ໃນທ່າມກາງບັນຍາກາດແຫ່ງຄວາມໂສກເສົ້າເສຍດາຍ ແລະ ອາໄລອາວອນຢ່າງສຸດຊຶ້ງຕໍ່ການຈາກໄປໂດຍບໍ່ມີວັນຫວນກັບຄືນມາຂອງ ທ່ານ ພຸດດາມອນ ຈັນທະລາສີ ຫຼື ຈ່ອຍເຊຍລາວ ຖືເປັນການສູນເສຍຄັ້ງຍິ່ງໃຫຍ່ ບຸກຄົນສຳຄັນ ຂອງວົງການສື່ມວນຊົນ ແລະ ກິລາລາວ.
ທ່ານ ພຸດດາມອນ ຈັນທະລາສີ ເກີດເມື່ອວັນທີ 23/02/1977 ແລະ ໄດ້ເສຍຊີວິດ ທີ່ເມືອງຫາງໂຈ ສປຈີນ ໃນຄະນະທີ່ ທ່ານ ກຳລັງປະຕິບັດໜ້າທີ່ ເກັບກຳ ແລະ ລາຍງານຂ່າວກິລາ ໃນງານກິລາ ເອຊ້ຽນເກມ ຄັ້ງທີ່19 ທີ່ເມືອງຫາງໂຈ ສປ ຈີນ ດ້ວຍພະຍາດຂອງຜູ້ກ່ຽວເອງ ລວມອາຍຸໄດ້ 46ປີ ອະດີດພະນັກງານ,ພິທີກອນ ແລະ ຜູ້ປະກາດຂ່າວໂທລະພາບລາວສະຕາຣ໌ ເຊິ່ງເລີ່ມເຂົ້າເປັນພິທີກອນໂທລະພາບລາວສະຕາຣ໌ ຕັ້ງແຕ່ວັນທີ 01/09/2009 ເປັນຕົ້ນມາ ລາຍການ ເຊຍລາວເປັນລາຍການທຳອິດທີ່ ທ່ານ ພຸດດາມອນ ຈັນທະລາສີ ຫລື ຈ່ອຍເຊຍ ເຂົ້າມາເປັນພິທີກອນ ເຊີ່ງເປັນລາຍການທີ່ລາຍງານຂ່າວສານ ກ່ຽວກັບຂ່າວກິລາທັງພາຍໃນ ແລະ ຕ່າງປະເທດ ນອກຈາກນັ້ນຍັງມີລາຍການ ສະໂມສອນຊາວບ້ານ ລາຍການຂ່າວຕ່າງໆໃນໂທລະພາບລາວສະຕາຣ໌ ອີກຫລາຍລາຍການ ແລະ ທ່ານກໍ່ເປັນພິທີກອນຜູ້ໜຶ່ງທີ່ສັງຄົມໃຫ້ການຍອມຮັບທ່ານ ແລະ ກໍຍັງເປັນ ອະດີດ, ອະດີດຄະນະອະນຸກຳມະການ ການຕະຫຼາດ ແລະ ສື່ມວນຊົນ ສະຫະພັນບານເຕະແຫ່ງຊາດລາວ, ອະດີດຜູ້ບັນລະຍາຍ ການແຂ່ງຂັນລາຍການຕ່າງໆ ຂອງສະຫະພັນບານເຕະແຫ່ງຊາດລາວ ພ້ອມທັງເປັນນັກພາກກິລາຫລາຍປະເພດຂອງວົງການກິລາລາວ
ຕະຫຼອດໄລຍະແຫ່ງການເຄື່ອນໄຫວຮັບໃຊ້ປະເທດຊາດໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດເວົ້າລວມແລະເວົ້າສະເພາະໃນວຽກງານສື່ມວນຊົນ,ທ່ານ ພຸດດາມອນ ຈັນທະລາສີ ຫລື ຈ່ອຍເຊຍລາວ ໄດ້ເຄື່ອນໄຫວເຮັດວຽກດ้ວຍຄວາມຫ້າວຫັນມີຄວາມຮັບຜິດຊອບສູງ ເຖິງແມ່ນຈະໄດ້ຮັບການມອບໝາຍໃຫ້ເຮັດວຽກງານນ້ອຍ, ໃຫຍ່, ໜັກໜ່ວງ ແລະ ສັບສົນຫຍຸ້ງຍາກຊໍ່າໃດກໍ່ໄດ້ສູ້ຊົນບຸກບືນ, ອົດທົນຜ່ານຜ່າ ໄດ້ອຸທິດເຫື່ອແຮງສະຕິປັນຍາຂອງຕົນເຮັດສໍາເລັດໜ້າທີ່ວຽກງານທີ່ພັກ,ລັດການຈັດຕັ້ງມອບໝາຍໃຫ້ໄດ້ເປັນຢ່າງດີ,ທ່ານຍັງເປັນພະນັກງານວິຊາການຜູ້ໜຶ່ງທີ່ມີບົດຮຽນ, ປະສົບການ ແລະ ເປັນຜູ້ທີ່ມີຄວາມຮູ້ຄວາມສາມາດ,ມີພອນສະຫວັນໃນການເປັນໂຄສົກລາຍການພາກຂ່າວກິລາ ແລະ ທ່ານຍັງເປັນຄົນທີ່ໃຫ້ຄວາມຊ່ວຍເຫລືອເຫື່ອແຮງເພື່ອຊ່ວຍເຫລືອສັງຄົມດ້ວຍຜົນງານ ແລະ ຄຸນງາມຄວາມດີ ທີ່ໄດ້ສະແດງອອກເຖິງຄຸນສົມບັດສິນທໍາປະຕິວັດອັນຜ່ອງໃສ ແລະ ຄວາມຮັກເຊື້ອແພງຊາດ,ທ່ານ ພຸດດາມອນ ຈັນທະລາສີ ຫລື ຈ່ອຍເຊຍລາວ ຈຶ່ງໄດ້ຮັບຄວາມໄວ້ເນີື້ອເຊື່ອໃຈ ແລະ ຄວາມເຄົາລົບນັຮັກແພງ ຈາກທຸກຄົນໃນອ້ອມຂ້າງ
ການລ່ວງລັບໄປຂອງທ່ານ ພຸດດາມອນ ຈັນທະລາສີ ເຮັດໃຫ້ພວກເຮົາສູນເສຍພະນັກງານວິຊາການທີ່ມີບົດຮຽນ,ປະສົບການອີກຜູ້ໜຶ່ງ. ຊຶ່ງໄດ້ນໍາຄວາມໂສກເສົ້າເສຍດາຍ ແລະ ອາໄລອາວອນອັນສຸດຊຶ້ງແກ່ການຈັດຕັ້ງ, ຄອບຄົວ, ຍາດຕິພີ່ນ້ອງຜູ້ຢູ່ໃກ້ ແລະ ໄກ, ທ່ານ ພຸດດາມອນ ຈັນທະລາສີ ທີ່ອາໄລຮັກ.
ທ່ານໄດ້ຈາກພວກເຮົາໄປຢ່າງບໍ່ມີວັນຫວນກັບຄືນມາອີກແລ້ວ, ພວກເຮົາຂໍຈາລຶກຄຸນງາມຄວາມດີ ແລະ ຜົນງານຂອງທ່ານໄວ້ຢ່າງບໍ່ມີວັນຫຼົງລືມ, ຊື່ສຽງ ແລະ ຜົນງານຂອງທ່ານຍັງຄົງຢູ່ໃນຄວາມຊົງຈຳຂອງພວກເຮົາຕະຫຼອດໄປ.
ຂໍໃຫ້ດວງວິນຍານຂອງທ່ານ ພຸດດາມອນ ຈັນທະລາສີ ຈົ່ງໄປສູສຸຂະຕິເຖີ້ນ
Cr:ໂທລະພາບ ລາວສະຕາຣ໌