ໃນງານບຸນອອກພັນສາປະວໍລະນາ ແລະ ບຸນຊ່ວງເຮືອປະເພນີ ທີ່ຈະຈັດຂຶ້ນໃນວັນທີ 27-30 ຕຸລາ 2023 ນີ້ ເຮັດໃຫ້ມີຜູ້ຄົນຈຳນວນບໍ່ວ່າຈະເປັນນັກທ່ອງທ່ຽວພາຍໃນ ແລະ ຕ່າງປະເທດ ຫຼັ່ງໄຫຼເຂົ້າມາທ່ຽວຊົມ ກໍຈະພາໃຫ້ໃນງານບຸນມີຄວາມຄຶກຄື້ນ ແຕ່ສິ່ງທີ່ຕາມມານັ້ນກໍຄືປາກົດການຫຍໍ້ທໍ້ ເປັນຕົ້ນແມ່ນ ແຫກກະເປົາ, ລັກຊັບ, ຊິງຊັບ ແລະ ອື່ນໆ.
ໃນແຕ່ລະປີຜ່ານມາ, ບັນຫາທີ່ມັກພົບເຫັນໃນງານບຸນດັ່ງກ່າວຈະມີກຸ່ມຄົນຈໍານວນໜຶ່ງສວຍໂອກາດ ກໍ່ຄວາມບໍ່ສະຫງົບ ເປັນຕົ້ນແມ່ນຊິງຊັບ, ລັກຊັບ, ລ້ວງກະເປົາ, ແຫກກະເປົາ ຜູ້ຄົນທີ່ມາທ່ຽວຊົມ.
ນອກຈາກປາກົດການຫຍໍ້ທໍ້ທີ່ເກີດຂຶ້ນ ສິ່ງທີ່ພົບຢູ່ເລື່ອຍໆກໍແມ່ນເດັກນ້ອຍ ພັດຫຼົງຈາກຜູ້ປົກຄອງ ເຮັດໃຫ້ຫຍຸ້ງຍາກຕໍ່ການປະກາດຫາ.
ດັ່ງນັ້ນ ຈຶ່ງຂໍໃຫ້ທຸກໆຄົນທີ່ຈະເຂົ້າມາທ່ຽວໃນງານບຸນ ຈົ່ງມີສະຕິລະວັງຕົວ ບໍ່ໃສ່ຊັບສິນ ເຄື່ອງປະດັບ ທີ່ມີຄ່າມາໃນງານ, ບໍ່ຄວນເອົາເອົາກະເປົາເງິນ, ໂທລະສັບ, ໃສ່ຖົງໂສ້ງທາງຫຼັງ ແລະ ກະເປົາທີ່ເອົາມານຳກໍຄວນພາຍໄວ້ທາງໜ້າຂອງຕົນ ຫ້າມພາຍໄວ້ທາງຂ້າງ ຫຼື ທາງຫຼັງເດັດຂາດ ເພາະສ່ຽງຕໍ່ການຖືກລ້ວງ ຫຼື ແຫກກະເປົາໄດ້ງ່າຍ ແລະ ທີ່ສຳຄັນຄືເມື່ອຜູ້ປົກຄອງໄດ້ນຳເດັກນ້ອຍມາທ່ຽວກໍຄວນເບິ່ງບໍ່ໃຫ້ຄາດສາຍຕາ ຈູງມືຕະຫຼອດເວລາໃນການຍ່າງເລາະທ່ຽວຊົມບຸນ.