ສັບປະເລີ່ ເຂົ້າສາຍໄດ້ພຽງ 2 ອາທິດ ຍອດທະລຸ 300 ລ້ານບາດເປັນທີ່ຮຽບຮ້ອຍ ແຖມຍັງໄດ້ຮັບຄວາມນິຍົມຈາກ ສປປ ລາວເຮົາອີກດ້ວຍ.
ຍັງມີຜູ້ເຂົ້າຊົມຢ່າງຕໍ່ເນື່ອງ ກັບຮູບເງົາເລື່ອງ “ສັບປະເລີ່” ຮູບເງົາສັນຊາດໄທ ທາງພາກອີສານ ໂດຍເລົ່າເລື່ອງລາວຂອງ ເຈີດ ໄວລຸ້ນຊາຍອາຍຸ 25 ປີ ທີ່ຮຽນຈົບກົດໝາຍ 7-8 ປີ ມີພໍ່ເຮັດອາຊີບເປັນສັບປະເລີ່ ເຈີດຫວັງຈະໄປເສັງເປັນທະນາຍ ຫຼື ປະລັດອຳເພີ ແຕ່ຕ້ອງມາຊ່ວຍພໍ່ເປັນສັບປະເລີ່ ເພາະພໍ່ບໍ່ສະບາຍຈົນຕ້ອງມາຊ່ວຍພໍ່ເຮັດວຽກ ແຕ່ກໍຢ້ານເພາະຕົນເອງກໍຢ້ານຜີ ແລະ ຍັງຕ້ອງມາເຮັດວຽກນຳສົບຄົນຕາຍ.
ສັບປະເລີ່ ເປັນໜຶ່ງໃນຮູບເງົາຈັກກະວານໄທບ້ານ ທີ່ເປັນອຸດສາຫະກຳຫຼັງທີ່ສະທ້ອນຄວາມເປັນອີສານ ປັດຈຸບັນ ປະກອບມີ 6 ເລື່ອງ ໂດຍການເລີ່ມຕົ້ນຂອງຮູບເງົາເລື່ອງທຳອິດແມ່ນເລີ່ມໃນປີ 2019.
ສັບປະເລີ່ ເປັນຮູບເງົາທີ່ເປັນການກຳກັບຂອງ ຕ້ອງເຕ ຖິຕິສີນວນ ຈາກການເຂົ້າສາຍຮູບເງົາໃນໄທມາໄດ້ 2 ອາທິດ ຫຼ້າສຸດໃນເຊົ້າວັນທີ 18 ຕຸລາ 2023 ສາມາດສ້າງລາຍໄດ້ຫຼາຍເຖິງ 300 ລ້ານບາດ.
ນອກນີ້ ຮູບເງົາເລື່ອງ “ສັບປະເລີ່” ກໍຍັງເປັນທີ່ນິຍົມໃນ ສປປ ລາວ ເຮົາເຊັ່ນກັນ ໂດຍຟັງຈາກສຽງຂອງຜູ້ທີ່ເຄີຍເຂົ້າໄປເບິ່ງແລ້ວ ຫຼາຍຄົນກໍຕ່າງເວົ້າວ່າ ຮູບເງົາເຮັດມາດີຫຼາຍ ແລະ ເປັນຮູບເງົາທີ່ເຮົາຄວນເຂົ້າເບິ່ງທີ່ສຸດ.
ທີມງານຜູ້ສ້າງ ແລະ ສະແດງໃນຮູບເງົາເລື່ອງ “ສັບປະເລີ່” ກໍຍັງເດີນທາງມາ ສປປ ລາວ ໂດຍເດີນທາງໄປຍັງໂຮງຮູບເງົາທີ່ ນະຄອນປາກເຊ ແຂວງຈຳປາສັກ ຖືໄດ້ວ່າເປັນການເຊີໄພ້ບັນດາແຟນຄັບເລີຍກໍ່ວ່າໄດ້ ນອກຈາກຈະສ້າງຄວາມຕື່ນເຕັ້ນໃຫ້ກັບຜູ້ຄົນທີ່ໄປເບິ່ງແລ້ວ ກໍຍັງສ້າງຄວາມປະທັບໃຈຕື່ມອີກໃຫ້ແກ່ແຟນຄັບຊາວລາວເຮົາ.
