ໝາກເຂົ້າ ເປັນຜັກທີ່ຊາວບ້ານນິຍົມນຳໝາກອ່ອນ ຫລື ຍອດອ່ອນມາລວກ ຫລື ຕົ້ມເປັນຜັກກັບ ທີ່ກິນກັບແຈ່ວ ປົ່ນ ສັບພະຄຸນທາງຢາ ຮາກ ແລະ ໃບ ໃຊ້ຖອນພິດ ຫລຸດໄຂ້ ແກ່ນດິບ ມີລິດຢາເບື່ອຫ້າມກິນ
ໜ່ວຍຂອງ ໝາກເຂົ້າ ມີສານອາຫານຫລາຍຢ່າງ ເຊັ່ນ ເບຕາແຄໂລທີນ ໄລໂຄປີນ ຊີແຊນທີນ ລູທີນ ວິຕາມິນອີ ກົດໄຂມັນທີ່ຈຳເປັນ ເຊິ່ງສານຕ້ານອານຸມູນອິດສະຫລະສ່ວນໃຫຍ່ ມີປະລິມານຫລາຍໃນໝາກເຂົ້າ ທີ່ຍັງບໍ່ສຸກ (ໜ່ວຍສີຂຽວ) ໄລໂຄປີນ ຂອງເຍື່ອຫຸ້ມແກ່ນໝາກເຂົ້າ ມີປະມານສູງຫລາຍ ປະມານ 10 ເທົ່າຂອງໜ່ວຍ ແລະ ຫມາກໄມ້ຊະນິດອື່ນໆ ທີ່ ມີໄລໂຄປີນສູງ ເຊັ່ນ ໝາກຮຸ່ງ ໝາກໂມ ໝາກເລັ່ນ
ເຊິ່ງໄລໂຄປີນນີ້ ມີການສຶກສາພົບວ່າ ໜ່ວຍຊ່ວຍຫລຸດຄວາມສ່ຽງຂອງການເກີດພະຍາດຫລອດເລືອດຫົວໃຈ ຈາກການທີ່ມີຜົນຫລຸດລະດັບໄຂມັນໃນເລືອດ ແລະ ຍັງປ້ອງກັນເບົາຫວານ ບາງການສຶກສາພົບວ່າ ຊ່ວຍຫລຸດຄວາມສ່ຽງການເກີດມະເຮັງໄດ້ຫລາຍຊະນິດ ເຊັ່ນ ມະເຮັງອັນທະ ມະເຮັງປອດ ມະເຮັງຕັບ ມະເຮັງຜິວໜັງ ມະເຮັງເຕົ້ານົມ ມະເຮັງໃນລະບົບທາງເດີນອາຫານ (ມະເຮັງລຳໄສ້ ມະເຮັງກະເພາະອາຫານ ມະເຮັງຕັບອ່ອນ) ອີກທັງຍັງຊ່ວຍຫລຸດຄ່າ prostate specific antigen (PSA) ເຊິ່ງເປັນຄ່າບົ່ງຊີ້ສຸຂະພາບຂອງອັນທະ ທີ່ອາດເພີ່ມຂຶ້ນໃນຄົົນທີ່ເປັນມະເຮັງອັນທະ (ບາງຄົົນທີ່ເປັນມະເຮັງອັນທະ ກໍອາດບໍ່ມີການເພີ່ມຂຶ້ນຂອງຄ່າ PSA) ຫລື ໃນຄົນທີ່ມີພາວະການອັກເສບຂອງອັນທະ ຕິດເຊື້ອໃນທາງຍ່ຽວ ກໍອາດສົ່ງຜົນໃນຄ່າ PSA ເພີ່ມຂຶ້ນ ໝາກເຂົ້າ ຈຶ່ງມີປະໂຫຍດຕໍ່ຜູ້ຊາຍ ເຊິ່ງມັກຈະມີບັນຫາອັນທະ ເມື່ອສູງໄວຂຶ້ນ
ສ່ວນເບຕ້າແຄໂລທີນ ເປັນສານຕັ້ງຕົ້ນຂອງວິຕາມິນເອ ເຊິ່ງມີຄວາມສຳຄັນຕໍ່ສຸຂະພາບຂອງເຍື່ອຈຸລັງທົ່ວຮ່າງກາຍ ມີປະໂຫຍດຕໍ່ສຸຂະພາບຂອງດວງຕາ ແລະ ຜິວໜັງ ໂດຍຊ່ວຍປ້ອງກັນ ແລະ ຍັບຍັ້ງຈໍປະສາດຕາເສື່ອມ ຊ່ວຍປ້ອງກັນອາການຕາບອດກາງຄືນ ແລະ ຖອກທ້ອງຈາກການຂາດວິຕາມິນເອ ປົກປ້ອງຜິວຈາກແສງແດດ ປ້ອງກັນຜິວໄໝ້ແດດ ຫລຸດຄວາມສ່ຽງຂອງການເກີດມະເຮັງເຕົ້ານົມ ມະເຮັງຮວຍໄຂ່ ແລະ ປ້ອງກັນຫອບຫືດຈາກການອອກກຳລັງກາຍ ໃນ ໝາກເຂົ້າ ຍັງມີຊີແຊນທີນ ແລະ ລູທີນ ທີ່ເປັນສານສຳຄັນທີ່ເປັນປະໂຫຍດຕໍ່ສຸຂະພາບຂອງດວງຕາເຊັ່ນກັນ
ນອກຈາກນີ້ ໝາກເຂົ້າ ຍັງມີລິດຕ້ານການອັກເສບ ຕ້ານອານຸມູນອິດສະຫລະ ປິ່ນປົວແຜໃນກະເພາະອາຫານ (ໂດຍມີຜົນເພີ່ມການສ້າງເສັ້ນເລືອດ) ຫລຸດລະດັບນ້ຳຕ້ານໃນເລືອດ ເສີມພູມຄຸ້ມກັນ ໂດຍການນຳໄປໃຊ້ ອາດກິນເປັນຜັກ ນ້ຳຫມາກໄມ້ ຫລື ໃນປະເທດຫວຽດນາມຈະມີການໃຊ້ນ້ຳບີບຈາກ ໝາກເຂົ້າ ຫຸງເຂົ້າແທນນ້ຳ