ນັກທ່ອງທ່ຽວທີ່ເຂົ້າມາຢ້ຽມຢາມ ສປປ ລາວ ສ່ວນຫຼາຍມາຈາກປະເທດ ໄທ, ສສ ຫວຽດນາມ, ສປ ຈີນ, ສ. ເກົາຫຼີ, ອາເມລິກາ, ລັດເຊຍ ແລະ ຝຣັ່ງ. ໃນນີ້ນັກທ່ອງທ່ຽວຈາກພາກພື້ນອາຊີກວມອັດຕາສ່ວນຫຼາຍທີ່ສຸດ ເນື່ອງຈາກການເດີນທາງເຂົ້າມາໃກ້ກວ່າ, ຄວາມສະດວກຂອງເສັ້ນທາງລົດໄຟ ລາວ-ຈີນ ທີ່ໄດ້ຮັບການໂຄສະນາຈາກ ສື່ສັງຄົມອອນລາຍຫຼາຍສໍານັກ, ມີຊາຍແດນຕິດຈອດກັນ ແລະ ມີສາຍການບິນໂດຍກົງເຂົ້າມາ ສປປ ລາວ ຊຶ່ງ ສອດຄ່ອງກັບພຶດຕິກໍາຂອງນັກທ່ອງທ່ຽວພາຍຫຼັງການແຜ່ລະບາດຂອງພະຍາດໂຄວິດ-19 ນັກທ່ອງທ່ຽວສ່ວນຫຼາຍນິຍົມເດີນທາງທ່ອງທ່ຽວຢູ່ເຂດໃກ້ຄຽງ.
ໃນ 9 ເດືອນຕົ້ນປີ 2023, ນັກທ່ອງທ່ຽວຈາກປະເທດໄທ ເປັນອັນດັບທີ່ໜຶ່ງ ທີ່ເຂົ້າມາທ່ອງທ່ຽວຢູ່ ສປປ ລາວ ມີຈໍານວນ 999.481 ເທື່ອຄົນ, ກວມເອົາ 42.6%. ເນື່ອງຈາກວ່າມີຄວາມສະດວກໃນການເດີນທາງ ເປັນຕົ້ນ ແມ່ນເສັ້ນທາງລົດໄຟ ລາວ-ຈີນ, ມີພາສາ ແລະ ວັດທະນະທໍາທີ່ຄ້າຍຄືກັນ.
ອັນດັບທີ່ສອງ ນັກທ່ອງທ່ຽວຈາກ ປະເທດ ສສ ຫວຽດນາມ ມີຈໍານວນ 608.678 ເທື່ອຄົນ, ກວມເອົາ 25.9% ຊຶ່ງ ປະເທດ ສສ ຫວຽດນາມ ກໍເປັນ ປະເທດໜຶ່ງທີ່ມີຊາຍແດນຕິດຈອດກັນ ແລະ ໄດ້ມີການເດີນທາງ ເຂົ້າ-ອອກ ປະເທດຢ່າງຕໍ່ເນື່ອງ, ເຮັດໃຫ້ມີຈໍານວນນັກທ່ອງທ່ຽວເຂົ້າມາໃນ ສປປ ລາວ ເປັນຈໍານວນຫຼວງຫຼາຍ.
ອັນດັບທີ່ສາມ ແມ່ນນັກທ່ອງທ່ຽວຈາກ ສປ ຈີນ ມີຈໍານວນ 478,797 ເທື່ອຄົນ, ກວມເອົາ 20.4%, ໂດຍມີຄວາມສະດວກໃນການເດີນທາງ (ເຮືອບິນ ແລະ ລົດໄຟ ລາວ-ຈີນ).
ນອກຈາກນີ້ຍັງມີປະເທດ ສ. ເກົາຫຼີ ທີ່ມີນັກທ່ອງທ່ຽວໃຫ້ຄວາມສົນໃຈເຂົ້າມາທ່ຽວ ສປປ ລາວ ມີ ຈໍານວນ 102,523 ເທື່ອຄົນ, ກວມເອົາ 4.4% ຍ້ອນມີຄວາມສະດວກໃນການເດີນທາງ (ມີສາຍການບິນໂດຍກົງ) ແລະ ຄວາມມັກຮັກໃນທໍາມະຊາດ.
ແຫຼ່ງຂ່າວ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ