ ໜ່ວຍງານ ຕ້ອງມີແຜນການກໍານົດໂຕເລກຄາດໝາຍໃນການປະຕິບັດໃຫ້ສຳເລັດແຕ່ລະເດືອນ ບົນພື້ນຖານທີ່ກໍານົດໃນມະຕິ 080/ສພຊ, ລົງວັນທີ 17 ພະຈິກ 2017, ສັງລວມບັນຊີ ແລະ ຮີບໂຮມຊັບສິນທີ່ສານຕັດສິນຮິບເປັນຂອງລັດ ແລ້ວມອບໃຫ້ພາກສ່ວນກ່ຽວຂ້ອງ, ເຂັ້ມງວດ ແລະ ເດັດຂາດໃນການນໍາໃຊ້ມາດຕະການຕໍ່ຜູ້ທີ່ມີເງື່ອນໄຂແຕ່ບໍ່ຍອມປະຕິບັດຄໍາຕັດສິນຂອງສານ, ຄຳຕັດສິນທີ່ບໍ່ມີເງື່ອນໄຂປະຕິບັດຈະໄດ້ອອກຄຳສັ່ງໂຈະການປະຕິບັດ (ມາດຕາ 43), ເມື່ອໝົດກໍານົດເວລາໃນການໂຈະຈະໄດ້ສະເໜີໃຫ້ໄອຍະການຖະແຫຼງໃຫ້ສານປະຊາຊົນ ຕັດສິນຍົກເລີກຄ່າອາກອນ, ຄ່າປັບໃໝ ແລະ ເງິນຮີບ (ມາດຕາ 73, 74 ແລະ 75 ຂອງກົດໝາຍ ວ່າດ້ວຍການປະຕິບັດຄໍາຕັດສິນຂອງສານ), ສົມທົບກັບກະຊວງປ້ອງກັນຄວາມສະຫງົບ ເກັບກຳບັນຊີລາຍຊື່ນັກໂທດ ທີ່ຍ້າຍໄປປະຕິບັດໂທດຢູ່ຄ້າຍຄຸມຂັງໃໝ່ເພື່ອມອບໝາຍໃຫ້ອົງການປະຕິບັດຄໍາຕັດສິນທີ່ມີຄວາມສະດວກປະຕິບັດແທນ, ສົມທົບກັບປະຊາຊົນທີ່ກ່ຽວຂ້ອງເພື່ອຄວາມເປັນເອກະພາບໃນການປະຕິບັດຄຳຕັດສິນບາງກໍລະນີ, ສົມທົບກັບອົງການໄອຍະການປະຊາຊົນສູງສຸດ ກ່ຽວກັບການນຳໃຊ້ມາດຕະການຕໍ່ຜູ້ປະຕິບັດຄຳຕົກລົງຂອງສານ ແລະ ຜູ້ຂັດຂວາງການຈັດຕັ້ງປະຕິບັດຄຳຕັດສິນຂອງສານ (ມ 389.396 ປະມວນອາຍາ) ແລະ ສຳລັບຄຳຕັດສິນຄະດີອາຍາໃນກໍລະນີທີ່ຜູ້ຖືກປະຕິບັດຄຳຕັດສິນ ມີເງື່ອນໄຂປຽນໂທດ ປັບໃໝເປັນໂທດອື່ນ ຈະໄດ້ສະເໜີໃຫ້ພາກສ່ວນທີ່ກ່ຽວຂ້ອງ ພິຈາລະນາ (ມາດຕາ 46 ແລະ 59 ຂອງສານປະມວນກົດໝາຍ).

ທີ່ມາ ປະຊາຊົນ

ບົດຄວາມຫຼ້າສຸດ

ງົດງາມທີ່ສຸດຈາກທົ່ວໂລກ ຕາດກວາງຊີ ແຂວງຫຼວງພະບາງ ຖືຈັດຢູ່ໃນ 21 ນໍ້າຕົກທີ່ສວຍງາມຈາກທົ່ວໂລກ ປີ 2025

ວາລະສານ ການທ່ອງທ່ຽວຊື່ດັງຂອງໂລກ Travel + Leisure ໄດ້ຈັດອັນດັບ Top 21 Most Beautiful Waterfalls in the World...

ໄທເລີ່ມປະຕິບັດແລ້ວ ທະນາຄານເລີ່ມປາບປາມຂະບວນການບັນຊີມ້າ ຖ້າກວດພົບຄວາມສົງໄສ ຈະອາຍັດບັນຊີທັນທີ

ບັນຊີມ້າແມ່ນບັນຊີທະນາຄານທີ່ຖືກນໍາໃຊ້ໂດຍອາດຊະຍາກອນ ເພື່ອເກັບເງິນ ຫຼື ຟອກເງິນທີ່ໄດ້ມາແບບຜິດກົດໝາຍ ແມ່ນບັນຊີທີ່ຖືກຈ້າງໃຫ້ເປີດ ຫຼື ຖືກລັກຂໍ້ມູນໄປໃຊ້ ເພື່ອເປັນທາງຜ່ານຂອງເງິນທີ່ໄດ້ມາຈາກການກະທຳຜິດກົດໝາຍ ລວມທັງການພະນັນ. ໃນຊ່ວງໜຶ່ງອາທິດທີ່ຜ່ານມາ ທາງທະນາຄານເເຫ່ງປະເທດໄທ ເລີ່ມກວດສອບ ແລະ ລົງມືປະຕິບັດຢ່າງເຂັ້ມງວດ ໃນການອາຍັດບັນຊີມ້າ...

ຄວາມຫວັງໃໝ່ຂອງເນປານ ແຕ່ງຕັ້ງລັດຖະມົນຕີຄົນໃໝ່ ໂດຍຈະປະຕິບັດໜ້າຮັກສາການ 6 ເດືອນ

ພາຍຫຼັງຄວາມວຸ່ນວາຍຂອງເຫດການປະທ້ວງໃນປະເທດເນປານ ເຮັດໃຫ້ອະດີດນາຍຍົກລັດຖະມົນຕີໄດ້ລາອອກ ພ້ອມທັງເດີນທາງອອກນອກປະເທດ ນຳພາໃຫ້ເນປານບໍ່ມີຄົນດຳລົງຕໍາເເໜ່ງນາຍົກລັດຖະມົນຕີໃນໄລຍະໜຶ່ງ. ເຊິ່ງໃນວັນທີ 12 ກັນຍາ 2025 ທີ່ຜ່ານມາ, ໄດ້ມີການປະກາດແຕ່ງຕັ້ງ ທ່ານ ນາງ  ສຸຊີລາ ກາກີ ຂຶ້ນຮັບຕໍາແໜ່ງຮັກສາການນາຍົກລັດຖະມົນຕີ...

ສະຫຼົດ! ຊາຍອາຍຸ 26 ປີ (ເສຍຊີວິດ) ຍ້ອນຂັບລົດຕຳງົວ ທີ່ບ້ານວຽງແກ້ວ ເມືອງຈັນທະບູລີ ນະຄອນຫຼວງວຽງຈັນ

ບັນຫາການປ່ອຍສັດຊະຊາຍ ສ່ຽງເຮັດໃຫ້ຄົນອື່ນເກີດອຸບັດຕິເຫດ ເຖິງຂັ້ນເສຍຊີວິດໄດ້. ບັນຫາການປ່ອຍສັດລ້ຽງ (ງົວ, ຄວາຍ, ແບ້, ມ້າ...) ຍັງຄົງຖືກພົບເຫັນເລື້ອຍໆຢູ່ຫຼາຍໆຂົງເຂດ ຕັ້ງແຕ່ເຂດຊານເມືອງຈົນໄປເຖິງໃນເມືອງ. ຈົນກາຍເປັນຄວາມເຄີຍຊິນໄປແລ້ວສຳລັບຜູ້ສັນຈອນໄປມາທີ່ຕ້ອງລະວັງເອງ ແຕ່ບາງຄັ້ງກໍມີອຸບປະຕິເຫດຕາມມາ ເຊັ່ນ: ລົດໃຫຍ່ຕຳງົວ, ລົດຈັກຕຳງົວ,...