GUINNESS WORLD RECORDS ປະກາດຂ່າວຮ້າຍວ່າ: ໂບບີ້ ໝາທີ່ມີອາຍຸຫຼາຍທີ່ສຸດໃນໂລກ 31 ປີ ກັບ 165 ມື້ໄດ້ເສຍຊີວິດແລ້ວໃນວັນທີ 23 ຕຸລາ 2023 ຜ່ານມາ, ໂດຍໝາ ໂບບີ້ ຫາກໍສະຫຼອງວັນເກີດຄົບຮອບ 31 ປີ ໃນເດືອນພຶດສະພາ.

ໂບບີ້ເປັນໝາເພດຜູ້ ສາຍພັນ ຮາເຟໂຮ ໂດ ອະເລນທີໂຈ ເຊິ່ງໂບບີ້ຖືກຈົດເປັນສະຖິຕິເປັນໝາທີ່ມີອາຫຼາຍທີ່ສຸດໂດຍບໍລິສັດ GUINNESS WORLD RECORDS ເມື່ອວັນທີ 3 ກຸພາ 2023 ດ້ວຍອາຍຸ 30 ປີກັບ 268 ມື້ໂດຍມີ ທ້າວ ລີໂອເນວ ຄອສຕາ ເປັນເຈົ້າຂອງໂບບີ້.

ສຳລັບໝາໂບບີ້ເກີດໃນວັນທີ 11 ພຶດສະພາ 1992 ໂດຍອາໃສຢູ່ກັບຄອບຄົບ ຄອສຕາ ໃນໝູ່ບ້ານຊົນນະບົດ ໂຄເຄຮອສ ແຄວ້ນເລເລີຍ ປະເທດປໍຕຸເກດ ໂດຍແມ່ຂອງໂບບີ້ຊື່ວ່າ ກິຮາ ໄດ້ເກີດລູກ 4 ໂຕຢູ່ໃນໂຮງເກັບຝືນຂອງຄອບຄົວ ຄອສຕາ ເຊິ່ງໂບບີ້ ກໍເປັນ 1 ໃນ 4 ໂຕນັ້ນ.

ເຈົ້າຂອງໆມັນໄດ້ເລົ່າວ່າ: ວ່າອາຫານທີ່ໂບບີ້ກິນ ມັນເປັນອາຫານຂອງມະນຸດ. ສິ່ງທີ່ພວກເຮົາກິນ ໂບບີ້ສາມາດກິນໄດ້ແລະ ດໍາລົງຊີວິດຢູ່ໃນສະພາບແວດລ້ອມທີ່ສະຫງົບສຸກ ຢ່າງຫຼິ້ນໄດ້ເສລີໂດຍບໍ່ເຄີຍຖືກຜູກມັດກັບສາຍເຊືອກ ຈຶ່ງເຮັດໃຫ້ໂບບີ້ ເປັນໝາທີ່ມີອາຍຸຫຼາຍ.

ນັກວິທະຍາສາດການແພດສະໄໝໃໝ່ ໄດ້ລະບຸວ່າ: 1 ປີຂອງໝາຈະມີອາຍຸເທົ່າກັບ 10 ປີ 5 ເດືອນ, ໃນຊ່ວງ 2 ປີທຳອິດ ແຕ່ຫຼັງຈາກນັ້ນທຸກໆ 1 ປີຂອງໝາຖ້າທຽບໃສ່ອາຍຸຄົນຈະເທົ່າ 4 ປີ, ທັງນີ້ອາຍຸໂບບີ້ 31 ປີ ຫາກທຽບເປັນອາຍຸຄົນຈະເມົ່າກັບ 137 ປີ.